ଓଡିଶା ତାଜା ନ୍ୟୁଜ୍ (୨୦ ଅଗଷ୍ଟ ଗୁରୁବାର) ବାଲେଶ୍ୱର :– ବାଲେଶ୍ୱର ସଦର ବିଧାୟକ ମଦନ ମୋହନ ଦତ୍ତଙ୍କ ବିୟୋଗ ପରେ ଏହି ଆସନ ଖାଲି ପଡିଛି । ବିଧି ମୁତାବକ ୬ମାସ ମଧ୍ୟରେ ନିର୍ବାଚନ ହେବାର ଆବଶ୍ୟକତା ରହିଛି । ହେଲେ କରୋନା ସଂକ୍ରମଣ ଯୋଗୁଁ ଧାର୍ଯ୍ୟ ସମୟରେ ନିର୍ବାଚନ କରାଇବାକୁ ନେଇ ନିର୍ବାଚନ କମିଶନ ଦ୍ୱନ୍ଦରେ ରହିଛନ୍ତି । ତେବେ ଆସନ୍ତା ଦିନ ଦୁଇ ଦିନ ମଧ୍ୟରେ ନିର୍ବାଚନକୁ ନେଇ କିଛି ଗୋଟେ ବଡ ଘୋଷଣା କରି ପାରନ୍ତି ନିର୍ବାଚନ କିମିଶନର । ବାଲେଶ୍ୱର ସଦର ଆସନରେ ଉପନିର୍ବାଚନକୁ ନେଇ ଏବେଠାରୁ ଉଷ୍ଣତା ଦେଖିବାକୁ ମିଳୁଥିବା ବେଳେ ସମସ୍ତଙ୍କ ନଜର ଶାସକ ବିଜେଡି ଉପରେ ପଡିଛି ।
ବିଶେଷ କରି ବାଲେଶ୍ୱର ସଦର ଆସନକୁ ନେଇ ଶାସକ ବିଜେଡିରେ ଚଳ ଚଞ୍ଚଳ ଦେଖିବାକୁ ମିଳିଛି । ବାଲେଶ୍ୱର ସଦର ଆସନର ପ୍ରାର୍ଥୀତ୍ୱକୁ ନେଇ ବିଜେଡି ପାଇଁ ଚ୍ୟାଲେଞ୍ଜ ସଦୃଶ ହୋଇଛି । ଗତ ନିର୍ବାଚନରେ ଏହି ଆସନରେ ବିଜେପି ପ୍ରାର୍ଥୀ ମଦନମୋହନ ଦତ୍ତ ୧୩ ହଜାରରୁ ଅଧିକ ଭୋଟରେ ବିଜେଡି ପ୍ରାର୍ଥୀ ଜୀବନ ପ୍ରଦୀପ ଦାଶଙ୍କୁ ହରାଇଥିଲେ । ଯେହେତୁ ଏହି ଆସନଟି ବିଜେପି ହାତରେ ଥିଲା ସେଥିପାଇଁ ଏହି ଆସନକୁ ହାତେଇବା ପାଇଁ ବିଜେପି ସବୁ ପ୍ରକାର କୈାଶଳ ଅବଲମ୍ବନ କରିବ । ବଡ କଥା ହେଉଛି ବିଜେପି ସ୍ୱର୍ଗତ ମଦନ ମୋହନ ଦତ୍ତଙ୍କ ବିୟୋଗ ଜନିତ ସିମ୍ପାଥିକୁ ନେଇ ନିର୍ବାଚନ ମୈଦାନକୁ ଓହ୍ଲାଇବ । ତେବେ ବିଜେପି ପାଇଁ ସବୁଠାରୁ ବଡ ସମସ୍ୟା ହେଉଛି ଦଳରେ ତୀବ୍ର ଗୋଷ୍ଠିକନ୍ଦଳ ।
ତେବେ ଏସବୁ ଭିତରେ ସମସ୍ତଙ୍କ ନଜର ଶାସକ ବିଜେଡି ଉପରେ ପଡିଛି । ରାଜ୍ୟରେ ବିଗତ କିଛି ବର୍ଷ ମଧ୍ୟରେ ହୋଇଥିବା ଉପନିର୍ବାଚନକୁ ଅନୁଧ୍ୟାନ କଲେ ଅଧିକାଂଶ ଉପନିର୍ବାଚନରେ ବିଜେଡି ହିଁ ବାଜିମାତ୍ କରିଛି । ସେଥିପାଇଁ ବାଲେଶ୍ୱର ସଦର ଆସନରେ ବିଜେଡି ପ୍ରାର୍ଥୀତ୍ୱକୁ ନେଇ ଏବେ ଚର୍ଚ୍ଚା ଯୋର ଧରିଛି । ବିଶେଷ କରି ଜିଲ୍ଲା ବିଜେଡି ସଭାପତି ଇଂ ରବିନ୍ଦ୍ର କୁମାର ଜେନାଙ୍କ ଉପରେ ସମସ୍ତଙ୍କ ନଜର ରହିଛି । ନିକଟରେ ଶ୍ୟାମପ୍ରସାଦ ବେହେରା ରାଜ୍ୟ ବିଜେଡିର ସାଧାରଣ ସଂପାଦକ ନିଯୁକ୍ତି ହେବା ଓ ସାଇରୁଲ ହକ୍ ମୋ ପରିବାର କାର୍ଯ୍ୟକ୍ରମର ଜିଲ୍ଲା ସଂଯୋଜକ ନିଯୁକ୍ତି ଦିଆଯିବା ପଛରେ ଜିଲ୍ଲା ବିଜେଡି ସଭାପତି ଇଂ ରବିନ୍ଦ୍ର ଜେନାଙ୍କ ଭୂମିକା ରହିଥିଲା ବୋଲି କୁହାଯାଉଛି । ରାଜ୍ୟ ବିଜେଡି ସଂଗଠନରେ ବାଲେଶ୍ୱର ଜିଲ୍ଲାର କେତେକ ବିଜେଡି ବିଧାୟକ ଓ ଅନ୍ୟ କେତେକ ନେତା ସାଧାରଣ ସଂପାଦକ ପଦ ପାଇଁ ଆଶାୟୀ ଥିଲେ ।
ହେଲେ ଶ୍ୟାମପ୍ରସାଦ ବେହେରା ସାଧାରଣ ସଂପାଦକ ନିଯୁକ୍ତି ହେବା ପରେ ରାଜ୍ୟ ସଂଗଠନରେ ଇଂ ଜେନାଙ୍କ ଦବ୍ଦବା କେତେ ରହିଛି ତାହା ପ୍ରମାଣିତ କରିଥିଲା । ସେଥିପାଇଁ ଆସନ୍ତା ଉପନିର୍ବାଚନରେ ପ୍ରାର୍ଥୀତ୍ୱକୁ ନେଇ ସମସ୍ତଙ୍କ ନଜର ଜିଲ୍ଲା ବିଜେଡି ସଭାପତି ଇଂ ରବିନ୍ଦ୍ର କୁମାର ଜେନାଙ୍କ ଉପରେ ରହିଛି । କୁହାଯାଉଛି ସଦର ଆସନର ପ୍ରାର୍ଥୀତ୍ୱକୁ ନେଇ ଜିଲ୍ଲା ବିଜେଡି ସଭାପତିଙ୍କ ମତାମତକୁ ଗୁରୁତ୍ୱ ଦିଆଯିବ । ସେଥିପାଇଁ ଗତ ସପ୍ତାହରେ ଜିଲ୍ଲା ସଭାପତି ଇଂ ରବିନ୍ଦ୍ର କୁମାର ଜେନାଙ୍କ ସହ ଦଳ ଗୁରୁତ୍ୱପୂର୍ଣ୍ଣ ଆଲୋଚନା କରିଥିଲା । ଦଳର ପର୍ଯ୍ୟବେକ୍ଷକ ତଥା ମନ୍ତ୍ରୀ ପ୍ରତାପ ଜେନା ଓ ଅନ୍ୟତମ ବରିଷ୍ଠ ନେତା ପ୍ରଣବ ପ୍ରକାଶ ଦାସ ଦଳର ପ୍ରାର୍ଥୀତ୍ୱକୁ ନେଇ ଆଲୋଚନା କରିଥିବା ଜଣା ପଡିଛି । ସବୁଠାରୁ ବଡକଥା ହେଉଛି ବାଲେଶ୍ୱରର ଏକାଧିକ ଆଶାୟୀ ଥିଲେ ମଧ୍ୟ ଦଳୀୟ କର୍ମୀ ମାନେ ଇଂ ରବିନ୍ଦ୍ର ଜେନା ପ୍ରାର୍ଥୀ ହୁଅନ୍ତୁ ବୋଲି ଦାବି କରିଛନ୍ତି ।
ବିଜେଡିର ସ୍ଥିତି ଯଥେଷ୍ଟ ପରିବର୍ତ୍ତନ ହୋଇଥିବା ବେଳେ ରବିନ୍ଦ୍ରଙ୍କୁ ପ୍ରାର୍ଥୀ କରିବା ସପକ୍ଷରେ ଅଧିକାଂଶ ଦଳୀୟ ନେତା ମତାମତ ଦେଇଥିଲେ । ଅପର ପକ୍ଷରେ ନିଜର ପ୍ରାର୍ଥୀତ୍ୱକୁ ନେଇ ଶ୍ରୀ ଜେନା ମୁହଁ ଖୋଲିନଥିବା ବେଳେ ଏହାକୁ ନେଇ ଦଳରେ ରହସ୍ୟମୟ ପରିସ୍ଥିତି ସୃଷ୍ଟି ହୋଇଛି । ଆହୁରି ମଧ୍ୟ କୁହାଯାଉଛି ଯେ, ଉପନିର୍ବାଚନରେ ଦଳ ଜଣେ ମହିଳା ପ୍ରାର୍ଥୀଙ୍କୁ ଟିକଟ ଦେବା ଉପରେ ଚିନ୍ତା କରୁଛି । ଏପରି ହେଲେ ସୁବାସିନୀ ଜେନାଙ୍କୁ ପ୍ରାର୍ଥୀ କରାଯାଇ ପାରେ ବୋଲି ମଧ୍ୟ ଚର୍ଚ୍ଚା ହେଉଛି । ସୁବାସିନୀ ଦଳ ମତ ନିର୍ବିଶେଷରେ ବାଲେଶ୍ୱରରେ ବେଶ ପରିଚିତ ଥିବାରୁ ତାଙ୍କ ଉପରେ ମଧ୍ୟ ଦଳ ନଜର ରଖିଛି ।ଶ୍ରୀମତୀ ସୁବା ସିନୀଙ୍କ ସାମାଜିକ ସମ୍ପର୍କ ପାଇଁ ସବୁବେଳେ ବାଲେଶ୍ୱରରେ ଚର୍ଚ୍ଚା କୁ ଆସିଛନ୍ତି l ଅପର ପକ୍ଷରେ ଦଳର ପ୍ରାର୍ଥୀତ୍ୱକୁ ନେଇ ବିଜେଡି ସୁପ୍ରିମୋ ନବୀନ ପଟ୍ଟନାୟକ ପର୍ଯ୍ୟବେକ୍ଷକ ତଥା ମନ୍ତ୍ରୀ ପ୍ରତାପ ଜେନା ଓ ବରିଷ୍ଠ ବିଧାୟକ ପ୍ରଣବ ପ୍ରକାଶ ଦାସଙ୍କୁ ଦାଇତ୍ୱ ଦେଇଥିବା ନେଇ ଚର୍ଚ୍ଚା ହେଉଛି । କେବଳ ସମୟକୁ ଅପେକ୍ଷା କରାଯାଇଛି l ସେଥିପାଇଁ ସଦର ଆସନ ପାଇଁ ଜିଲ୍ଲା ବିଜେଡି ସଭାପତି ରବିନ୍ଦ୍ର ଜେନାଙ୍କ ଉପରେ ଏବେ ସମସ୍ତଙ୍କ ନଜର ରହିଛି । (ଦୀପ୍ତିମାନ ପତି /ବାଲେଶ୍ୱର )
