ଓଡିଶା ତାଜା ନ୍ୟୁଜ୍ (୨୦ ଅଗଷ୍ଟ ଗୁରୁବାର) ହିଞ୍ଜିଳିକାଟୁ :- ପଞ୍ଜାବ ନ୍ୟାସନାଲ ବ୍ୟାଙ୍କ୍ ହିଞ୍ଜିଳିକାଟୁ ଶାଖା ପରିଚାଳକଙ୍କ ମନମୁଖୀ ଶାସନରେ ଗତ କିଛି ଦିନ ଧରି ଗ୍ରାହକଙ୍କ ମଧ୍ୟରେ ଅସନ୍ତୋଷ ଲାଗି ରହିଥିଲା । ଗୁରୁବାର ସକାଳେ ସଂପୃକ୍ତ ବ୍ୟାଙ୍କର ଶାଖା ପରିଚାଳକଙ୍କ ଦବଙ୍ଗଗିରିକୁ ନେଇ ଗ୍ରାହକ ତାତି ଉଠିଥିଲେ । ଫଳରେ କିଛି ସମୟ ପାଇଁ ବ୍ୟାଙ୍କ କର୍ମଚାରୀ ଓ ଗ୍ରାହକଙ୍କ ମଧ୍ୟରେ ଯୁକ୍ତିତର୍କ ଚାଲିଥିଲା । ପ୍ରକାଶ ଯେ , ଗୁରୁବାର ସକାଳ ପ୍ରାୟ ୧୦ଟା ୧୫ମିନଟ ସମୟରେ ବ୍ୟାଙ୍କରୁ ଟଙ୍କା ଉଠାଣ ସକାଶେ ୫/୭ଜଣ ବୃଦ୍ଧା ଓ ଜଣେ ବିକଳାଙ୍ଗ ଆସିଥିଲେ । ଟଙ୍କା ଉଠାଣ ବର୍ତମାନ ସମୟରେ ହୋଇପାରିବ ନାହିଁ ବୋଲି ଶାଖା ପରିଚାଳକ କହିବା ସହ କିଛି ଜରୁରୀ କାର୍ଯ୍ୟ ଥିବା ଦର୍ଶାଇ ୨ଜଣ କର୍ମଚାରୀଙ୍କୁ ବାହାରକୁ ପଠାଇଥିଲେ । ଯିବା ସମୟରେ ବ୍ୟାଙ୍କର ବାହାରପଟୁ ତାଲା ଲଗାଇ ଯିବାକୁ କର୍ମଚାରୀଙ୍କୁ କହିଥିଲେ । ଫଳରେ ୨ କର୍ମଚାରୀ ଗ୍ରାହକଙ୍କୁ ବାହାରକୁ ଯିବାକୁ କହି ବ୍ୟାଙ୍କର ବାହାରପଟୁ ତାଲା ପକାଇ ବାହାରକୁ ଚାଲି ଯାଇଥିଲେ । ପ୍ରାୟ ୩୦ମିନଟ ପରେ ୨ କର୍ମଚାରୀ ବ୍ୟାଙ୍କକୁ ଫେରିଥିଲେ । ବିକଳାଙ୍ଗ ଓ ପ୍ରାପ୍ତ ବୟସ୍କଙ୍କ ସକାଶେ ସମସ୍ତ ସ୍ଥାନରେ ସ୍ୱତନ୍ତ୍ର ବ୍ୟବସ୍ଥା କରିବା ସକାଶେ ସରକାର ନିୟମ ପ୍ରଚଳନ କରିଥିଲେ ମଧ୍ୟ ପଞ୍ଜାବ ନ୍ୟାସନାଲ ବ୍ୟାଙ୍କ୍ ହିଞ୍ଜିଳିକାଟୁ ଶାଖାରେ ଏହାର ବ୍ୟତିକ୍ରମ ଦେଖିବାକୁ ମିଳିଛି ।
ପରେ ଅପେକ୍ଷା କରିଥିବା ବିକଳାଙ୍ଗ ଯୁବକ ଓ ବୃଦ୍ଧା ମାନଙ୍କୁ ଗାଳି ଗୁଲଜ କରିଥିବା ଅଭିଯୋଗ ହୋଇଛି । ଶାଖା ପରିଚାଳକଙ୍କ ଏଭଳି ମନ୍ତବ୍ୟକୁ ନେଇ ଗ୍ରାହକ ମାନେ ତାତି ଉଠିଥିଲେ । ଫଳରେ କିଛି ସମୟ ପାଇଁ ବ୍ୟାଙ୍କ କର୍ମଚାରୀ ଓ ଗ୍ରାହକଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଏଭଳି ଘଟଣାର ଭିଡ଼ିଓ ସାମାଜିକ ଗଣମାଧ୍ୟମରେ ଭାଇରାଲ ହେବାରେ ଲାଗିଛି । ପ୍ରାୟ ୟଧଘଂଟା ପରେ ପରିସ୍ଥିତି ଶାନ୍ତ ପଡ଼ିଥିଲା । ଏ ନେଇ ଶାଖା ପରିଚାଳକ ଅରବିନ୍ଦ ସେନାପତିଙ୍କୁ ପଚାରିବାରୁ ସେ କହିଲେ, ମହାମାରୀ କରୋନା ସମୟରେ ସାମାଜିକ ଦୂରତ୍ୱ ରକ୍ଷାକୁ ଗୁରୁତ୍ୱ ପ୍ରଦାନ କରାଯାଉଥିବାରୁ ଏବଂ ଅତ୍ୟାବଶ୍ୟକ କାର୍ଯ୍ୟ ସକାଶେ ୨ କର୍ମଚାରୀ ବାହାରକୁ ଯିବାରୁ ଅଯଥା ଗ୍ରାହକଙ୍କ ଭିଡ଼ ହେବା ସମ୍ଭାବନାକୁ ଆଖି ଆଗରେ ରଖି ସଂପୃକ୍ତ ୨ କର୍ମଚାରୀଙ୍କୁ ବ୍ୟାଙ୍କର ବାହାର ପଟୁ ତାଲା ପକାଇ ଯିବାକୁ କହିଥିଲେ । ଗ୍ରାହକଙ୍କୁ ଗାଳି ଗୁଲଜ କରିବା ଘଟଣା ସମ୍ପୁର୍ଣ୍ଣ ମିଥ୍ୟା । ତେବେ ଗତ କିଛି ମାସ ଧରି ପଞ୍ଜାବ ନ୍ୟାସନାଲ ବ୍ୟାଙ୍କ୍ ହିଞ୍ଜିଳିକାଟୁ ଶାଖାର ପରିଚାଳକଙ୍କ ମନମୁଖୀ କାର୍ଯ୍ୟକୁ ନେଇ ଗ୍ରାହକଙ୍କ ମଧ୍ୟରେ ଅସନ୍ତୋଷ ଲାଗି ରହିଥିଲା । ପୂର୍ବରୁ ମଧ୍ୟ ଏଭଳି ଘଟଣା ଘଟିଥିଲା । ( ରିପୋର୍ଟ-ଶେଷଦେବ ସାହୁ )
