ଓଡିଶା ତାଜା ନ୍ୟୁଜ୍ (୨୦ ଅଗଷ୍ଟ ଗୁରୁବାର) ହିଞ୍ଜିଳିକାଟୁ :- କରେନା ମହାମାରୀର ପାର୍ଦୁଭାବ ପରେ ଲକଡ଼ାଉନ, ସଟଡ଼ାଉନ, କଂଟେନମେଂଟ, ବଫରଜୋନ ଭଳି କଟକଣା ଭିତରେ ଛନ୍ଦି ହୋଇପଡ଼ିଛନ୍ତି ହିଞ୍ଜିଳିକାଟୁ ପୌରାଂଚଳ ସମେତ ସ୍ଥାନୀୟ ବ୍ଳକର ବିଭିନ୍ନ ଗ୍ରାମାଂଚଳ ବାସୀ । ଏଥି ସହିତ ସଂକ୍ରମିତ ଚିହ୍ନଟ ହୋଇଥିବା ଏରିଆକୁ ନିଷିଦ୍ଧାଂଚଳ ଘୋଷଣା କରାଯାଉଛି । ଦୀର୍ଘ ୫ମାସରୁ ଉର୍ଦ୍ଧ୍ୱ ସମୟ ଧରି ବିଭିନ୍ନ ବର୍ଗର ବ୍ୟବସାୟୀଙ୍କ ଠାରୁ ଆରମ୍ଭ କରି ଖଟିଖିଆ, ଦିନ ମଜୁରିଆ ଓ ମଧ୍ୟବିତଙ୍କ ଜୀବନ ଜୀବିକା ବିଶେଷ ଭାବେ ପ୍ରଭାବିତ ହୋଇଛି । ସେମାନଙ୍କ ଆର୍ଥୀକ ସ୍ଥିତି ସମ୍ପୁର୍ଣ୍ଣ ଭାବେ ଦୋହଲି ଯାଇଛି । ତେବେ ଜୁଲାଇ ମାସ ଶେଷ ସପ୍ତାହରୁ ଗଞ୍ଜାମ ଜିଲ୍ଲା ସ୍ଥାନୀୟ ଅଂଚଳରେ ସଂକ୍ରମିତଙ୍କ ସଂଖ୍ୟା ହ୍ରାସ ପାଉଥିବାରୁ ଅଗଷ୍ଟ ପହିଲାରୁ ଅନଲକ-୩ କାର୍ଯ୍ୟକାରୀ କରାଯିବା ସହ କରୋନା କଟକଣାକୁ କିଛି ମାତ୍ରାରେ କୋହଳ କରାଯାଇଛି । ହେଲେ ପ୍ରଶାସନ ପକ୍ଷରୁ କୋଭିଡ଼ ନିୟମକୁ କଡ଼କାଡ଼ି ପାଳନ କରିବାକୁ ନିର୍ଦ୍ଦେଶନାମା ଜାରି କରାଯାଇଛି ।
ସାମାଜିକ ଦୁରତା ରକ୍ଷା, ମାସ୍କ ପରିଧାନ, ବ୍ୟବସାୟିକ ପ୍ରତିଷ୍ଠାନ ସକାଶେ ପଂଚସୂତ୍ରୀ ନିୟମ ପାଳନ କରିବା ସକାଶେ କଡ଼ା ନିର୍ଦ୍ଦେଶ ରହିଛି । ଏହାକୁ ଅମାନ୍ୟ କଲେ ଜୋରିମାନା ଆଦାୟ କରାଯିବା ସହ ଯେଉଁ ବ୍ୟବସାୟିକ ପ୍ରତିଷ୍ଠାନ ପଂଚସୂତ୍ରୀ ନିୟମ ଅବମାନନା କରେ ସଂପୃକ୍ତ ବ୍ୟବସାୟିକ ପ୍ରତିଷ୍ଠାନକୁ ଜୋରିମାନା ଆଦାୟ କରାଯିବା ସହ ୧ମାସ ସକାଶେ ସିଲ୍ କରାଯିବା ଲାଗି ଚେତାବନି ଦିଆଯାଇଛି । ଏହାର ମୁଳ ଉଦ୍ଦ୍ୟେଶ ହେଉଛି ଜନସାଧାରଣ ସର୍ତକତାମୂଳକ ପଦକ୍ଷେପ ଗ୍ରହଣ କରିବା । ହେଲେ ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ଅଂଚଳରେ ବାସ୍ତବ ଚିତ୍ର ସମ୍ପୁର୍ଣ୍ଣ ଓଲଟା ଦେଖିବାକୁ ମିଳୁଛି । ପ୍ରଶାସନିକ ଅଧିକାରୀ ମାନେ କେବଳ ଜୋରିମାନା ଆଦାୟକୁ ଗୁରୁତ୍ୱ ପ୍ରଦାନ କରୁଥିବା ବେଳେ ଅମାନିଆଙ୍କୁ ପୂର୍ବପରି ସାବାଡ଼୍ କରି ପାରୁନଥିବା ନେଇ ବୁଦ୍ଧିଜୀବିୁ ମହଲରେ ମତ ପ୍ରକାଶ ପାଇଛି । ଯାହାରି ଫଳରେ ଆମନିଆ ମାନଙ୍କ ସକାଶେ ସାଧାରଣ ନିରୀହ ଅକାରଣରେ ବଳି ପଡ଼ୁଛନ୍ତି ।
ଦୀର୍ଘ ମାସ ହେଲା ଜରିମାନା ଆଦାୟ କରାଯାଉଥିଲେ ମଧ୍ୟ, ଏହାର ମୂଳ ଉଦ୍ଦ୍ୟେଶ ସାଧିତ ହୋଇପାରୁନି । ପ୍ରତିଦିନ ହଜାର ହଜାର ଟଙ୍କା ଜରିମାନା ଆଦାୟ ସହ ରେଡ଼କ୍ରସ ରସିଦ କଟାଯାଉଛି । ପୁଲିସ ପ୍ରଶାସନ ପକ୍ଷରୁ ଯାନବାହାନ ଯାଂଚ, ହେଲମେଟ, ମାସ୍କ ପରିଧାନ କରିଡନଥିବା ବ୍ୟକ୍ତିଙ୍କ ଠାରୁ ଜୋରିମାନା ଆଦାୟ କରାଯାଉଥିବା ବେଳେ ପୌର ଓ ରାଜସ୍ୱ ବିଭାଗ ପକ୍ଷରୁ ବ୍ୟବସାୟିକ ପ୍ରତିଷ୍ଠାନ ସମ୍ମୁଖରେ ସାମାଜିକ ଦୂରତା ରକ୍ଷା ଓ ପଂଚସୂତ୍ରୀ ନିୟମ ପାଳନ କରୁନଥିବା ପ୍ରତିଷ୍ଠାନ ଠାରୁ ଜୋରିମାନା ଆଦାୟ କରାଯାଉଥିବାର ଲକ୍ଷ୍ୟ କରାଯାଉଛି । ହେଲେ ଅମାନିଆଙ୍କୁ କାବୁ କରାଯାଇ ପାରୁନି । ଏଭଳି ଦୃଶ୍ୟ ଦେଖିଲେ, କରୋନା ମହାମାରୀରୁ ଲୋକଙ୍କୁ ସଚେତନ ଓ ସୁରକ୍ଷିତ ରଖିବାକୁ ଜୋରିମାନା ଆଦାୟ କେବଳ ଏକମାତ୍ର ପନ୍ଥା କି ବୋଲି ସାଧାରଣରେ ପ୍ରଶ୍ନବାଚି ସୃଷ୍ଟି ହୋଇଛି । ବିଭିନ୍ନ ସମୟରେ ଯାଂଚ ସମୟରେ ବିଭିନ୍ନ ବ୍ୟକ୍ତିଙ୍କୁ ଅପରାଧୀଙ୍କ ଭଳି ବ୍ୟବହାର କରାଯାଉଥିବାର ଅଭିଯୋଗ ହେଉଛି ।
ସର୍ବସାଧାରଣ ସ୍ଥାନରେ ପ୍ରଶାସନିକ ଅଧିକାରୀ ମାନେ ସାଧାରଣ ଲୋକଙ୍କୁ ଗାଳି ଦେଇପାରିବେନି ବୋଲି ମାନ୍ୟବାର ଉଚ୍ଚତମ ନ୍ୟାୟଳୟ ପ୍ରକାଶ କରିଥିଲେ ମଧ୍ୟ ରାଜ୍ୟ ମୁଖିଆଙ୍କ ଗଡ଼ରେ ଉଚ୍ଚତମ ନ୍ୟାୟଳୟଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରାଯାଉନଥିବା ଅଭିଯୋଗ ହେଉଛି । ଅନ୍ୟପକ୍ଷରେ ଜୋରିମାନା ଆଦାୟ କରାଯାଉଥିବା ରସିଦରେ କେଉଁ କାରଣ ଯୋଗୁଁ ଜୋରିମାନା ଆଦାୟ କରାଯାଉଛି ଉଲ୍ଲେଖ ନକରି ରେଡ଼କ୍ରସ ରସିଦ ଦିଆଯାଉଥିବା ଅଭିଯୋଗ ହେଉଛି । ସତେଯେପରିକି ସ୍ଥାନୀୟ ପ୍ରଶାସନିକ ଅଧିକାରୀଙ୍କ ମଧ୍ୟରେ ଜୋରିମାନା ଆଦାୟର ପ୍ରତିଯୋଗିତା ଚାଲିଥିବା ପରି ମନେହେଉଛି । ଅମାନିଆଙ୍କ ପାଇଁ ସାଧାରଣ ନିରୀହ ଜନତା ଯେପରି ଅସୁବିଧାର ସମ୍ମୁଖୀନ ନହେଉ ସେଥିପ୍ରତି ପ୍ରଶାସନିକ ଅଧିକାରୀ ମାନେ ଦୃଷ୍ଟି ଦେଇ ପଦକ୍ଷେପ ଗ୍ରହଣ କରିବାକୁ ଅଂଚଳର ବୁଦ୍ଧିଜୀବି ମହଲରେ ମତ ପ୍ରକାଶ ପାଇଛି । ( ରିପୋର୍ଟ-ଶେଷଦେବ ସାହୁ )
