ଜିଲ୍ଲା ଶିଶୁ ସୁରକ୍ଷା କମିଟି ତଥା ଶିଶୁ ମାନଙ୍କ ପାଇଁ ଦିନଟିଏ କାର୍ଯ୍ୟକ୍ରମ ସମ୍ବନ୍ଧୀୟ ବୈଠକ ତଥା କର୍ମଶାଳା ଅନୁଷ୍ଠିତ

୧୯ ଜୁଲାଇ ,୨୦୨୪ (ଓଡ଼ିଶା ତାଜା ନ୍ୟୁଜ୍ ) ବାରିପଦା :-> ଜିଲ୍ଲାପାଳ, ମୟୂରଭଞ୍ଜ ଶ୍ରୀ ଦତ୍ତାତ୍ରୟ ଭାଉସାହେବ ଶିନ୍ଦେଙ୍କ ଅଧ୍ୟକ୍ଷତାରେ ଜିଲ୍ଲା ଶିଶୁ ସୁରକ୍ଷା କମିଟି ତଥା ଜିଲ୍ଲା କାର୍ଯ୍ୟକାରିଣୀ କମିଟି ପକ୍ଷରୁ A Day For Children ବା ଶିଶୁ ମାନଙ୍କ ପାଇଁ ଦିନ ଟିଏ କାର୍ଯ୍ୟକ୍ରମ ତଥା ସମ୍ବେଦନଶୀଳ କର୍ମଶାଳା ଅନୁଷ୍ଠିତ ହୋଇଯାଇଛି । ଏହି ଜିଲ୍ଲା ସ୍ତରୀୟ ବୈଠକରେ ମୟୁରଭଞ୍ଜ ଜିଲ୍ଲାପରିଷଦ ଅଧ୍ୟକ୍ଷ ଶ୍ରୀମତୀ ଭାରତୀ ହାଁସଦା ଯୋଗ ଦେଇଥିଲେ । ଶିଶୁ ମାନଙ୍କ ପ୍ରକୃତ ସୁରକ୍ଷା ସେତେବେଳେ ହୋଇପାରିବ, ଯେତେବେଳେ ସେମାନେ ଉପଯୁକ୍ତ ଶିକ୍ଷା ପ୍ରାପ୍ତ କରିବେ ଏବଂ ଶିକ୍ଷା ସହିତ ସଚେତନତାକୁ ଆଧାର କରି ଶିଶୁ ଶ୍ରମିକ, ବାଲ୍ୟବିବାହ ଭଳି କୁ-ପ୍ରଥା ଦୂର ହୋଇ ପାରିବ ବୋଲି, ଶ୍ରୀମତୀ ହାଁସଦା କହିଥିଲେ ।

ଏହି ପରିପ୍ରେକ୍ଷୀରେ ଉପସ୍ଥିତ ସମସ୍ତ ଅଧିକାରୀ ତଥା ଶିଶୁ ସୁରକ୍ଷା ବିଭାଗ ସହିତ ଜଡିତ ଥିବା ସମସ୍ତ ବେସରକାରୀ ଅନୁଷ୍ଠାନ ଗୁଡିକର କର୍ମକର୍ତ୍ତାଙ୍କୁ ଜିଲ୍ଲା ଶିଶୁ ସୁରକ୍ଷାଧିକାରିଣୀ ଶ୍ରୀମତୀ ମମତାମୟୀ ବିଶ୍ୱାଳ ଙ୍କ ଦ୍ୱାରା ବିବରଣୀ ବିସ୍ତୃତ ଭାବରେ ଆଲୋଚନା କରାଯାଇଥିଲା । ସୂଚନା ଅନୁସାରେ, ୧୧ଟି ଅନୁଷ୍ଠାନିକ ଶିଶୁ ଯତ୍ନ କେନ୍ଦ୍ର ଥିବା ବେଳେ ଏଥିରେ ୫୨୫ ଜଣ ଶିଶୁଙ୍କର ଯତ୍ନ ନିଆଯାଉଛି ଏବଂ ସେମାନଙ୍କ ଆବଶ୍ୟକୀୟ ପାଠପଢା ପାଇଁ ସମସ୍ତ ପ୍ରକାର ବ୍ୟବସ୍ଥା ମଧ୍ୟ କରାଯାଉଛି । ଜିଲ୍ଲାରେ ଥିବା ୪୦୪ ପଂଚାୟତ ଏବଂ ୨୬ଟି ବ୍ଲକରେ ଶିଶୁ ମାନଙ୍କ ସୁରକ୍ଷା ପାଇଁ ସମସ୍ତ ଯୋଜନା କାର୍ଯ୍ୟକାରୀ ହେଉଛି । ବିଶେଷ କରି ମୟୂରଭଂଜ ଜିଲ୍ଲାର ୫୨୮ ଟି ଗ୍ରାମ ଏହି ଅଭିଯାନ ଦ୍ୱାରା ବାଲ୍ୟବିବାହ ମୁକ୍ତ ହୋଇଛି ।

ସମସ୍ତ ତଥ୍ୟକୁ ଗୁରୁତ୍ୱର ସହିତ ଆଲୋଚନା ଏବଂ ପର୍ଯ୍ୟାଲୋଚନା କରିବା ସହିତ ଜିଲ୍ଲାପାଳ ଶ୍ରୀ ଶିନ୍ଧେ ସମସ୍ତ ବିଭାଗୀୟ ଅଧିକାରୀଙ୍କୁ ଏହି ବିଷୟ ପ୍ରତି ଯଥେଷ୍ଟ ସମ୍ବେଦନଶୀଳ ଭାବରେ ଗୁରୁତ୍ୱର ସହିତ କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଥିଲେ । ଜିଲ୍ଲାପାଳ ଏହି ପରିପ୍ରେକ୍ଷୀରେ ପରାମର୍ଶ ଦେବାକୁ ଯାଇ କହିଥିଲେଯେ, ସମସ୍ତ ଶିକ୍ଷାନୁଷ୍ଠାନ ମାନଙ୍କରେ ଏହି ବିଷୟ ପ୍ରତି ସଚେତନତା ବାର୍ତା ପ୍ରଚାର କରିବା, ପିତୃମାତୃହୀନ ଶିଶୁ ମାନଙ୍କ ପାଇଁ ଉନ୍ନତ ଜୀବନ ଶୈଳୀର ମାନଦଣ୍ଡ, ସେମାନଙ୍କ ସ୍ୱାସ୍ଥ୍ୟ ଏବଂ ଚରିତ୍ର ଗଠନ ପ୍ରତି ଯତ୍ନବାନ ହେବ ଆବଶ୍ୟକ । ଯେଉଁ ଶିଶୁମାନେ ପ୍ରଶାସନ ଦ୍ୱାରା ସମସ୍ତ ସୁବିଧା ପାଉଛନ୍ତି ସେମାନଙ୍କର ସେହି ଯୋଜନା ଅନ୍ତର୍ଗତ ଉନ୍ନତିମୂଳକ ପ୍ରଗତି-ପତ୍ର ଉପସ୍ଥାପନା କରାଯିବ । ଶିଶୁ ମାନଙ୍କ ବିରୋଧରେ ହେଉଥିବା ସାଇବର ଅପରାଧ ଦିନକୁ ଦିନ ବଢ଼ିବାରେ ଲାଗିଛି, ଏବଂ ଏହି ସମସ୍ତ କାର୍ଯ୍ୟକଳାପକୁ ତୁରନ୍ତ ରୋକିବା ପାଇଁ ପୋଲିସ ବିଭାଗକୁ ନିର୍ଦ୍ଦେଶ ଦେଇଥିଲେ ।

ପ୍ରତ୍ୟେକ ପଂଚାୟତରେ ବାଳିକା ପଂଚାୟତ ସ୍ଥାପନ କରିବା ଏବଂ ଏହି ଶିଶୁ ମାନଙ୍କର ଜୀବନଚର୍ଯ୍ୟା ତଥା ଜୀବନଶୈଳୀରେ ପ୍ରଗତି ସଂକଳନ କରି ଏହାକୁ କିଭଳି ତ୍ୱରାନ୍ୱିତ କରିହେବ ସେ ବିଷୟରେ ଜିଲ୍ଲାପାଳ ଗୁରୁତ୍ୱାରୋପ କରିଥିଲେ । ଯେଉଁ ଶିଶୁ ମାନେ ଶିଶୁ ଶ୍ରମିକ ଭାବେ କାର୍ଯ୍ୟ କରୁଥିଲେ ଏବଂ ପ୍ରଶାସନର ଔପଚାରିକତା ପରେ ସେମାନେ ସାଧାରଣ ଜୀବନ ଅତିବାହିତ କରୁଛନ୍ତି, ସେମାନଙ୍କର ଜୀବନଶୈଳୀରେ ଆଉ କିଭଳି ଉନ୍ନତି ହୋଇପାରିବ ସେଥିପାଇଁ କାର୍ଯ୍ୟ କରିବା ଆବଶ୍ୟକ ବୋଲି ଜିଲ୍ଲାପାଳ ପରାମର୍ଶ ଦେଇଥିଲେ । ଉକ୍ତ କାର୍ଯ୍ୟକ୍ରମର ସଂଯୋଜନା ଜିଲ୍ଲା ଶ୍ରମ ଅଧିକାରୀ ଶ୍ରୀ ଅନନ୍ତ ପଦ୍ମନାଭ ମହାମାନସିଂ କରିଥିବା ବେଳେ, ଅତିରିକ୍ତ ଜିଲ୍ଲା ଆରକ୍ଷୀ ଅଧିକ୍ଷକ, ଶ୍ରୀ ଉମେଶ ଚନ୍ଦ୍ର ପଣ୍ଡା, ଜିଲ୍ଲା ଶିକ୍ଷାଧିକାରୀ ଶ୍ରୀ ପୂର୍ଣଚନ୍ଦ୍ର ସେଠି, ଜିଲ୍ଲା ରୋଜଗାର ଅଧିକାରୀ, ଶ୍ରୀ ଆଶିଷ ବସନ୍ତିଆ, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ଶ୍ରୀ ଅବିନାଶ ପାଣି, ସମସ୍ତ ଶିଶୁ ସୁରକ୍ଷା ପ୍ରସଙ୍ଗରେ କାର୍ଯ୍ୟ କରୁଥିବା ପ୍ରମୁଖ ବେସରକାରୀ ସଂସ୍ଥାର କର୍ମକର୍ତା ଯୋଗ ଦେଇଥିଲେ ।

ବାରିପଦାରୁ -ଗୌର ଦାସଗିରି