No Result
View All Result
୧୯ ଜୁଲାଇ ,୨୦୨୪ (ଓଡ଼ିଶା ତାଜା ନ୍ୟୁଜ୍ ) ପୁରୀ :-> ବାହୁଡାଯାତ୍ରାରେ ତିନିରଥ ସିଂହଦ୍ଵାରକୁ ଫେରିଛନ୍ତି । ବୁଧବାର ଦିନ ରଥ ଉପରେ ଚତୁର୍ଦ୍ଧାବିଗ୍ରହଙ୍କ ସୁନାବେଶ ଅନୁଷ୍ଠିତ ହୋଇଥିଲା । ପ୍ରାୟ ୧୮ ଲକ୍ଷ ଶ୍ରଦ୍ଧାଳୁ ସୁନାବେଶ ଦର୍ଶନ କରିଥିଲେ ଗୁରୁବାର ଦିନ ସଂଧ୍ଯା ଧୂପ ପରେ ରଥ ଉପରେ ଅଧରପଣା ପୂଜା ନୀତି ଅନୁଷ୍ଠିତ ହୋଇଥିଲା । ଅଧରଚୁମ୍ବୀ ମାଟି ହାଣ୍ଡି ତିନୋଟି ଲେଖାଁଏ ଶ୍ରୀଜୀଉଙ୍କ ସମ୍ମୁଖରେ ରଖାଯାଇଥିଲା ।
![](https://odishatazanews.com/wp-content/uploads/2024/07/pur-2-222x300.jpg)
ବଡ ପିତଳ କୁଣ୍ଡ ଛାଉଣୀ ମଠ କୁଅରୁ ପାଣି ଆଣି ରଖାଯିବା ପରେ ସେଥିରେ ଖୀର,ସର,ଛେନା, କଦଳୀ, ଗୋଲମରିଚ ଗୁଣ୍ଡ, କର୍ପୂର ଓ ଜାଇଫଳ ମିଶ୍ରଣ ହୋଇ ପଣା ପ୍ରସ୍ତୁତି ହୋଇଥିଲା । ସେହି ପଣା ତିନୋଟି ହାଣ୍ଡିରେ ପୂର୍ଣ୍ଣ କରାଯାଇଥିଲା । ଏହି ନୀତିକୁ ପତ୍ରିବଡୁ, ସୁଆରବଡୁ, ଗରାବଡୁ ଓ ପାଳିଆ ସେବକ ମାନେ ପଣା ପ୍ରସ୍ତୁତି କରିଥିଲେ ।
![](https://odishatazanews.com/wp-content/uploads/2024/07/pur-3-300x224.jpg)
ରାଘବଦାସ ମଠ, ବଡ ଓଡ଼ିଆ ମଠ ଓ ଶ୍ରୀମନ୍ଦିର ପ୍ରଶାସନ ପଣା ପାଇଁ ଆବଶ୍ୟକ ସାମଗ୍ରୀ ଯୋଗାଇଥିଲେ । ପାଳିଆ ପୂଜାପଣ୍ଡା ପଞ୍ଚଉପଚାର ମନ୍ତ୍ରରେ ପୂଜା କରିଥିଲେ । ପୂଜା ପରେ ତିନିରଥରରେ ଅଧରପଣା ହାଣ୍ଡି ଭଙ୍ଗା ଯାଇଥିଲା । ରଥ ଉପରୁ ପଣା ବୋହି ଯିବା ପରେ ରଥ ଚାରି ପାର୍ଶ୍ବରେ ଥିବା ପାର୍ଶ୍ବ ଦେବାଦେବୀ ଚଣ୍ଡୀ ଚାମୁଣ୍ଡା ଓ ଅଶରୀରୀର ମାନେ ପଣା ପାଇ ପ୍ରୀତ ହୋଇଥିଲେ ।
![](https://odishatazanews.com/wp-content/uploads/2024/07/pur-4-300x231.jpg)
ଏହି ଅଧରପଣା ନୀତି ଓ ମହାପ୍ରଭୁଙ୍କୁ ଦର୍ଶନ କରିବା ପାଇଁ ପ୍ରାୟ ୪ ଲକ୍ଷ ଭକ୍ତ ଓ ଶ୍ରଦ୍ଧାଳୁ ସିଂହଦ୍ଵାର ଠାରେ ଏକତ୍ରୀତ ହୋଇଥିଲେ । ହରିବୋଲ ହୁଳହୁଳି ଓ ଜୟ ଜଗନ୍ନାଥ ଧ୍ବନିରେ ପ୍ରକମ୍ପିତ ହୋଇଥିଲା ସିଂହଦ୍ଵାର ସମେତ ବଡଦାଣ୍ଡ ।
(ଦେବୀ ପ୍ରସନ୍ନ ଗାଙ୍ଗୁଲି, ଫଟୋ ସାମ୍ବାଦିକ, ପୁରୀ)
![](https://odishatazanews.com/wp-content/uploads/2024/05/Odisha-Tazanews-puribijay-ku-mishra-1-194x300-194x300.jpg)
![](https://odishatazanews.com/wp-content/uploads/2024/07/odishatazanews-bbsr-4-300x187-300x187.jpg)
No Result
View All Result