ରଥଯାତ୍ରାରେ ଭକ୍ତ କଲବଲ : ଖରା ବର୍ଷାରେ ବଡଦାଣ୍ଡରେ ଶୋଇଲେ ଶ୍ରଦ୍ଧାଳୁ

୧୯ ଜୁଲାଇ ,୨୦୨୪ (ଓଡ଼ିଶା ତାଜା ନ୍ୟୁଜ୍ ) ପୁରୀ :-> ବିଶ୍ବପ୍ରସିଦ୍ଧ ରଥଯାତ୍ରା ଶେଷ ହୋଇଛି । ନବଦିନାତ୍ମକ ଯାତ୍ରାରେ ପ୍ରାୟ ୬୦ ଲକ୍ଷ ପୁରୀକୁ ଆସିଛନ୍ତି । ପ୍ରାୟ ୨ ଶହ ୫୦ କୋଟି ଟଙ୍କାର ବେପାର ହୋଇଛି । ରାଜ୍ଯ ସରକାରଙ୍କ ପକ୍ଷରୁ କୋଟି କୋଟି ଟଙ୍କା ଖର୍ଚ୍ଚ ହୋଇଛି । ଏସବୁ ସତ୍ତ୍ବେ ରଥଯାତ୍ରୀ ମାନେ ବିଭିନ୍ନ ଉପାୟରେ କଲବଲ ହୋଇଛନ୍ତି । ପୂର୍ବରୁ ଶ୍ରୀମନ୍ଦିର ଚାରିପଟେ ମଠ,ହୋଟେଲ, ଲଜିଂ ଓ ବାସଗୃହ ଥିଲାବେଳେ ହଜାର ଶ୍ରଦ୍ଧାଳୁ ବର୍ଷା ହେଲେ ଆଶ୍ରୟ ନେଉଥିଲେ ।ଚଳିତବର୍ଷ ଲକ୍ଷାଧିକ ଭକ୍ତ ଆସିଥିବା ବେଳେ ସହର ବିଭିନ୍ନ ସ୍ଥାନରେ ଶୋଇପଡିଥିବା ଦେଖିବାକୁ ମିଳିଥିଲା । ବର୍ଷାରେ ଓଦା ହୋଇ ଭକ୍ତ ପ୍ରଭୁଙ୍କୁ ଦର୍ଶନ କରି ଫେରିଛନ୍ତି ।

ରେଲବାଇ ବିଭାଗ ପକ୍ଷରୁ ଷ୍ଟେସନ ନିକଟରେ ୧୫ ହଜାର ଭକ୍ତ ରହିବା ପାଇଁ ରହଣି ସ୍ଥଳ ହୋଇଥିଲା । ୨୦୧୫ ନବକଳେବର ସମୟରେ ଭକ୍ତ ରହଣି ସ୍ଥଳ ଯେପରି ହୋଇଥିଲା ସେହିପରି ପ୍ରତିବର୍ଷ ରଥଯାତ୍ରା ସମୟରେ ସହରର ବିଭିନ୍ନ ସ୍ଥାନରେ ରହଣି ସ୍ଥଳ ଓ ମାଗଣା ଖାଦ୍ଯ ବଣ୍ଟନ ବ୍ୟବସ୍ଥା କରିବା ପାଇଁ ଭକ୍ତ ମହଲରେ ଦାବି ହୋଇଛି । ଖୋଦ ଜିଲ୍ଲାପାଳଙ୍କ କାର୍ଯ୍ଯାଳୟ ହତାରେ ଶହ ଶହ ଶ୍ରଦ୍ଧାଳୁ ସୁନାବେଶ ଦିନ ଜରି ପାଲ ପକାଇ ଶୋଇଥିବା ଦେଖିବାକୁ ମିଳିଥିଲା ।

ପ୍ରଶାସନ ପକ୍ଷରୁ ଦୁଇ ତିନି ଚାରିଚକିଆ ମାଗଣା ପାର୍କିଂ ସ୍ଥଳ ନଥିବାରୁ ବାଇକ ପ୍ରତି ୧୦୦ ଟଙ୍କା, ଅଟୋରିକ୍ସା ପ୍ରତି ୨୦୦ ଟଙ୍କା ଓ କାର ପିଛା ୪୦୦ ଟଙ୍କା ବେଆଇନ ପାର୍କିଂ ଫି ଆଦାୟ ହୋଇଥିବା ଅଭିଯୋଗ ହୋଇଛି । ଭକ୍ତପ୍ରିୟ ଜନପ୍ରିୟ ନୁଆ ସରକାର ଭକ୍ତଙ୍କ ସୁବିଧା ପାଇଁ ପଦକ୍ଷେପ ନେବାକୁ ଦାବି ହେଉଛି । ବଡଦାଣ୍ଡ ସଂଲଗ୍ନ ସାହି ବାଟ ସିଲ ହୋଇଥିବା ବେଳେ ବିଭିନ୍ନ ସାହିରେ ଅଟୋ ଓ ବାଳକ ଯୋଗୁ ଜାମ ପରିସ୍ଥିତି ସୃଷ୍ଟି ହୋଇଥିଲା । ଜିଲ୍ଲା ଗ୍ରାମ୍ଯ ଜଳ ଯୋଗାଣ ବିଭାଗ ପକ୍ଷରୁ ୫୦ଲକ୍ଷ ପାଣି ବୋତଲ ଆସିଥିବା ବେଳେ ତାହା ସଠିକ ବଣ୍ଟନ ହୋଇନପାରି କାର୍ଯ୍ଯାଳୟ ପରିସରେ ଗଦା ହୋଇଥିବା ଅଭିଯୋଗ ହୋଇଛି ।

ରଥଯାତ୍ରା ପରେ ଏହା ବିକ୍ରୀ ପାଇଁ ମସୁଧା ଚାଲିଥିବା ଶୁଣା ଯାଉଛି । ବଡଦାଣ୍ଡ ସଂଲଗ୍ନ ଅସ୍ଥାୟୀ ଶୌଚାଳୟ ଓ ପରିସ୍ରାଗାର ନଥିବାରୁ ଭକ୍ତମାନେ ଘୋର ଅସୁବିଧାର ସମ୍ମୁଖୀନ ହୋଇଛନ୍ତି । ରଥଯାତ୍ରା ସମୟରେ ବିଜୁଳି ବିଭାଗର ଲୁଚୁକାଳି ଖେଳ ସହରବାସୀଙ୍କୁ ଅସୁବିଧାରେ ପକାଇଛି । ହଜାର ହଜାର ମୋବାଇଲ, ସୁନାଚେନ ଚୋରି ହୋଇଥିଲେ ମଧ୍ଯ ସିସିଟିଭି କାହାରିକୁ ଧରି ପାରିନଥିବା କୁହାଯାଉଛି । ପୌରସଂସ୍ଥା ପକ୍ଷରୁ ପରିମଳ ବ୍ଯବସ୍ଥା ସୁଧୁରି ନଥିବା ଅଭିଯୋଗ ହୋଇଛି ।

ପୁରୀ ରେଲୱେ ଷ୍ଟେସନ ନିକଟରେ ଟ୍ରକ ଟ୍ରକ ପଲିଥିନ ଓ ଅଳିଆ ପଡି ରହିଥିବି ଦେଖିବାକୁ ମିଳିଛି । ରଥଯାତ୍ରା ସମନ୍ଵୟ ବୈଠକରେ ଖାଦ୍ଯ ଯାଞ୍ଚ ନିଷ୍ପତ୍ତି କାର୍ଯ୍ୟକାରୀ ହୋଇପାରି ନାହିଁ । ବାସିଖାଦ୍ଯ,ଅପମିଶ୍ରିତ ଖାଦ୍ଯ, ରଙ୍ଗ ମିଶ୍ରିତ ଖାଦ୍ଯ ଯାଞ୍ଚ ନକରିବା ସହ ମୋବାଇଲ କୋର୍ଟ ଜରିଆରେ ଜୋରିମାନା କରି ନଥିବା ଅଭିଯୋଗ ହୋଇଛି । ବିଭିନ୍ନ ହୋଟେଲ ଓ ଲଜିଂରେ ପ୍ୟାକେଜ ଅନୁସାରେ ରୁମ ରେଟ ଅଧିକ ହୋଇଥିବାରୁ ଅନେକ ଭକ୍ତ ଖରା ବର୍ଷାରେ ବଡଦାଣ୍ଡ ସମେତ ସହର ବିଭିନ୍ନ ସାହି ଗଳିରେ ଭକ୍ତ ଶୋଇ ରହିଥିବା ଦେଖିବାକୁ ମିଳିଥିଲା ।

ବିଭିନ୍ନ ମଦ ଦୋକାନ ବନ୍ଦ ହୋଇଥିଲେ ମଧ୍ଯ ଚୋରାରେ ଅଧିକ ଦାମରେ ମଦ ବିକ୍ରୀ ହୋଇଥିବା କୁହାଯାଇଛି । ସାହିକୁ ବାଇକ ନେଇ ଯିବା ପାଇଁ ଆଧାର କାର୍ଡ ପୋଲିସ ଖୋଜିଥିଲା । ପୋଲିସ ଜୁଲମ ବଢିଥିବା ଅଭିଯୋଗ ହୋଇଛି । ବଡଦାଣ୍ଡ ସିଲ ଥିବାବେଳେ ସୁନାବେଶ ଦିନ ଶହ ଶହ ବାଇକ ଗହଳି ଭିତରେ ବୁଲୁଥିବା ଦେଖିବାକୁ ମିଳିଥିଲା । ବିଭିନ୍ନ ଅନୁଷ୍ଠାନ ଓ ସଂଗଠନକୁ ଦିଆଯାଇଥିବା ଅନୁମତି ପତ୍ର ଗୁଣ୍ଡିଚା,ବାହୁଡା ଓ ସୁନାବେଶ ଦିନ ଅଭିଯୋଗ ହୋଇଛି ।