ବେଗୁନିଆରେ ଜାନକୀବଲ୍ଲଭଙ୍କୁ ଶ୍ରଦ୍ଧାଞ୍ଜଳି

୨୧ ଏପ୍ରିଲ, ୨୦୨୪ (ଓଡ଼ିଶା ତାଜା ନ୍ୟୁଜ୍ ) ବେଗୁନିଆ  :->  ବେଗୁନିଆ ଜାନକୀବଲ୍ଳଭ ସ୍ମୃତି ସଂସଦ ଆନୁକୂଲ୍ୟରେ ସ୍ଥାନୀୟ ଆଦର୍ଶ କ୍ଲବ ପରିସରରେ ରବିବାର ପୂର୍ବାହ୍ନରେ ଓଡିଶାର ପୂର୍ବତନ ମୁଖ୍ୟମନ୍ତ୍ରୀ ତଥା ଆସାମର ରାଜ୍ୟପାଳ ସ୍ବର୍ଗତ ଜାନକୀବଲ୍ଲଭ ପଟ୍ଟନାୟକଙ୍କ ନବମ ଶ୍ରାଦ୍ଧବାର୍ଷିକୀ ପାଳିତ ହୋଇଯାଇଛି । ଏଥିରେ ସ୍ମୃତି ସଂସଦର ସଭାପତି ତଥା ସିମୋର ଗ୍ରାମ ପଞ୍ଚାୟତର ସରପଞ୍ଚ ହାଡୁବନ୍ଧୁ ମହାପାତ୍ର ପୌରୋହିତ୍ୟ କରିଥିଲେ ।

ପ୍ରାରମ୍ଭରେ ସ୍ବର୍ଗତ ପଟ୍ଟନାୟକଙ୍କ ଫୋଟଚିତ୍ରରେ ମାଲ୍ୟାର୍ପଣ ସହ ଶ୍ରଦ୍ଧା କୁସୁମ ଅର୍ପଣ କରାଯାଇଥିଲା । ପରେ ପଣ୍ଡିତ ବିନୋଦ ଦାଶ ବେଦପାଠ କରିଥିଲେ ଓ ଶିକ୍ଷୟିତ୍ରୀ ପ୍ରତିମା ପ୍ରଧାନ ଶ୍ରଦ୍ଧାଞ୍ଜଳି ସଙ୍ଗୀତ ଗାନ କରିଥିଲେ । କାର୍ଯ୍ୟକ୍ରମ ଆବାହକ ପ୍ରଫେସର ରବୀନ୍ଦ୍ର ନାଥ ପାଣିଗ୍ରାହୀ କାର୍ଯ୍ୟକ୍ରମ ସମ୍ବନ୍ଧୀୟ ସୂଚନା ଦେବାସହ ସ୍ବର୍ଗତ ପଟ୍ଟନାୟକଙ୍କ ନିଜ କର୍ମଭୂମି ବେଗୁନିଆ ବୋଲଗଡ ପ୍ରତି ଥିବା ଅତୁଳନୀୟ  ଅବଦାନର ଅବତାରଣା କରିଥିଲେ ।

ଏହି ଅବସରରେ ଅବସରପ୍ରାପ୍ତ ପ୍ରଶାସନିକ ଅଧିକାରୀ ସୁଧାକର ସାମନ୍ତରାୟ , ଗାୟକ ପ୍ରଦୀପ କିଶୋର ତ୍ରିପାଠୀ,ସମାଜସେବୀ ବ୍ରଜବନ୍ଧୁ ପଣ୍ଡା , ପ୍ରଶାନ୍ତ କୁମାର ବାରିକ, ମଧୁସୂଦନ ସୁବୁଦ୍ଧି , ଅଶ୍ବିନୀ କୁମାର ପଟ୍ଟନାୟକ, ଲକ୍ଷ୍ମୀଧର ମହାରଣା, କୈଳାସ ଚନ୍ଦ୍ର ପଟ୍ଟନାୟକ, ହରେକୃଷ୍ଣ ଦଳାଇ, ବିଜୟ ମହାନ୍ତି, ବସନ୍ତ କୁମାର ଦାସ, ରାମଚନ୍ଦ୍ର ସାହୁ, କୈଳାସ ଚନ୍ଦ୍ର ସାହୁ ଓ କାଳୁଚରଣ ନାୟକ ପ୍ରମୁଖ ବହୁ ଜାନକୀପ୍ରେମୀ ଏକତ୍ରିତ ହୋଇ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ । ଶେଷରେ ଆଦର୍ଶ କ୍ଲବର ବରିଷ୍ଠ ସଭ୍ୟ ଲକ୍ଷ୍ମୀକାନ୍ତ ମହାପାତ୍ର ଧନ୍ୟବାଦ ଅର୍ପଣ କରିଥିଲେ ।