ଓଡିଶା ତାଜା ନ୍ୟୁଜ୍ (୨୯ ଜୁଲାଇ ବୁଧବାର ) ହିଞ୍ଜିଳିକାଟୁ :- ରକ୍ଷାବନ୍ଧନ ଉତ୍ସବକୁ ବାକି ରହିଛି ଆଉ ମାତ୍ର ୫ ଦିନ । ପୂର୍ବ ବର୍ଷ ଗୁଡ଼ିକରେ ଏଭଳି ସମୟରେ ସ୍ଥାନୀୟ ପୌରାଂଚଳ ସମେତ ନିକଟବର୍ତି ଗ୍ରାମାଂଚଳ ଗୁଡ଼ିକରେ ଗଢି ଉଠିଥାନ୍ତା ବହୁ ଅସ୍ଥାୟୀ ରାଖୀର ଭଣ୍ଡାର । ସହରାଂଚଳ ଠାରୁ ଆରମ୍ଭ କରି ଗ୍ରାମାଂଚଳର ବିଭିନ୍ନ ମୁଖ୍ୟ ରାସ୍ତା ସମେତ ଛକ, ବଜାର ଓ ବିଭିନ୍ନ ସାହି ବସ୍ତିରେ ଭଳିକି ଭଳି ରାଖିର ପସରା ମେଲି ବସି ପଡ଼ନ୍ତେଣି ବହୁ ସିଜନ ବ୍ୟବସାୟୀ । ହେଲେ ଚଳିତ ବର୍ଷ କରୋନା କଟକଣା ଯୋଗୁଁ ରାଖୀ ଭଣ୍ଡାର ଦେଖିବାକୁ ମିଳିନି । କାଁ ଭାଁ କେତେକ ଗ୍ରାମାଂଚଳର ତେଜରାତି ଦୋକାନ ଗୁଡ଼ିକରେ ପୂର୍ବ ବର୍ଷର ବଳକା ରହି ଯାଇଥିବା ରାଖୀକୁ ରଖି ବିକ୍ରି କରିବାକୁ ଅନାଇ ବସିଥିବା ବେଳେ ଗ୍ରାହକ ଆସୁନଥିବା ନେଇ ରାଖିକୁ ମହଜୁଦ ରଖିଥିବା କିଛି ବ୍ୟବସାୟୀ କହିଛନ୍ତି ।
ଗତ ବର୍ଷ ବେପାର ଭଲ ଥିଲା । ବେଶ ଦୁଇ ପଇସା ଲାଭ ମିଳିଥିଲା । ହେଲେ ଚଳିତ ବର୍ଷ ରକ୍ଷାବନ୍ଧନ ଉତ୍ସବକୁ ଆଉ ମାତ୍ର ୫ ଦିନ ବାକି ରହିଥିବା ବେଳେ ଚଳିତ ବର୍ଷ କିପରି ବ୍ୟବସାୟ ହେବ, ପ୍ରଶାସନ ପକ୍ଷରୁ ରାଖୀ ବିକ୍ରି କରିବା ସକାଶେ ଅନୁମତି ମିଳିବ କି ନାହିଁ ଚିନ୍ତାରେ ରହିଛନ୍ତି ବହୁ ରାଖୀ ବ୍ରବସାୟୀ । ଏପରିକି ପୂର୍ବ ବର୍ଷର ବଳକା ରହି ଯାଇଥିବା ଷ୍ଟକ ରାଖୀର ବିକ୍ରି ହୋଇ ପାରିବ କି ନାହିଁ, ତାହାକୁ ନେଇ ଚିନ୍ତାରେ ରହିଛନ୍ତି । ହିଞ୍ଜିଳିକାଟୁ ସହରର ବଡ଼ ବଡ଼ ହୋଲସେଲ ରାଖୀ ବ୍ୟବସାୟୀ ମାନେ ଦିଲ୍ଲୀ, ମୁମ୍ବାଇ, ଅହମଦାବାଦରୁ ରାଖୀ ଆଣି ବିକ୍ରି କରିଥାନ୍ତି । ଜାନୁୟାରୀ ଓ ଫେବୃୟାରୀ ମାସରେ ସ୍ଥାନୀୟ ଅଂଚଳର ବହୁ ହୋଲସେଲ ରାଖୀ ବ୍ୟବସାୟୀ ହାତ ତିଆରି ରାଖୀ ପାଇଁ ଆଗୁଆ ଅର୍ଡ଼ର ଦେଇ ସାରିଥିଲେ । ସୂତା, ନାଇଲନ, ଷ୍ଟୋନ, ଚେନ୍, ବ୍ରେସଲେଟ, ଦଉଡ଼ି ଓ କାଠ ଖଣ୍ଡରେ ନିର୍ମିତ ସମେତ ଫେନ୍ସି ଓ ବିଭିନ୍ନ ରକମର ରାଖୀକୁ ନେଇ ଆରମ୍ଭ ହୋଇ ସାରନ୍ତାଣି ରାଖୀର ଅପୂର୍ବ ଭଣ୍ଡାର ।
ରାଖୀର ଦାମ ସାଧାରଣତଃ ୧୦ଟଙ୍କାରୁ ଆରମ୍ଭ ହୋଇ ୨ଶହ ଟଙ୍କା ପର୍ଯ୍ୟନ୍ତ ଦାମ୍ର ରାଖୀ ବିକ୍ରି କରାଯାଉଥିଲା । ହେଲେ ଚଳିତ ବର୍ଷ ମହାମାରୀ କରୋନା ଭୁତାଣୁ ସଂକ୍ରମଣର ମୁକାବିଲା କରିବା ଲାଗି ପ୍ରଶାସନ ପକ୍ଷରୁ ଲକଡ଼ାଉନ, ସଟଡ଼ାଉନ, ୧୪୪, ଜନତାକର୍ଫ୍ୟୁ, କଂଟେନମେଂଟ, ବଫରଜୋନ ସମେତ ବହୁ କଟକଣା ଜାରି କରାଯାଇଛି । ପ୍ରଶାସନର ବିଭିନ୍ନ କଟକଣା ଓ କରୋନା ସଂକ୍ରମଣ ଭୟରେ ଲୋକେ ଘରୁ ବାହାରକୁ ବାହାରୁନାହାନ୍ତି । ବେପାର ହେବ କେମିତି, ବ୍ୟବସାୟ ସମ୍ପୁର୍ଣ୍ଣ ଠପ୍ ହୋଇଯାଇଛି । ରାଖୀପୁର୍ଣ୍ଣିମାର ୨/୩ ଦିନ ପୂର୍ବରୁ ବ୍ୟବସାୟ କରିବା ଲାଗି ପ୍ରଶାସନ ପକ୍ଷରୁ ଅନୁମତି ପ୍ରଦାନ କରାଗଲେ କିଛି ଟା ଉପକୃତ ହୋଇ ପାରିଥାନ୍ତେ ବୋଲି ସ୍ଥାନୀୟ ଅଂଚଳର ବହୁ ହୋଲସେଲ ରାଖୀ ବ୍ୟବସାୟୀ କହିଛନ୍ତି । ହିଞ୍ଜିଳିକାଟୁ – (ଶେଷଦେବ ସାହୁ)
