ଭୁୁବନେଶ୍ୱର (ଓଡିଶା ତାଜା ନିଉଜ୍) – ଭୁବନେଶ୍ୱର, ଆଜି ସନ୍ଧ୍ୟାରେ ସ୍ଥାନୀୟ ଜନତା ମଇଦାନଠାରେ ହସ୍ତତନ୍ତ, ବୟନ ଓ ହସ୍ତଶିଳ୍ପ ମନ୍ତ୍ରୀ ଶ୍ରୀମତୀ ପ୍ରଦ୍ମିନୀ ଦିଆନ ଆନୁଷ୍ଠାନିକ ଭାବେ ପ୍ରଦୀପ ପ୍ରଜ୍ୱଳନ କରି ଚତୁର୍ଦ୍ଦଶ ତୋଷାଳି ଜାତୀୟ ହସ୍ତଶିଳ୍ପ ମେଳା-୨୦୧୯କୁ ଉଦ୍ଘାଟନ କରିଛନ୍ତି । ମନ୍ତ୍ରୀ ଶ୍ରୀମତୀ ଦିଆନ୍ ଥିମ୍ ପାଭିଲିୟନ୍ ଉଦ୍ଘାଟନ କରିବା ପରେ ମେଳାରେ ପ୍ରଦର୍ଶିତ ଷ୍ଟଲ୍ଗୁଡ଼ିକୁ ବୁଲି ଦେଖିବା ସହ କାରିଗର ଓ ଶିଳ୍ପୀମାନଙ୍କ ସହିତ ଭାବବିନିମୟ କରିଥିଲେ । ଚଳିତ ବର୍ଷ ଏହି ମେଳାରେ ଉଭୟ ହସ୍ତଶିଳ୍ପ ଓ ହସ୍ତତନ୍ତ ନିର୍ମିତ ୩୮୦ ଗୋଟି ପ୍ରଦର୍ଶନ କକ୍ଷ ନିର୍ମାଣ କରାଯାଇଛି । ସେଥି ମଧ୍ୟରୁ ବିଭିନ୍ନ ପ୍ରଦେଶର ୫୦ ଜଣ ବୁଣାକାର ବିକାଶ ଆୟୁକ୍ତ (ହସ୍ତତନ୍ତ) ଭାରତ ସରକାରଙ୍କ ଦ୍ୱାରା ପ୍ରୟୋଜିତ ହୋଇଥିବା ସହିତ ରାଜ୍ୟ ପ୍ରାୟ ୧୫୦ ଜଣ ହସ୍ତଶିଳ୍ପ କାରିଗର ଓ ୮୦ ଜଣ ବୁଣାକାର ଏହି ମେଳାରେ ଅଂଶଗ୍ରହଣ କରିଛନ୍ତି । ସେହିପରି ରାଜ୍ୟରେ ହସ୍ତଶିଳ୍ପ ଓ ହସ୍ତତନ୍ତ କ୍ଷେତ୍ରରେ କାର୍ଯ୍ୟରତ ୧୨ଟି ଅନୁଷ୍ଠାନକୁ ସେମାନଙ୍କର କାର୍ଯ୍ୟାବଳୀର ପ୍ରଦର୍ଶନ କରିବାର ସୁଯୋଗ ଦିଆଯାଇଛି । ପ୍ରତିବର୍ଷ ପରି ୨୦୧୮ ବର୍ଷ ପାଇଁ ଗୋଟିଏ ଜୀବନବ୍ୟାପୀ ସଫଳ ପୁରସ୍କାର ଓ ୧ ଲକ୍ଷ ଟଙ୍କାର ଅର୍ଥରାଶି ହସ୍ତଶିଳ୍ପୀ ଶ୍ରୀ ବନମାଳୀ ମହାପାତ୍ରଙ୍କୁ ପ୍ରଦାନ କରାଯାଇଛି । ସେହିପରି ୩ଟି ରାଜ୍ୟ ହସ୍ତଶିଳ୍ପ ପୁରସ୍କାର ଓ ୮ ଜଣ ହସ୍ତଶିଳ୍ପୀଙ୍କୁ ସ୍ୱତନ୍ତ୍ର ସ୍ୱୀକୃତି ଭାବେ କଳାକୃତି ସମ୍ମାନ ପ୍ରଦାନ କରାଯାଇଛି । ଚଳିତ ବର୍ଷର ଥିମ୍ ପାଭିଲିୟନ୍ ‘କଳିଙ୍ଗ ତନ୍ତକୃତି’ ରଖାଯାଇଛି । ଏକ ସ୍ୱତନ୍ତ୍ର ଷ୍ଟଲ୍ରେ ରାଜ୍ୟର ଉତ୍କୃଷ୍ଟ ହସ୍ତତନ୍ତର ପ୍ରଦର୍ଶନ କରାଯାଇଛି । ଆଜିର ଉଦ୍ଘାଟନୀ ଉତ୍ସବରେ ରାଜ୍ୟ ହସ୍ତଶିଳ୍ପ ପୁରସ୍କାର-୨୦୧୮ ପ୍ରଦାନ କରାଯାଇଛି । ଯେଉଁମାନେ ଏହି ପୁରସ୍କାର ପାଇଛନ୍ତି ସେମାନେ ହେଲେ ଶ୍ରୀ ବ୍ରହ୍ମାନନ୍ଦ ମହାରଣା, ଶ୍ରୀ ଦେବେନ୍ଦ୍ର ବେହେରା, ଶ୍ରୀମତୀ ସୁମନ ମେହେର, କଳାକୃତୀ ସମ୍ମାନ ସୁଶ୍ରୀ କୁନି ପାତ୍ର, ଶ୍ରୀ ସନ୍ତୋଷ ସେନାପତି, ଶ୍ରୀ ଉଦୟ ମହାନ୍ତି, ଶ୍ରୀ ଚତୁର୍ଭୁଜ ପରିଡ଼ା, ଶ୍ରୀମତୀ ଦୀପ୍ତିରାଣୀ ବେହେରା, ଶ୍ରୀ କହ୍ନେଇ ଗନଡିଆ, ଶ୍ରୀ ଅମୀୟ ପୋଦାର, ଶ୍ରୀ ରାକେଶ ମହାରଣାଙ୍କୁ ପ୍ରଦାନ କରାଯାଇଛି ।
