ସ୍ଥାୟୀ ପରିଚାଳନା କମିଟି ଗଠନ ହେଲାନି, ପୂର୍ବ ବର୍ଷର ଡ୍ରେସ ,ଜୋତା ପଇସା ମିଳିଲାନି
୨୫ଜୁଲାଇ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ଭୁବନ :- ଢେ଼ଙ୍କାନାଳ ଜିଲ୍ଲା ଭୁବନ ବ୍ଲକ ଅନ୍ତର୍ଗତ ଏକତାଳି ପଞ୍ଚାୟତ ର ପୁରୁଷୋତ୍ତମପୁର ଠାରେ ସ୍ଥାପିତ ଓଡ଼ିଶା ଆଦର୍ଶ ବିଦ୍ୟାଳୟ ଖୋଲିବାର ବର୍ଷକ ମଧ୍ୟରେ ବହୁ ସମସ୍ୟା ଦେଇ ଗତି କରୁଛି । ୨୦୨୨ ମସିହା ରେ ଏହି ବିଦ୍ୟାଳୟ ର ନିର୍ମାଣ କାର୍ଯ୍ୟ ଆରମ୍ଭ ହୋଇ ୨୦୨୨ ରେ ଶେଷ ହୋଇଥିଲା । ପୂର୍ତ୍ତ ବିଭାଗ ଜରିଆରେ ୪ କୋଟି ୨୧ ଲକ୍ଷ ୫୭ ହଜାର ଟଙ୍କାରେ ନିର୍ମିତ ଏହି ବିଦ୍ୟାଳୟ ରେ ସମୁଦାୟ ୧୮ ଟି ଶ୍ରେଣୀଗୃହ,୫ ଟି ଲବୋରେଟରି,ଗୋଟିଏ ଲାଇବ୍ରେରୀ, ଚାରୋଟି ଶୌଚାଳୟ ନିର୍ମାଣ ହୋଇଥିଲା । ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକ ଗତ ୨୦.୧୧.୨୦୨୧ ରେ ଏହି ବିଦ୍ୟାଳୟ କୁ ଆଭାସି ଜରିଆରେ ଉଦଘାଟନ କରିଥିଲେ ।
ବର୍ତମାନ ଗୋଟିଏ ଲବୋରେଟରୀ କାର୍ଯ୍ୟକ୍ଷମ /ବ୍ୟବହୃତ ହେଉଛି। ପିଲାଙ୍କ ପାନୀୟ ଜଳ ପାଇଁ ଗୋଟିଏ ଆକ୍ୱାଗାର୍ଡ ଲଗାଯାଇଛି । ଗତବର୍ଷ ଷଷ୍ଟ ଶ୍ରେଣୀ ରେ ସମୁଦାୟ ୮୨ ଜଣ ଛାତ୍ର ଛାତ୍ରୀ ନାମ ଲେଖାଇଥିଲେ ଓ ଚଳିତ ବର୍ଷ ମଧ୍ୟ ୮୨ ଜଣ ଏହିପରି ସମୁଦାୟ ୧୬୪ ଜଣ ଛାତ୍ର ଛାତ୍ରୀ ଅଧ୍ୟୟନ କରୁଛନ୍ତି । ଅଧ୍ୟକ୍ଷା ଙ୍କୁ ମିଶାଇ ୮ ଜଣ ଶିକ୍ଷକ , ଶିକ୍ଷୟିତ୍ରୀ ଶିକ୍ଷାଦାନ କରୁଛନ୍ତି । ୩ ଜଣ ପିଅନ ମଧ୍ୟ ନିଯୁକ୍ତି ହୋଇଛନ୍ତି । ମାତ୍ର ଦୁଃଖର ବିଷୟ ହେଉଛି ଏହି ବିଦ୍ୟାଳୟ ନିର୍ମାଣ ର ବର୍ଷକ ମଧ୍ୟରେ କାନ୍ଥ ଫାଟି ଆଁ କଲାଣି ଓ ପଲସ୍ତରା ଛାଡ଼ିଲାଣି । ମୁଖ୍ୟ ଫାଟକ ଓ ରଙ୍ଗ କାମ ୫- ଟି ଅଧୀନ ରେ ଏକତାଳି ପଞ୍ଚାୟତ ଜରିଆରେ ୧୦ ଲକ୍ଷ ଟଙ୍କା ବ୍ୟୟରେ ନିର୍ମାଣ କରାଯାଇଥିଲା ।
ମୁଖ୍ୟ ଫାଟକ ରୁ ଟାଇଲ ଖାସୁଥିବାରୁ କୋମଳମତି ଛାତ୍ର ଛାତ୍ରୀ ଙ୍କ ସୁରକ୍ଷା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି। ଅଭିଭାବକ ମାନେ ମଧ୍ୟ ନିରାପଦ ମଣୁ ନାହାନ୍ତି । ଅତ୍ୟନ୍ତ ନିମ୍ନ ମାନର କାର୍ଯ୍ୟ ଯୋଗୁଁ ନବନିର୍ମିତ କୋଠା ଓ ଗେଟ ରୁ ଟାଇଲ ଖସୁଛି ବୋଲି ଅଭିଭାବକ ମାନେ ଅଭିଯୋଗ କରିଛନ୍ତି ।ଗତ ବର୍ଷ ଶିକ୍ଷାଦାନ ଆରମ୍ଭ ପୂର୍ବରୁ ତତ୍କାଳୀନ ବି ଇ ଓ ପ୍ରତାପ କୁମାର ଶତପଥୀ ଙ୍କ ଅଧ୍ୟକ୍ଷତାରେ ଅଭିଭାବକ ମାନଙ୍କର ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା । ପିଲା ମାନଙ୍କର ଡ୍ରେସ ଓ ଜୋତା ପାଇଁ ୧ ହଜାର ଟଙ୍କା ଦିଆଯିବ ,ଆପଣ ମାନେ ଡ୍ରେସ ଜୋତା ନିଜେ କିଣିବା ପାଇଁ କୁହାଯାଇଥିଲା ।
କିନ୍ତୁ ଅଦ୍ୟାବଧି ଏହି ପଇସା ମିଳିଲାନି। ଚଳିତ ବର୍ଷ ଯଦିଓ ପିଲାଙ୍କୁ ଡ୍ରେସ ଜୋତା ବିଦ୍ୟାଳୟ ତରଫରୁ ଦିଆଯାଇଛି ତେବେ ବାଳିକା ମାନଙ୍କୁ ଜ୍ୟାକେଟ ମିଳିନାହିଁ ।ବାଳିକା ମାନେ ଖାଲି ଡ୍ରେସ ପିନ୍ଧି କେମିତି ଯିବେ ? ଗତ ବର୍ଷ ହାଉସ ଡ୍ରେସ ପାଇଁ ପ୍ରତ୍ୟେକ ପିଲାଙ୍କ ଠାରୁ ୫୦୦ ଟଙ୍କା ଲେଖାଏଁ ନିଆଯାଇ ଟ୍ରାକ ସୁଟ ଓ ଟି ସାର୍ଟ ଦିଆଯାଇଥିଲା । ଚଳିତ ବର୍ଷ ହାଉସ ଡ୍ରେସ ମିଳିନାହିଁ । ଗତ ବର୍ଷ ଜୁନ ରୁ ଡିସେମ୍ବର ମାସ ପର୍ଯ୍ୟନ୍ତ ପିଲାମାନେ ଟିଫିନ୍ ନେଇ ଯାଉଥିଲେ ଓ ଚଳିତ ବର୍ଷ ଜାନୁଆରୀ ଠାରୁ ପିଲାଙ୍କୁ ମଧ୍ୟାହ୍ନ ଭୋଜନ ଦିଆଯାଉଛି ।ଗତବର୍ଷ ମଧ୍ୟାହ୍ନ ଭୋଜନ ବାବଦରେ ଦୁଇ ଥର ସମୁଦାୟ ଆଠ ଶହ ଟଙ୍କା ପିଲାଙ୍କ ଆକାଉଣ୍ଟ କୁ ଆସିଥିଲା ।
ବର୍ଷକ ମଧ୍ୟରେ ଯଦିଓ ଏକାଧିକ ବାର ଅଭିଭାବକ ମାନଙ୍କର ବୈଠକ ହୋଇଛି ,ପ୍ରତି ବୈଠକ ରେ ଜଣେ ଜଣେ ଅଭିଭାବକ ଙ୍କ ଅଧ୍ୟକ୍ଷତାରେ ବୈଠକ ଅନୁଷ୍ଠିତ ହୋଇଛି । କେଉଁ ଅଦୃଶ୍ୟ କାରଣରୁ ଅଦ୍ୟାବଧି ସ୍ଥାୟୀ ପରିଚାଳନା କମିଟି ଗଠନ କରାଯାଇନାହିଁ ,ତାହା ବୁଝାପଡୁନାହି । ଗତ ଜୁନ ମାସ ୨୪ ତାରିଖ ଦିନ ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକ ଆଭାସି ମାଧ୍ୟମରେ ୧୦୦ ଶଯ୍ୟା ବିଶିଷ୍ଟ ଛାତ୍ରାବାସ ପାଇଁ ଶିଳାନ୍ୟାସ କରିଥିବା ବେଳେ ବିଦ୍ୟାଳୟ ରେ ଛାତ୍ରାବାସ ନିର୍ମାଣ ଶେଷ ହୋଇ ସାରିଲାଣି । ଶିଳାନ୍ୟାସ ପୂର୍ବରୁ କିଭଳି କାମ ଆରମ୍ଭ ହୋଇ ଶେଷ ହେଲା ତାହା ମଧ୍ୟ ପ୍ରଶ୍ନବାଚୀ ସୃଷ୍ଟି କରିଛି। ଏହି ଛାତ୍ରାବାସ କେବେ ଖୋଲିବ ତାହା ଜିଲ୍ଲାପାଳ ନିଷ୍ପତି ନେବେ ବୋଲି କୁହା ଯାଉଛି । ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ଅଭିଭାବକ ମହଲରେ ଦାବି ହୋଇଛି ।
