୭ଜୁଲାଇ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ହିଞ୍ଜିଳିକାଟୁ :- ସହରାଞ୍ଚଳ ବିକାଶ ପ୍ରକ୍ରିୟାକୁ ଅଗ୍ରାଧିକାର ଦିଆଯାଇ ରାଜ୍ୟ ସରକାରଙ୍କ ବିଭିନ୍ନ ଉନ୍ନୟନ ପାଣ୍ଠିରୁ ଲକ୍ଷ ଲକ୍ଷ ଟଙ୍କା ବ୍ୟୟ ଅଟକଳ ହେଉଛି । ସହରବାସୀଙ୍କ ଆବଶ୍ୟକତାକୁ ପୂରଣ କରିବା ପାଇଁ ଏଭଳି ଗୁଣାତ୍ମକ ଉନ୍ନୟନ ପ୍ରକଳ୍ପକାର୍ଯ୍ୟ ସମ୍ପାଦନ ସକାଶେ ରାଜ୍ୟ ରାଜକୋଷରୁ ଅଜସ୍ର ଅର୍ଥ ଶ୍ରାଦ୍ଧ ହେଉଥିବା ବେଳେ କିନ୍ତୁ ବାସ୍ତବରେ ସମ୍ପାଦିତ ହେଉଛି ନିମ୍ନମାନର କାର୍ଯ୍ୟ।କନିଷ୍ଠ ଯନ୍ତ୍ରୀଙ୍କ ଅବହେଳା ଓ ଅସାଧୁ ଠିକାଦାରଙ୍କ ଲାଭଖୋର ନୀତି ଯୋଗୁଁ ବିକାଶକୁ ମୋଡି ମକଚି ଉନ୍ନୟନ ପ୍ରକଳ୍ପ କାର୍ଯ୍ୟକୁ ଜାଣିଶୁଣି ବାଟବଣା କରାଯାଇଛି।ହିଞ୍ଜିଳିକାଟୁ ପୋୖରାଞ୍ଚଳରେ ନିର୍ମାଣାଧୀନ ଥିବା ଏକ କଲ୍ୟାଣମଣ୍ଡପର ବିଭିନ୍ନ କାର୍ଯ୍ୟରେ ନିମ୍ନମାନର ସାମଗ୍ରୀ ବ୍ୟବହୃତ ହୋଇ ଏଭଳି କାର୍ଯ୍ୟ ହୋଇଥିବା ନେଇ ସାହି ବାସିନ୍ଦା ଗୁରୁତର ଅଭିଯୋଗ କରିଛନ୍ତି ।
ପ୍ରାୟ ୧୫ ଲକ୍ଷ ଟଙ୍କା ବ୍ୟୟ ଅଟକଳରେ ନିର୍ମାଣ ହେଉଥିବା କଲ୍ୟାଣ ମଣ୍ଡପର ସମ୍ମୁଖ ଭାଗ ସୁନ୍ଦର ଦେଖା ଯାଉଥିଲା ବେଳେ ଭିତରେ ତିଆରି ହୋଇଥିବା କାର୍ଯ୍ୟ ଅତି ନିମ୍ନମାନର ବୋଲି ସେମାନେ ଅଭିଯୋଗ କରିଛନ୍ତି।ନିମ୍ନମାନର କାର୍ଯ୍ୟ ସମ୍ପାଦନ ହେଉଥିବା ନେଇ ଅଭିଯୋଗ କଲେ ଠିକାଦାର ଓ ନିୟୋଜିତ କର୍ମଚାରୀ ଧମକ ଚମକ ଦେଇଥିବା ସେମାନେ ଉଲ୍ଲେଖ କରିଛନ୍ତି। ହିଞ୍ଜିଳିକାଟୁ ପୌର ପରିଷଦ ୧୫ ,ନଂ ୱାର୍ଡର ଶତାଧିକ ବାସିନ୍ଦାଏଭଳି ସଂଗୀନ ଅଭିଯୋଗ କରିବା ସହ ପୌର କାର୍ଯ୍ୟ ନିର୍ବାହୀ ଅଧିକାରୀଙ୍କ ନିକଟରେ ତଦନ୍ତ ଦାବି କରିଛନ୍ତି।ସୂଚନା ମୁତାବକ ପୌର ପରିଷଦ ଅନ୍ତର୍ଗତ ୧୫ନଂ ୱାର୍ଡରେ ଆର୍ଥିକ ବର୍ଷ ୨୦୧୯-୨୦ ରେ ସାଂସଦ ପାଣ୍ଠିରୁ ୧୪ ଲକ୍ଷ,୯୭ହଜାର,୨୬୨ଟଙ୍କା ଚୁକ୍ତିନାମା ମୂଲ୍ୟରେ ନିର୍ମାଣ ହେଉଛି କେଉଟ ସାହି କଲ୍ୟାଣ ମଣ୍ଡପ ।
ସମ୍ପୃକ୍ତ ଉନ୍ନୟନ ପ୍ରକଳ୍ପ କାର୍ଯ୍ୟ ଠିକାଦାର ସୁମିତ ପାଣିଗ୍ରାହୀ ସମ୍ପାଦନ କରୁଥିବା ନାଗରିକ ସୂଚନା ଫଳକରେ ଦର୍ଶାଯାଇଛି।କିନ୍ତୁ କଲ୍ୟାଣ ମଣ୍ଡପର ନିର୍ମାଣ କାର୍ଯ୍ୟରେ ନିମ୍ନ ମାନର ସାମଗ୍ରୀ ବ୍ୟବହୃତ ହୋଇଥିବା ବେଳେ କେଉଁଠି ଟାଇଲ ଚଟାଣ ଦବି ଯାଇଛି ତ ଆଉ କେଉଁଠି କାନ୍ଥରେ ସ୍ଥାନେ ସ୍ଥାନେ ଫାଟ ସୃଷ୍ଟି ହୋଇଛି।ପାହାଚ ରାସ୍ତାରେ ପୁରୁଣା ଟିଣ ଚଦର ଲଗା ଯାଇଛି।ଶୌଚାଳୟର ବାହାର ଓ ଭିତର କାନ୍ଥରେ ସିମେଣ୍ଟର ଅନୁପାତିକ ମିଶ୍ରଣରେ ଅନିୟମିତତା ଯୋଗୁଁ ନିର୍ମାଣର ଦୁଇ ମାସ ନ ପୁରୁଣୁ ଏଭଳି ନିମ୍ନମାନର କାର୍ଯ୍ୟର ଅସଲ ସ୍ୱରୂପ ସାଧାରଣରେ ଦୃଶ୍ୟମାନ ହେଉଛି ।
ଏଷ୍ଟିମେଟ ଅନୁସାରେ ଗୁଣବତ୍ତା କାର୍ଯ୍ୟ ସମ୍ପାଦନ ପାଇଁ ନିର୍ଦ୍ଦେଶ ଥିଲେ ମଧ୍ୟ ଲାଭଖୋର ନୀତି ଆପଣେଇ ଠିକାଦାର ଜଣକ ଏଭଳି ନିମ୍ନମାନର କାର୍ଯ୍ୟ ସମ୍ପାଦିତ କରିଛନ୍ତି । ନିମ୍ନ ମାନର କାର୍ଯ୍ୟ ଓ ଏହାର ସ୍ଥାୟୀତ୍ୱ ନେଇ ଅଭିଯୋଗ କଲେ ଠିକାଦାର ଓ ନିୟୋଜିତ କର୍ମଚାରୀ କର୍ଣ୍ଣପାତ କରିବା ପରିବର୍ତ୍ତେ ଓଲଟି ଧମକ ଚମକ ଦେଉ ଥିବା ମଧ୍ୟ ଅଭିଯୋଗ ହୋଇଛି । ଏନେଇ ସମ୍ପୃକ୍ତ ୱାର୍ଡର ପୂର୍ବତନ କାଉନସିଲର ବିକ୍ରମ ବେହେରା,ଘନଶ୍ୟାମ ବେହେରା, ପ୍ରକାଶ ବେହେରା,ପ୍ରମୋଦ ବେହେରା, ହିମାଂଶୁ ବେହେରା,ଭଗବାନ ପାତ୍ର,ସୁଦାମ ପାତ୍ର,ଝିଲି ବେହେରା,ସୁକାନ୍ତି ବେହେରା,ନରସିଂହ ବେହେରା, ନାରାୟଣ ବେହେରାଙ୍କ ସମେତ ଶତାଧିକ ପୁରୁଷ ଓ ମହିଳା ସ୍ବାକ୍ଷର ସମ୍ବଳିତ ଦାବି ପତ୍ର ପ୍ରଦାନ କରି ଏଭଳି ଅନିୟମିତତା ଓ ନିମ୍ନମାନର କାର୍ଯ୍ୟର ତଦନ୍ତ ଓ କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ ପୌର କାର୍ଯ୍ୟ ନିର୍ବାହୀ ଅଧିକାରୀଙ୍କୁ ଅନୁରୋଧ କରିଛନ୍ତି ।
