ବରଗଡ଼ ଜିଲ୍ଲା ଗସ୍ତର ଦ୍ଵିତୀୟ ଦିନରେ ନୃସିଂନାଥ ପୀଠରେ 5-T ସଚିବ ଶ୍ରୀ ଭି.କେ. ପାଣ୍ଡିଆନ

ନୂଆବର୍ଷ ପୂର୍ବରୁ ଶେଷ ହେବ ନୃସିଂହନାଥ ପୀଠ ଓ ଦେବଦହା ପୀଠର ଉନ୍ନତିକରଣ କାର୍ଯ୍ୟ

୩ଜୁଲାଇ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ବରଗଡ଼ :- ଦୁଇ ଦିନିଆ ବରଗଡ଼ ଗସ୍ତରେ ଆସିଥ‌ିବା  5-T ସଚିବ, ଶ୍ରୀ ଭି.କେ, ପଣ୍ଡିଆନ ମଙ୍ଗଳବାର ଦିନ ପ୍ରଥମେ ବରଗଡ଼ ବ୍ଳକ ଅନ୍ତର୍ଗତ ଗିରିଶୁଳ, ଜୀରା ନଦୀ ନିକଟସ୍ଥ ଗଙ୍ଗାଧର ମେହେର ଉଠା ଜଳସେଚନ ପ୍ରକଳ୍ପର ଅଗ୍ରଗତି କାର୍ଯ୍ୟ ସମୀକ୍ଷା କରି ନିର୍ଦ୍ଧାରିତ ସମୟ ମଧ୍ୟରେ କାର୍ଯ୍ୟ ସମାପ୍ତ ହେବା ପାଇଁ ନିର୍ଦ୍ଦେଶ ଦେଇଥିଲେ । ସେଠାରୁ ସୋହେଲା ବ୍ଲକ ର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ପରିଦର୍ଶନ କରିବା ସହିତ ଶିଶୁ ଓ ମାତୃ ମଙ୍ଗଳ କେନ୍ଦ୍ରର ନୂତନ କୋଠାର କାର୍ଯ୍ୟ ସମୀକ୍ଷା କରିଥିଲେ । ସୋହେଲାର ଦୁର୍ଗା ମନ୍ଦିର ପରିଦର୍ଶନ କରିବା ସହିତ ବୀରେନ ବାବାଙ୍କର ସାଧନା କୂଟୀର ପରିଦର୍ଶନ କରି ବାବାଙ୍କୁ ସୌଜନ୍ୟମୂଳକ ସାକ୍ଷାତ କରିଥିଲେ ଶ୍ରୀ ଭି. କେ. ପାଣ୍ଡିଆନ ।

ସେହିପରି ସୋହେଲା ବ୍ଲବର ହଲଦିପାଲି ଠାରେ ହଜାର ହଜାର ସଂଖ୍ୟାରେ ସ୍ବୟଂ ସହାୟକ ଗୋଷ୍ଠୀର ମା’ ମାନେ ଶଙ୍ଖ ହୁଳହୁଳି ଧ୍ବନିରେ ଭବ୍ୟ ସ୍ବାଗତ କରିଥିଲେ 5-7 ସଚିବଙ୍କୁ I ମା’ ମାନଙ୍କ ପାଖକୁ ଯାଇ ତାଙ୍କ ସମସ୍ୟା ସମ୍ପର୍କରେ ପଚାରି ବୁଝିବା ସହିତ ସମସ୍ତଙ୍କ ଠାରୁ ଅଭିଯୋଗ ପତ୍ର ଗ୍ରହଣ କରିଥିଲେ । ସମସ୍ତ ଅଭିଯୋଗ ପତ୍ରମାନ ତଦନ୍ତ କରାଯାଇ ଯଥାଶୀଘ୍ର ସମାଧାନ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଥିଲେ । ଏହା ମଧ୍ୟରୁ ଚାଷୀ ଭାଇ ଭଉଣୀମାନଙ୍କ ସମସ୍ୟାକୁ ଅଧିକ ଗୁରୁତ୍ବ ଦିଆଯିବ, ମା’ ମାନଙ୍କୁ ସ୍ଵାବଲମ୍ବୀ କରିବା ସହିତ ସେମାନଙ୍କ ଆର୍ଥିକ ମାନଦଣ୍ଡ ଉନ୍ନତ କରିବା, ମିଶନ ଶକ୍ତିର ଲକ୍ଷ୍ୟ, ସେଥିପାଇଁ ରାଜ୍ୟ ସରକାର ଆପଣମାନଙ୍କୁ 5 ଲକ୍ଷ ଟଙ୍କା ପର୍ଯ୍ୟନ୍ତ ଋଣ ସହାୟତା ପ୍ରଦାନ କରୁଛନ୍ତି, ଆପଣମାନେ ଏହି ସୁବିଧାର ସୁବିନିଯୋଗ କରନ୍ତୁ ବୋଲି ତାଙ୍କ ବକ୍ତବ୍ୟରେ କହିଥିଲେ ।

ଭଟଲି ନିର୍ବାଚନ ମଣ୍ଡଳୀ ଅନ୍ତର୍ଗତ ଅମ୍ବାଭୋନା ବ୍ଲକର କୁରୁମକେଲ ଠାରେ ନୂତନ ଭାବରେ ବସତି ସ୍ଥାପନ କରିଥିବା କଲୋନୀକୁ ପରିଦର୍ଶନ କରି ସେମାନଙ୍କର ସମସ୍ୟା ସମ୍ପର୍କରେ ପଚାରି ବୁଝିଥିଲେ । ଏଠାରେ ମଧ୍ୟ ସ୍ବୟଂ ସହାୟକ ଗୋଷ୍ଠୀର ମହିଳାମାନଙ୍କ ସହିତ ଆଲୋଚନା କରି ତାଙ୍କଠାରୁ ବିଭିନ୍ନ ପ୍ରକାର ଦାବି ପତ୍ର ଗ୍ରହଣ କରିଥିଲେ । ଏସବୁ ସମସ୍ୟା ସମ୍ପର୍କରେ ବିଭିନ୍ନ ସ୍ତରରେ ବିଭାଗୀୟ ଅଧିକାରୀମାନଙ୍କ ଦ୍ବାରା ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଥିଲେ । ଏହାପରେ ପାଇକମାଳ ବ୍ଲକର 5ଟି ଉଚ୍ଚ ବିଦ୍ୟାଳୟର ଛାତ୍ର ଛାତ୍ରୀମାନଙ୍କ ସହିତ ସ୍ଥାନ ବିନିମୟ ବେଳେ ପ୍ରତ୍ୟେକ ଛାତ୍ର ଛାତ୍ରୀ ସ୍ମାର୍ଟ ଶ୍ରେଣୀଗୃହରେ ପାଠ ପଢି ଜୀବନରେ କଠିନ ପରିଶ୍ରମ ବଳରେ ନିଜର ଲକ୍ଷ୍ୟ ହାସଲ କରନ୍ତୁ ବୋଲି କହିଥିଲେ ।

ଜିଲ୍ଲାର ପ୍ରତ୍ୟେକ ମହାବିଦ୍ୟାଳୟ ମଧ୍ୟ 5T ରେ ରୂପାନ୍ତରିତ ହେବ । ବରଗଡ଼ ଜିଲ୍ଲାର ପ୍ରସିଦ୍ଧ ନୃସିଂହନାଥ ପୀଠକୁ ପରିଦର୍ଶନ କରି ନିର୍ମାଣ କାର୍ଯ୍ୟର ତଦାରଖ କରି ନୂଆ ବର୍ଷ ପୂର୍ବରୁ ଏହାର କାର୍ଯ୍ୟ ସମାପ୍ତି ପାଇଁ ନିର୍ଦ୍ଦେଶ ଦେଇଥିଲେ । ମୁଖ୍ୟମନ୍ତ୍ରୀ ଯାହାବି ଟଙ୍କା ଅନୁଦାନ ଆକାରରେ ଦେଇଛନ୍ତି, ତାହା ଆପଣ ମାନଙ୍କର, ଆପଣମାନେ ସ୍ବଚ୍ଛତାର ସହିତ କାମ କରନ୍ତୁ ଏବଂ ଏହାକୁ ରାଜ୍ୟର ଏକ ସୁବିକଶିତ ପର୍ଯ୍ୟଟନ କ୍ଷେତ୍ର ହିସାବରେ ଗଢି ତୋଳନ୍ତୁ । ଭଲ କାମ କଲେ ଭିତ୍ତି ଭୂମି ପାଇଁ ଆବଶ୍ୟକୀୟ ଅର୍ଥ ଦ୍ଵିତୀୟ ଏବଂ ତୃତୀୟ ପର୍ଯ୍ୟାୟରେ ମଧ୍ୟ ଯୋଗାଇ ଦିଆଯିବ । ପାଇକ ମାଳର କସ୍ତୁରବା ଗାନ୍ଧୀ ମାତୃ ନିକେତନ ପରିଦର୍ଶନ କରି ପାର୍ବତୀ ଗିରିଙ୍କୁ ଶ୍ରଦ୍ଧାସୁମନ ଅର୍ପଣ କରିବା ସହିତ ଅନାଥାଶ୍ରମର ସମସ୍ୟା ସମ୍ପର୍କରେ ପଚାରି ବୁଝିଥିଲେ ।

ଏହାପରେ ପଦ୍ମପୁର ରାଜବୋରାସମ୍ବର ଉଚ୍ଚ ବିଦ୍ୟାଳୟ ପଡ଼ିଆରେ ବିଶାଳ ସମାବେଶରେ ଯୋଗ ଦେଇଥିଲେ 5T ସଚିବ । ସ୍ବୟଂ ସହାୟକ ଗୋଷ୍ଠୀର ମହିଳା, ବୁଦ୍ଧିଜୀବୀ ଏବଂ ସର୍ବୋପରି ପଦ୍ମପୁର ଅଞ୍ଚଳବାସୀଙ୍କ ଦ୍ବାରା ତାଙ୍କୁ ଲକ୍ଷ୍ୟ ସ୍ବାଗତ କରଯାଇଥିଲା । ପଦ୍ମପୁରର ବହୁମୁଖୀ ବିକାଶମୂଳକ କାର୍ଯ୍ୟ ସମ୍ପର୍କରେ ଜନସାଧାରଣଙ୍କ ସହିତ ଆଲୋଚନା କରିବା ପରେ ଅନ୍ଵେଷା ହଷ୍ଟେଲ ପରିଦର୍ଶନ କରିଥିଲେ । ଏହି ଅବସରରେ ବିଭିନ୍ନ ସଂଗଠନ ତରଫରୁ ତାଙ୍କୁ ଦାବିପତ୍ରମାନ ଦିଆଯାଇଥିଲା । ଉପରୋକ୍ତ ସମସ୍ତ କାର୍ଯ୍ୟକ୍ରମରେ ବହୁ ସଂଖ୍ୟାରେ ଜନ ସମାଗମ ହୋଇଥିବା ବେଳେ ଜନ ସାଧାରଣଙ୍କ ମଧ୍ୟରେ ବେଶ ଉତ୍ସାହ ପରିଲକ୍ଷିତ ହୋଇଥିଲା ।