ଖୋର୍ଦ୍ଧାରୋଡ଼ ରେଳମଣ୍ଡଳ ଦ୍ଵାରା : ପୁରୀ ରେଲୱେ ଷ୍ଟେସନରେ ଯାତ୍ରୀମାନଙ୍କ ପାଇଁ – ବ୍ୟାପକ ବ୍ୟବସ୍ଥା କରାଯାଇଛି

ଓଡ଼ିଶା ତାଜା ନ୍ୟୁଜ୍/୧୨ ଜୁଲାଇ ମଙ୍ଗଳବାର/ଖୋର୍ଦ୍ଧା-ଜଟଣୀ :- ଚଳିତ ବର୍ଷ ରଥଯାତ୍ରା ସମୟରେ ପୁରୀ ରେଳ ଷ୍ଟେସନରେ ୩, ୬୪,୫୮୧ ଯାତ୍ରୀ ଯାତ୍ରା କରିଛନ୍ତି । ରଥଯାତ୍ରା ସମୟରେ ସମୁଦାୟ ୨୩୧ଟି ଅତିରିକ୍ତ ସ୍ୱତନ୍ତ୍ର ଟ୍ରେନ୍ ବ୍ୟବସ୍ଥା କରାଯାଇଥିଲା । ମୋବାଇଲ୍ ଅଣ-ସଂରକ୍ଷିତ ଟିକେଟ୍ ବ୍ୟବସ୍ଥା, ମୋବାଇଲ୍ ଏଟିଏମ୍ ସେଣ୍ଟର୍, ମୋବାଇଲ୍ ଟଏଲେଟ୍, ବରିଷ୍ଠ ନାଗରିକଙ୍କ ପାଇଁ ମାଗଣା ବ୍ୟାଟେରୀ ଚାଳିତ ଯାନ ଏବଂ ଦିବ୍ୟାଙ୍ଗନ୍ ଯାତ୍ରୀଙ୍କ ପାଇଁ ଅନେକ ନୂତନ ଆଧୁନିକ ସୁବିଧା କରାଯାଇଛି । ପୁରୀ ରେଳ ଷ୍ଟେସନରେ ଏକ ଲକ୍ଷରୁ ଅଧିକ ଭକ୍ତଙ୍କୁ ମାଗଣା ଖାଦ୍ୟ ଯୋଗାଇ ଦିଆଯାଇଥିଲା ।

ପ୍ରତିବର୍ଷ,ପୂର୍ବତଟ ରେଳବାଇର ଖୋର୍ଦ୍ଧାରୋଡ଼ ମଣ୍ଡଳ, ରଥଯାତ୍ରା ସମୟରେ ପୁରୀକୁ ଭକ୍ତଙ୍କ ବିପୁଳ ସଂଖ୍ୟାରେ ଆଗମନ ପାଇଁ ବ୍ୟବସ୍ଥା କରିବାରେ ସର୍ବଦା ଆଗରେ ରହିଆସିଛି। ଚଳିତ ବର୍ଷ ଖୋର୍ଦ୍ଧାରୋଡ଼ ମଣ୍ଡଳ ଉନ୍ନତ ଭିତ୍ତିଭୂମି ଏବଂ ସୁବିଧା ଯୋଗାଇ ରଥଯାତ୍ରା ସମୟରେ ପୁରୀ ରେଳ ଷ୍ଟେସନରେ ଲକ୍ଷ ଲକ୍ଷ ଯାତ୍ରୀଙ୍କୁ ସେବା ଯୋଗାଇ ଦେଇଛି । ଚଳିତ ବର୍ଷ ପୁରୀ ରେଳ ଷ୍ଟେସନରେ ୩,୬୪,୫୮୧ ଯାତ୍ରି ୧ ଜୁଲାଇ ୨୦୨୨ ରୁ ୧୧ ଜୁଲାଇ ୨୦୨୨ ମଧ୍ୟରେ ଯାତାୟାତ କରିଛନ୍ତି । ତୀର୍ଥଯାତ୍ରୀ ମାନଙ୍କ ସୁବିଧାଜନକ ଯାତ୍ରା ପାଇଁ ମୋଟ ୨୩୧ଟି ଅତିରିକ୍ତ ସ୍ୱତନ୍ତ୍ର ଟ୍ରେନ୍ ଏହି ସମୟ ମଧ୍ୟରେ ଚଳାଚଳ କରିଥିଲା । ପୁରୀ ଏବଂ ପୁରୀ ପର୍ଯ୍ୟନ୍ତ ଅନ୍ୟ ଷ୍ଟେସନରେ,ଜେମାନ୍ ହ୍ୟାଙ୍ଗର୍,ଅତିରିକ୍ତ ଟ୍ରେନ୍ ସେବା,ଅତିରିକ୍ତ ବୁକିଂ କାଉଣ୍ଟର,ପରିବହନ ସୁବିଧା,ପରିଷ୍କାର ପରିଚ୍ଛନ୍ନତା,କ୍ୟାଟରିଂ ଏବଂ ପାନୀୟଜଳ ବ୍ୟବସ୍ଥା, ସୁରକ୍ଷା ବ୍ୟବସ୍ଥା ଏବଂ ଚିକିତ୍ସା ସୁବିଧା ଇତ୍ୟାଦି ଉପରେ ଅତିରିକ୍ତ ଭିତ୍ତିଭୂମି ଯୋଗାଇବା ଉପରେ ବିଶେଷ ଗୁରୁତ୍ୱ ଦିଆଯାଇଛି ।

ନୂତନ ଆଧୁନିକ ସୁବିଧା ଯେମିତି କି,ମୋବାଇଲ୍ ଅଣ-ସଂରକ୍ଷିତ ଟିକେଟ୍ ବ୍ୟବସ୍ଥା,ମୋବାଇଲ୍ ଏଟିଏମ୍ ସେଣ୍ଟର୍, ମୋବାଇଲ୍ ଟଏଲେଟ୍, ବରିଷ୍ଠ ନାଗରିକ ତଥା ଦିବ୍ୟାଙ୍ଗନ୍ ଯାତ୍ରୀଙ୍କ ପାଇଁ ମାଗଣା ବ୍ୟାଟେରୀ ଚାଳିତ ଯାନ,ଡିଜିଟାଲ୍ ପ୍ରଦର୍ଶନ ବୋର୍ଡ/ପ୍ରଶସ୍ତ କାନ୍ଥ, ବ୍ରାଣ୍ଡେଡ୍ କିଓସ୍କ ସହିତ ଫୁଡ୍ କୋର୍ଟ ଇତ୍ୟାଦି ବ୍ୟବସ୍ଥା, ପୁରୀ ରେଳ ଷ୍ଟେସନରେ ଯୋଗାଇ ଦିଆଯାଇଥିଲା । ଭକ୍ତଙ୍କ ସୁବିଧା ପାଇଁ ପୁରୀ ରେଳ ଷ୍ଟେସନର ସମନ୍ୱିତ ଅଞ୍ଚଳରେ ୧୫୦୦୦ ବର୍ଗ ମିଟର ପରିମିତ ବିଶ୍ରାମ କ୍ଷେତ୍ର ଯୋଗାଇ ଦିଆଯାଇଥିଲା । ପ୍ରଥମ ଥର ପାଇଁ ଖୋର୍ଦ୍ଧାରୋଡ଼ ମଣ୍ଡଳ, ନାଲକୋ,ଏମସିଏଲ ଏବଂ ରେଳ ବିକାଶ ନିଗମ ଲିମିଟେଡ୍ (ଆର ଭି ଏନ ଏଲ)ର ସମନ୍ୱୟରେ,ପୁରୀ ରେଳ ଷ୍ଟେସନରେ ଭକ୍ତମାନଙ୍କୁ ମାଗଣା ଖାଦ୍ୟର ବ୍ୟବସ୍ଥା କରିଯାଇଥିଲା ।

ଗୁଣ୍ଡିଚା ଯାତ୍ରା,ବାହୁଡ଼ାଯାତ୍ରା,ସୁନା ବେଶ,ଅଧରପଣା ଇତ୍ୟାଦି ଦିନରେ ଲକ୍ଷେରୁ ଉର୍ଦ୍ଧ ଭକ୍ତଙ୍କୁ ମାଗଣା ଖାଦ୍ୟ ଯୋଗାଇ ଦିଆଯାଇଥିଲା। ପ୍ରତିବର୍ଷ ପରି, ଖୋର୍ଦ୍ଧାରୋଡ଼ ମଣ୍ଡଳର ମେକାନିକାଲ୍ ବିଭାଗର ଏକ ଟିମ୍ ଜ୍ୟାକ୍ ଏବଂ ଅନ୍ୟାନ୍ୟ ଯନ୍ତ୍ରପାତି ସାହାଯ୍ୟରେ ରଥ ଚକଗୁଡିକର ମରାମତି ଏବଂ ଘୂର୍ଣ୍ଣନ,ଘୁଞ୍ଚାଇବା, ତିନିଟି ରଥର ଦିଗ ବଦଳାଇବାରେ ସହାୟତା ଏବଂ ସେବା ପ୍ରଦାନ କରିଛନ୍ତି । ଏହି ଟିମ୍ ରଥଯାତ୍ରା ସମୟରେ କୌଣସି ପ୍ରକାରର ଅଘଟଣ ହେଲେ ସେଥିପାଇଁ ସାହାଯ୍ୟ କରିବାପାଇଁ ଯାଇଥିଲେ । ଖୋର୍ଦ୍ଧାରୋଡ଼ର ମଣ୍ଡଳ ରେଳ ପ୍ରବନ୍ଧକ ଶ୍ରୀ ରିଙ୍କେଶ ରାୟ,,ରଥଯାତ୍ରା ସମୟରେ ପୁରୀ ରେଳ ଷ୍ଟେସନରେ ତୀର୍ଥଯାତ୍ରୀଙ୍କୁ ସେବା ଯୋଗାଇଥିବା ସମସ୍ତ ଅଧିକାରୀ ଓ କର୍ମଚାରୀଙ୍କୁ ଅଭିନନ୍ଦନ ଜଣାଇଛନ୍ତି । ସେ କହିଛନ୍ତି ଯେ ଯାତ୍ରୀମାନଙ୍କର ଯତ୍ନନେବା ଏବଂ ଟ୍ରେନ୍ ଏବଂ ଷ୍ଟେସନରେ ପ୍ରତ୍ୟେକ ଆଧୁନିକ ସୁବିଧା ଯୋଗାଇବାରେ ଏହି ମଣ୍ଡଳ ସର୍ବଦା ଆଗରେ ଥାଏ ।