ରଣପୁର ବ୍ଲକ (ଓଡିଶା ତାଜାନ୍ୟୁଜ୍ ) ରଣପୁର 28.3.2020 ରିପୋର୍ଟ – ସୋନାଲି :- କରୋନା ଭୂତାଣୁ ସଂକ୍ରମଣ ଗୋଟିଏ ଦେଶରୁ ଅନ୍ୟଦେଶକୁ ବ୍ୟାପୁଥିବାବେଳେ ମୃତକ ଓ ସଂକ୍ରମିତଙ୍କ ସଂଖ୍ୟା ମଧ୍ୟ ବଢ଼ିବାରେ ଲାଗିଛି । ତେବେ ଏହି ଭୂତାଣୁକୁ ଦମନ କରିବା ପାଇଁ ବର୍ତ୍ତମାନ ସୁଦ୍ଧା କୌଣସି ପ୍ରତିଷେଧକ ଔଷଧ ବାହାରି ନ ଥିବାବେଳେ ସାମ୍ପ୍ରତିକ ପରିସ୍ଥିତିରେ ସଚେତନତା, ସତର୍କତା ତଥା ସାମାଜିକ ଦୂରତ୍ୱ ଅବଲମ୍ବନ ହିଁ କରୋନା ପ୍ରତିହତ ପାଇଁ ଏକମାତ୍ର ମାଧ୍ୟମ ପାଲଟିଛି । ଏହି ଦୃଷ୍ଟିରୁ ଗତ ମଙ୍ଗଳବାର ମଧ୍ୟରାତ୍ରିରୁ ସାରା ଭାରତରେ ଲକ୍ ଡାଉନ୍ କଟକଣା ଲାଗୁ ହୋଇଛି ।
ତେବେ ଲୋକଙ୍କ ଖାମଖିଆଲି ମନୋଭାବ ଯୋଗୁ କେତେକ ସ୍ଥଳେ ଏହି କଟକଣା ବାଟବଣା ହୋଇପଡ଼ିଥିବା ମଧ୍ୟ ପରିଲକ୍ଷିତ ହେଉଛି । ଅନ୍ୟପଟେ ନୟାଗଡ ଜିଲା ରଣପୁର ବ୍ଲକ ଅନ୍ତର୍ଗତ ଗୌରାଙ୍ଗପୁର ପଂଚାୟତର ଯଦୁପୁର ଓ ସାମନ୍ତରାୟ ପୁରର ଗ୍ରାମବାସି ମାନେ ପଥର ପକାଇ ରାସ୍ତାକୁ ଅବରୋଧ କରିଥିଲେ । ଗ୍ରାମବାସୀମାନେ ଗ୍ରାମକୁ ସଂଯୋଗ କରୁଥିବା ସମସ୍ତ ପ୍ରବେଶପଥକୁ ବନ୍ଦ କରିଦେବା ସହିତ ସମଗ୍ର ଗ୍ରାମକୁ ଲକ୍ ଡାଉନ୍ କରି ଦେଇଛନ୍ତି । ଅତି ଜରୁରୀ କାମ ପଡ଼ିଲେ ଗ୍ରାମର କେହି ପଦାକୁ ବାହାରୁଛନ୍ତି, ନ ଚେତ୍ ସାମାଜିକ ଦୂରତ୍ୱ ରକ୍ଷା କରି ନିଜ ଗ୍ରାମ ଓ ଘର ମଧ୍ୟରେ ରହୁଛନ୍ତି ।
ନରସିଂହ ପୁର ପଂଚାୟତର ନୁଆ ସାହି, ଲୋଧାଚୁଆ ପଞ୍ଚାୟତର ରାଜନଗର ଗ୍ରାମର କିଛି ମହିଳା ଓ ଗ୍ରାମବାସି ନିଜର ତଥା ଗ୍ରାମର ସୁରକ୍ଷା ପାଇଁ ଗ୍ରାମର ଅନାବଶ୍ୟକ ପ୍ରବେଶକୁ ବାରଣ କରିବା ପାଇଁ ଗ୍ରାମ ପ୍ରବେଶ ପଥ କୁ ବାଉଁଶ ପକାଇ ବନ୍ଦ କରିଛନ୍ତି । ମହିଳା ମାନଙ୍କ ଏ ଭଳି ଉଦ୍ୟମକୁ ସମସ୍ତେ ପ୍ରଂଶସା କରିଛନ୍ତି । ସେହିଭଳି ପଟିଆ ଗ୍ରାମକୁ ମଧ୍ୟ ଗ୍ରାମବାସୀମାନେ ଲକ ଡାଉନ କରି ରଖିଛନ୍ତି ।
