ଜିଲ୍ଲାସ୍ତରୀୟ ମୋ ୱାର୍ଡ଼ କର୍ମଶାଳା : ଗୋଷ୍ଠୀ ସହଭାଗିତାକୁ ଗୁରୁତ୍ୱ ସ୍ୱଚ୍ଛତା କ୍ଷେତ୍ରରେ ହିଞ୍ଜିଳିକାଟୁ ପୌର ପରିଷଦ ରାଜ୍ୟର ରୋଲ୍ ମଡ଼େଲ

ଓଡ଼ିଶା ତାଜା ନ୍ୟୁଜ (୧୧ ଅପ୍ରେଲ ରବିବାର ) ହିଞ୍ଜିଳିକାଟୁ :-  ରାଜ୍ୟ ସରକାର ବିଭିନ୍ନ ସହରାଂଚଳରେ ଉନ୍ନତି ଓ ଉନ୍ନୟନ ସକାଶେ ମୋ ୱାର୍ଡ଼ ନାମରେ ଏକ କାର୍ଯ୍ୟକ୍ରମ ଆରମ୍ଭ କରିଛନ୍ତି । ସରକାରଙ୍କ ଏହି ପଦକ୍ଷେପ ଦ୍ୱାରା ସ୍ୱଚ୍ଛତା ସହ ୪ଟି ଗୁରୁତ୍ୱପୁର୍ଣ୍ଣ ପ୍ରସଙ୍ଗ ଉପରେ ଫୋକସ୍ କରାଯାଇଛି । ସ୍ୱଚ୍ଛ ସର୍ବେକ୍ଷଣ ୨୦୨୧ ରାଙ୍କିଙ୍ଗ୍ ଅନୁଯାୟୀ ରାଜ୍ୟରେ ସ୍ୱଚ୍ଛ ଓଡ଼ିଶା- ସୁସ୍ଥ ଓଡ଼ିଶା ଗଠନ ଦିଗରେ ଜିଲ୍ଲାସ୍ତରରେ ବହୁ ପଦକ୍ଷେପ ଗ୍ରହଣ କରାଯାଇଛି । ସହରବାସୀଙ୍କୁ ଉନ୍ନତ ମାନର ସେବା ଯୋଗାଇ ଦେବା ସହ ପାନୀୟଜଳ ,ପରିମଳ , ଆଲୋକୀକରଣ, ବୃକ୍ଷରୋପଣ, ଭିତିଭୂମି ଆଦି ବ୍ୟବସ୍ଥା ଦିଗରେ ଗୁରୁତ୍ୱ ପ୍ରଦାନ କରାଯାଇଛି । ଏହି ପରିପ୍ରେକ୍ଷୀରେ ରବିବାର ହିଞ୍ଜିଳିକାଟୁ ପୌର ପରିଷଦ ସଭାକକ୍ଷ ଗୃହରେ ଜିଲ୍ଲାସ୍ତରୀୟ ମୋ ୱାର୍ଡ଼ କର୍ମଶାଳା ଅନୁଷ୍ଠିତ ହୋଇଯାଇଛି । ପୌର କାର୍ଯ୍ୟ ନିର୍ବାହୀ ଅଧିକାରୀ ଡ଼ଃ. ମନୋରଞ୍ଜନ ସାହୁଙ୍କ ତତ୍ୱାବଧାନରେ ଆୟୋଜିତ କର୍ମଶାଳାରେ ଜିଲ୍ଲା ସହରାଂଚଳ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ସୁଦାମ ଚରଣ ମଣ୍ଡଳ ଅଧ୍ୟକ୍ଷତା କରିଥିଲେ ।

ମୁଖ୍ୟ ଅତିଥି ଭାବେ ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ, ସମ୍ମାନିତ ଅତିଥି ଭାବେ ମୁଖ୍ୟମନ୍ତ୍ରୀଙ୍କ ଡ଼ିଆରଡ଼ିଏ ପ୍ରତିନିଧି ଶରତ ଚନ୍ଦ୍ର ମହାପାତ୍ର, ଉପ ଜିଲ୍ଲାପାଳ ପ୍ରିୟ ରଞ୍ଜନ ପୃଷ୍ଟି, ପୌର ପ୍ରଶାସକ ତଥା ଏଡ଼ିଏମ କବିନ୍ଦ୍ର ସାହୁ ଓ ଏଡ଼ିଏମ ଅମିୟ କୁମାର ସାହୁ ମଂଚାସିନ ଥିଲେ । ମୁଖ୍ୟ ଅତିଥି ଶ୍ରୀ କୁଲାଙ୍ଗେ ମୋ ୱାର୍ଡ଼ କ୍ଷେତ୍ରରେ ହିଞ୍ଜିଳିକାଟୁର ବିଭିନ୍ନ ପଦକ୍ଷେପ ଆପଣେଇବା ପାଇଁ ଉପସ୍ଥିତ ଅଧିକାରୀ ମାନଙ୍କୁ ପରାମର୍ଶ ଦେଇଥିଲେ । ମୁଖ୍ୟତଃ ଉନ୍ନୟନ କାର୍ଯ୍ୟ ଅପେକ୍ଷା ଗୋଷ୍ଠୀ ସହଭାଗିତା ଦ୍ୱାରା ଏବଂ ଛୋଟ ଛୋଟ ତୃଟି ଗୁଡ଼ିକୁ ଧ୍ୟାନ କେନ୍ଦ୍ରିତ କରି ମୋ ୱାର୍ଡ଼ ସହ ସଂଶ୍ଳିଷ୍ଟ ବ୍ୟବସ୍ଥା ଉପରେ ଗୁରତ୍ୱପୁର୍ଣ୍ଣ ପଦକ୍ଷେପ ଗ୍ରହଣ କରିବାକୁ କହିଥିଲେ । ଏ ଦିଗରେ ସଫେଇ କର୍ମଚାରୀ, ସ୍ୱଚ୍ଛ ସାଥୀ ଓ ବିଭାଗୀୟ ଅଧିକାର ଓ ପ୍ରଶାସକଙ୍କ ସମେତ ସହରବାସୀଙ୍କ ସହଭାଗିତା ଉପରେ ଗୁରୁତ୍ୱାରୋପ କରିଥିଲେ । ଏହାକୁ ଅଧିକ କ୍ରିୟାଶୀଳ କରିବା ସକାଶେ ନିରପେକ୍ଷ ବ୍ୟକ୍ତିବିଶେଷଙ୍କ ବ୍ରାଣ୍ଡ ଆମ୍ବାସଡ଼ର ଭାବେ ନିୟୋଜିତ କରି ମୋ ୱାର୍ଡ଼ର ସଫଳତା ପାଇଁ ଜିଲ୍ଲା ସହରାଂଚଳ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ଶ୍ରୀ ମଣ୍ଡଳ ଉପସ୍ଥିତ ବିଭିନ୍ନ ବିଜ୍ଞାପିତ ଅଂଚଳ ପରିଷଦ ଓ ପୌର କାର୍ଯ୍ୟ ନିର୍ବାହୀ ଅଧିକାରୀ ମାନଙ୍କୁ ପରାମର୍ଶ ଦେଇଥିଲେ । ବାହ୍ୟ ମଳ, ମୁତ୍ର ମୁକ୍ତ ସହର ଭାବେ ହିଞ୍ଜିଳିକାଟୁ ପୌର ପରିଷଦ ଓ ରମ୍ଭା ଏନଏସି, ବାହ୍ୟ ମଳମୁକ୍ତ ସହର ଭାବେ ଗୋପାଳପୁର, କୋଦଳା ଓ ପୋଲସରା ଏନ,ଏ.ସି , ବର୍ଜ୍ୟବସ୍ତୁ ପରିଚାଳନା କ୍ଷେତ୍ରରେ ହିଞ୍ଜିଳିକାଟୁ ପୌର ପରିଷଦ, ମୋ ୱାର୍ଡ଼ ବୈଠକ ପାଇଁ ହିଞ୍ଜିଳିକାଟୁ ପୌର ପରିଷଦ ଓ ଦିଗପହଣ୍ଡି ଏନଏଏସି, ସ୍ୱଚ୍ଛ ସାଥୀଙ୍କ ଦ୍ୱାରା ୟୁଜର୍ସ ଫି ଆଦାୟ ସକାଶେ ଗଞ୍ଜାମ ଏନଏଏସିର ନିରୁପମା ତରାଇ, ରମ୍ଭା ଏନଏସିର ରଶ୍ମିତା ଟହଲ ଓ ଡ଼ଲି ଦାସ ଏବଂ ୟୁଜର୍ସ ଫି ଆଦାୟ ସକାଶେ ଗଞ୍ଜାମ,

ଛତ୍ରପୁର ଓ ରମ୍ଭା ଏନଏସି, ଜାତୀୟ ସହରାଂଚଳ ଜୀବିକା ମିଶନ ସକାଶେ ଆସିକା, ଗୋପାଳପୁର ଓ ବେଲଗୁଣ୍ଠା ଏନଏସି, ପ୍ରଧାନମନ୍ତ୍ରୀ ଆବାସ ଯୋଜାନା (ସହରାଂଚଳ) ଗୃହ ନିର୍ମାଣ କ୍ଷେତ୍ରରେ ସ୍ୱତନ୍ତ୍ରତା ସକାଶେ ଚିକିଟି ଏନଏଏସି, ରାଜସ୍ୱ ଆଦାୟ କ୍ଷେତ୍ରରେ ବେଲଗୁଣ୍ଠା, ବୁଗୁଡ଼ା ଓ ରମ୍ଭା ଏନଏଏସି ଓ ଟିକସ ସଂଗ୍ରହ କ୍ଷେତ୍ରରେ ଛତ୍ରପୁର ଏନଏଏସିର ଜି. ଜଗଦିଶ ରେଡ୍ଡି, ହିଞ୍ଜିଳିକାଟୁ ପୌର ପରିଷଦର ଭାସ୍କର ସାହୁ ଓ ଛତ୍ରପୁର ଏନଏଏସିର ଏସ. ଡ଼ାଲେୟାଙ୍କୁ ବ୍ୟକ୍ତିଗତ ପ୍ରଦର୍ଶନ ସକାଶେ ସିଲ୍ ଓ ପ୍ରଂଶସାପତ୍ର ପ୍ରଦାନ କରି ପୁରସ୍କୃତ କରାଯାଇଥିଲା । ଆୟୋଜିତ କର୍ମଶାଳାରେ ସ୍ଥାନୀୟ ତହସିଲଦାର ପ୍ରଭାତ କୁମାର ପରିଡ଼ା, ବିଡ଼ିଓ ପ୍ରସନ କୁମାର ପାତ୍ର, ଗଞ୍ଜାମ ଜିଲ୍ଲାର ୧୫ଟି ଏନଏଏସିର କାର୍ଯ୍ୟ ନିର୍ବାହୀ ଅଧିକାରୀଙ୍କ ସମେତ ବହୁ ଏନଏଏସିର ସ୍ୱଚ୍ଛସାଥୀ, ପରିମଳ ଅଧିକାରୀ ମାନେ ଉପସ୍ଥିତ ଥିଲେ । ପୌର ପରିଷଦର ସହକାରୀ ଯନ୍ତ୍ରୀ ପ୍ରମୋଦ ନାୟକ, କନିଷ୍ଠ ଯନ୍ତ୍ରୀ ମାନସ ରଞ୍ଜନ ଦାଶ,ଦିଲ୍ଲିପ କୁମାର ମିଶ୍ର ପରିଚାଳନା କରିଥିବା ବେଳେ ପରିମଳ ଅଧିକାରୀ ଅଭିଜିତ ପୁରୋହିତ, ସୁଶାନ୍ତ ବେହେରା, ଇ. କିଶାନ କୁମାର ପାତ୍ରଙ୍କ ସମେତ ପୌର କର୍ମଚାରୀ ବୃନ୍ଦ ସହଯୋଗ କରିଥିଲେ । ( ରିପୋର୍ଟ : ଶୁସାନ୍ତ ପ୍ରଧାନ )