ଅସାମାଜିକ କାର୍ଯ୍ୟକଳାପ ଉପରେ ପୁରୀ ପୋଲିସ ର କଡା ନଜର

ପୁରୀ (ଓଡିଶା ତାଜା ନ୍ୟୁଜ ) ନି. ପ୍ର :- ସହରରେ ଆଇନ-ଶୃଙ୍ଖଳା ପରିସ୍ଥିତିକୁ ଆହୁରି ସୁଦୃଢ କରିବା, ଅସାମାଜିକ କାର୍ଯ୍ୟକଳାପ ଉପରେ କଡା ନଜର ରଖିବା ଏବଂ ସାଧାରଣ ଜନତାଙ୍କ ମଧ୍ୟରେ ସୁରକ୍ଷା ଭାବନା ବୃଦ୍ଧି କରିବା ଲକ୍ଷ୍ୟରେ ପୁରୀ ଆରକ୍ଷୀ ଅଧୀକ୍ଷକ ପ୍ରତୀକ ସିଂଙ୍କ ନିର୍ଦ୍ଦେଶକ୍ରମେ ପୁରୀ ସହରର ବିଭିନ୍ନ ଅଞ୍ଚଳରେ ବ୍ୟାପକ ପେଟ୍ରୋଲିଂ ଓ ଯାଞ୍ଚ କାର୍ଯ୍ୟକ୍ରମ ଚାଲୁ ରହିଛି। ସିଟି ଡିଏସପି ରଶ୍ମିରଞ୍ଜନ ମହାପାତ୍ରଙ୍କ ନେତୃତ୍ୱରେ ଟାଉନ ଥାନା, ସି ବିଚ୍ ଥାନା, ଟ୍ରାଫିକ ଥାନା, କୁମ୍ଭାରପଡା ଥାନା, ବାଳିଆପଣ୍ଡା ଥାନା, ତାଳବଣିଆ ଥାନା ଏବଂ ବାସେଳୀସାହି ଥାନାର ଆଇଆଇସି ଓ ପୋଲିସ କର୍ମଚାରୀମାନେ ସହରର ବିଭିନ୍ନ ଛକ,

ଗଳିକନ୍ଦି, ସମୁଦ୍ରକୂଳ ଅଞ୍ଚଳ, ଖଟି ପ୍ଲେସ, ଅନ୍ଧାରୁଆ ଜାଗା, ସନ୍ଦେହଜନକ ସ୍ଥାନ ଏବଂ ଜନଗହଳିପୂର୍ଣ୍ଣ ସ୍ଥାନମାନଙ୍କରେ ସଂଘବଦ୍ଧ ଭାବେ ପେଟ୍ରୋଲିଂ କରିଥିଲେ। ଏହି ପେଟ୍ରୋଲିଂ ସମୟରେ ବିଭିନ୍ନ ସନ୍ଦେହଜନକ ବ୍ୟକ୍ତି ଓ ଯାନବାହନ ଉପରେ ଯାଞ୍ଚ କରାଯାଇଥିଲା। ରାତ୍ରି ସମୟରେ ଅସାମାଜିକ କାର୍ଯ୍ୟକଳାପ, ଚୋରି, ଛିନତାଇ, ନିଶା କାରବାର ଓ ଅନ୍ୟାନ୍ୟ ଅପରାଧମୂଳକ କାର୍ଯ୍ୟକୁ ରୋକିବା ନିମନ୍ତେ ପୋଲିସ ପକ୍ଷରୁ ବିଶେଷ ନଜର ରଖାଯାଇଥିଲା। ସାଧାରଣ ଲୋକଙ୍କ ସହ ପୋଲିସ ଅଧିକାରୀମାନେ ଆଲୋଚନା କରି ସୁରକ୍ଷା ସମ୍ପର୍କିତ ସଚେତନତା ବାର୍ତ୍ତା ଦେଇଥିଲେ।

ଅନ୍ଧାରୁଆ ଏବଂ ନିର୍ଜନ ସ୍ଥାନରେ ଅନାବଶ୍ୟକ ଭିଡ଼ ନ କରିବା, ସନ୍ଦେହଜନକ ବ୍ୟକ୍ତି କିମ୍ବା ଘଟଣା ଦେଖିଲେ ତୁରନ୍ତ ପୋଲିସକୁ ସୂଚନା ଦେବା ପାଇଁ ଅନୁରୋଧ କରାଯାଇଥିଲା। ପୁରୀ ପୋଲିସ ପକ୍ଷରୁ ସ୍ପଷ୍ଟ କରାଯାଇଛି ଯେ ସହରରେ ଶାନ୍ତି, ସୁରକ୍ଷା ଓ ଆଇନ-ଶୃଙ୍ଖଳା ରକ୍ଷା ପାଇଁ ଏଭଳି ପେଟ୍ରୋଲିଂ, ଚେକିଂ ଏବଂ ଫ୍ଲାଗ ମାର୍ଚ୍ଚ ଆଗାମୀ ଦିନରେ ମଧ୍ୟ ଜାରି ରହିବ। ଅସାମାଜିକ କାର୍ଯ୍ୟକଳାପରେ ଲିପ୍ତ ଥିବା ବ୍ୟକ୍ତିଙ୍କ ବିରୋଧରେ କଡା ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପୁରୀ ପୋଲିସ ସମସ୍ତ ନାଗରିକଙ୍କୁ ସହଯୋଗ ଓ ସଚେତନ ରହିବା ପାଇଁ ଅନୁରୋଧ କରୁଛି।