ଓଡ଼ିଶାରେ ଆୟୋଜିତ ହେବାକୁ ଯାଉଛି ଚତୁର୍ଥ  ଖଣି ଏବଂ ଭିତ୍ତିଭୂମି ଆନ୍ତର୍ଜାତୀୟ ଏକ୍ସପୋ ୨୦୨୬

ଓଡ଼ିଶାକୁ ଭାରତର ଖଣି ଶକ୍ତି ଏବଂ ଇନୋଭେସନ କେନ୍ଦ୍ର ଭାବେ ସ୍ଥାନିତ କରିବାକୁ ଲକ୍ଷ୍ୟ

ଅତ୍ୟାଧୁନିକ ପ୍ରଯୁକ୍ତି, ଇନୋଭେସନ ଓ ବିଶ୍ୱ ଶିଳ୍ପ ଉଦ୍ୟୋଗୀ ମାନଙ୍କ ପ୍ରଦର୍ଶନ

ବିଶ୍ୱ ଖଣି ଓ ଭିତ୍ତିଭୂମି ଶିଳ୍ପ ପାଇଁ ଏହା ଏକ ଉତ୍ସର୍ଗୀକୃତ ଏବଂ ସ୍ୱତନ୍ତ୍ର ବି2ବି ବାଣିଜ୍ୟ ପ୍ଲାଟଫର୍ମ

ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) :- “ଭାରତର ଖଣିଜ କେନ୍ଦ୍ର” ଭାବେ ପରିଚିତ ଓଡ଼ିଶା, ୨୦୨୬ ଜାନୁଆରୀ  ୮ରୁ ୧୧ ତାରିଖ ପର୍ଯ୍ୟନ୍ତ ଭୁବନେଶ୍ୱର ବରମୁଣ୍ଡା ପଡିଆରେ ଓଡ଼ିଶା ଖଣି ଓ ଭିତ୍ତିଭୂମି ଅନ୍ତର୍ଜାତୀୟ ଏକ୍ସପୋ ୨୦୨୬ର ଚତୁର୍ଥ ସଂସ୍କରଣ ଆୟୋଜନ କରି ଖଣି ଓ ଶିଳ୍ପ କ୍ଷେତ୍ରରେ ନିଜର ନେତୃତ୍ବକୁ ଦୃଢୀଭୂତ କରିବାକୁ ଯାଉଛି।

ଭାରତର ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦ୍ଵାରା ଉନ୍ମୋଚିତ ହୋଇଥିବା ୨୦୨୩ ଓ ୨୦୪୭ ମସିହା ପାଇଁ ବିକଶିତ ଓଡିଶା ଭିଜନ ଅନୁଶରଣରେ ଏହି ଆନ୍ତର୍ଜାତୀୟ ଏକ୍ସପୋ ରାଜ୍ୟରେ ଖଣି ଶିଳ୍ପ ପାଇଁ ଇକୋ ସିଷ୍ଟମକୁ ପ୍ରୋତ୍ସାହିତ କରିବା ଦିଗରେ ଏକ ଉପଯୁକ୍ତ ପଦକ୍ଷେପ । ଯାହାଦ୍ୱାରା ବିକଶିତ ଓଡିଶାର ଭିଜନକୁ ବାସ୍ତବରେ ପରିଣତ କରାଯାଇପାରିବ । ପରିବେଶ ଅନୁକୂଳ ଖଣି ପ୍ରଯୁକ୍ତିବିଦ୍ୟା, ଉପକରଣ, ସ୍ଥାୟୀ ଖଣିଜ କାର୍ଯ୍ୟକ୍ରମ ଏବଂ ବିଶ୍ଵସ୍ତରୀୟ ନେତୃତ୍ଵ ଉପରେ ଧ୍ୟାନ କେନ୍ଦ୍ରିତ କରି ଓଡିଶାକୁ ଏସିଆର ଖଣିଜ ସମ୍ପଦ କ୍ଷେତ୍ରରେ ଏକ ଅଗ୍ରଣୀ ଭୂମିକାରେ ପ୍ରତିଷ୍ଠା କରିବା ହେଉଛି ଏହି ଏକ୍ସପୋର ମୂଳ ଲକ୍ଷ୍ୟ ।

ଉଦ୍ଭାବନ, ସ୍ଥାୟୀତ୍ଵ ଏବଂ ଆଗକୁ ଚିନ୍ତାଶୀଳ ନୀତି ଦ୍ୱାରା ପରିଚାଳିତ ଓଡ଼ିଶାର ଖଣି କ୍ଷେତ୍ର ସମୃଦ୍ଧ ହେଉଛି । ରାଜ୍ୟର ଏହି ଦୃଢ଼ ପରିଚୟକୁ ଆଧାର କରି ପ୍ରଦର୍ଶନୀରେ ଖଣି ପ୍ରଯୁକ୍ତିବିଦ୍ୟା, ଯନ୍ତ୍ରପାତି ଓ ସେବାର ଅତ୍ୟାଧୁନିକ ଅଗ୍ରଗତି, ବିଶ୍ୱସ୍ତରରେ ଶିଳ୍ପପତି ଇନୋଭେଟର ଓ ନୀତି ନିର୍ମାତାମାନଙ୍କୁ ଯୋଡ଼ିବା ଭଳି ଅତ୍ୟାଧୁନିକ ଅଗ୍ରଗତିକୁ ଦର୍ଶାଯାଇଛି। ଭାରତର ସର୍ବବୃହତ ଖଣି ଏବଂ ଭିତ୍ତିଭୂମି ପ୍ରଦର୍ଶନୀ ଭାବରେ ଏହା ବଜାର ସମ୍ପ୍ରସାରଣ, ପ୍ରଯୁକ୍ତି ଆବିଷ୍କାର ଏବଂ ବ୍ୟବସାୟ ଅଭିବୃଦ୍ଧି ପାଇଁ ଅତୁଳନୀୟ ସୁଯୋଗ ପ୍ରଦାନ କରିବ |

ଓଡ଼ିଶା ଖଣି ଓ ଭିତ୍ତିଭୂମି ଅନ୍ତର୍ଜାତୀୟ ଏକ୍ସପୋ-୨୦୨୬ର ଚତୁର୍ଥ ସଂସ୍କରଣ ଘୋଷଣା କରି ଓଡ଼ିଶା ସରକାରଙ୍କ ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ହେମନ୍ତ ଶର୍ମା କହିଛନ୍ତି ଯେ, ‘ଓଡ଼ିଶାରେ ଆମେ ନିକଟରେ ଏକାଧିକ ବୃହତ୍ ପ୍ରକଳ୍ପକୁ ଅନୁମୋଦନ କରିଛୁ, ଯେଉଁଥିରେ ବିଭିନ୍ନ ପ୍ରମୁଖ କ୍ଷେତ୍ରରେ ଅନେକ ନିଯୁକ୍ତି ସୁଯୋଗସୃଷ୍ଟି ହୋଇଛି, ଯାହା ଶିଳ୍ପ ପୁଞ୍ଜିନିବେଶ ପ୍ରତି ଓଡ଼ିଶାର ଆକର୍ଷଣକୁ ଦର୍ଶାଉଛି । ମୁଁ ଭୁବନେଶ୍ୱରରେ ଆଗାମୀ ମାଇନିଂ ଏକ୍ସପୋର ଘୋଷଣା କରି ଆନନ୍ଦିତ, ଯେଉଁଥିରେ ନୀତି ଗଠନ, ନବସୃଜନ, ସ୍ଥାୟୀତା ଏବଂ ଭବିଷ୍ୟତ ଉଦ୍ୟୋଗ ଉପରେ ଆଲୋଚନା କରାଯିବ। ଏହି ବିଚାର ବିନିମୟ କେବଳ ଅର୍ଥପୂର୍ଣ୍ଣ ବାର୍ତ୍ତାଳାପ ସୃଷ୍ଟି କରିବ ନାହିଁ ବରଂ ଭାରତୀୟ ଖଣି ଶିଳ୍ପ ପାଇଁ ଏକ ସମନ୍ୱିତ ରୋଡମ୍ୟାପ୍ ପ୍ରସ୍ତୁତ କରିବାରେ ସହାୟକ ହେବ ଏବଂ ଏହାକୁ ବିଶ୍ୱ ବଜାରର ବିକଶିତ ଚାହିଦା ଏବଂ ଆଶା ସହିତ ଯୋଡ଼ିବ’।

ନାଲକୋର ପୂର୍ବତନ ଅଧ୍ୟକ୍ଷ ତଥା ଏମଡି ଶ୍ରୀଯୁକ୍ତ ତପନ କୁମାର ଚାନ୍ଦ କହିଛନ୍ତି, ‘ଏହି ଚତୁର୍ଥ ଓଡିଶା ଖଣି ଏବଂ ଭିତ୍ତିଭୂମି ଆନ୍ତର୍ଜାତୀୟ ପ୍ରଦର୍ଶନୀରେ ଶିଳ୍ପପତି, ଖଣିରେ କାର୍ଯ୍ୟରତ କର୍ମଚାରୀ, ଉଦ୍ଭାବକ ଏବଂ ଶିଳ୍ପ ବିଶେଷଜ୍ଞଙ୍କ ଏକତ୍ରିତ କରିବା ସହ ଖଣି ସମ୍ବନ୍ଧରେ ଶିଖର ସମ୍ମିଳନୀର ଆୟୋଜନ କ୍ଷେତ୍ରରେ ଓଡିଶାକୁ ବିଶ୍ଵ ର କେନ୍ଦ୍ର ଭାବରେ ପ୍ରତିଷ୍ଠା କରିବ । ଏହି ସମ୍ମିଳନୀ ରେ ୨୫୦ ରୁ ଅଧିକ ଆନ୍ତର୍ଜାତୀୟ ସ୍ତରୀୟ କମ୍ପାନୀ ଅଂଶଗ୍ରହଣ କରିବାର ସମ୍ଭାବନା ଅଛି । ବିଶ୍ଵର ଖଣି କ୍ଷେତ୍ରରେ ବ୍ୟବହୃତ ଉପକରଣ ନିର୍ମାତାମାନେ ସେମାନଙ୍କ ଉପକରଣ ଓ ପ୍ରଯୁକ୍ତିବିଦ୍ୟା ପ୍ରଦର୍ଶନ ପାଇଁ ଓଡ଼ିଶା ଆସୁଥିବାରୁ ମୁଁ ଦୃଢ ନିଶ୍ଚିତ ଯେ, ଖଣି ଉପକରଣ ନିର୍ମାଣ ଓ ଉତ୍ପାଦନ ର କେନ୍ଦ୍ର ଭାବରେ ଓଡିଶାକୁ ଚୟନ କରିବେ।

ଫ୍ୟୁଚରେକ୍ସ ଟ୍ରେଡ୍ ଫେୟାର ଆଣ୍ଡ ଇଭେଣ୍ଟସ୍ ପ୍ରାଇଭେଟ୍ ଲିମିଟେଡ୍‌ର ଅଧ୍ୟକ୍ଷ ସ୍ୱାମୀ ପ୍ରେମ ଅନ୍ୱେଶୀ କହିଛନ୍ତି, ବିଗତ ତିନି ବର୍ଷ ମଧ୍ୟରେ  ଓଡ଼ିଶା ଖଣି ଓ ଭିତ୍ତିଭୂମି ଆନ୍ତର୍ଜାତୀୟ ଏକ୍ସପୋ, ଭାରତ ତଥା ଭାରତ ବାହାରେ ଖଣିର ଭବିଷ୍ୟତ ପାଇଁ ଏକ ଶକ୍ତିଶାଳୀ ଉତ୍ପ୍ରେରକ ଭାବେ ଉଭା ହୋଇଛି । ୨୦୨୬ର ସଂସ୍କରଣ ଏହି ଗତିକୁ ଅଧିକ ସୁଦୃଢ଼ ଜାରି ରଖିଛି, ଏକ ଚାରି ଦିନିଆ ବିଶ୍ୱସ୍ତରୀୟ ପ୍ଲାଟଫର୍ମ ପ୍ରଦାନ କରୁଛି ଯେଉଁଠାରେ ନୀତି ନିର୍ଧାରକ, ନିବେଶକ, ଉଦ୍ୟୋଗପତି ଏବଂ ଖଣି ପେସାଦାରମାନେ ଏକତ୍ରିତ ହୋଇ ଭାରତର ଶିଳ୍ପ ବିକାଶର ନିମିତ୍ତେ ଆଲୋଚନା କରିପାରିବେ । ବୈଷୟିକ ସମନ୍ଵୟ, ଦକ୍ଷତା ବିକାଶ ଏବଂ ରପ୍ତାନି ଭିତ୍ତିକ ଅଭିବୃଦ୍ଧି ଉପରେ ଗୁରୁତ୍ୱ ଦେବା ସହିତ ଏହି ପ୍ରଦର୍ଶନୀ ୨୦୩୦ ସୁଦ୍ଧା ଏକ ନମ୍ବର ଖଣି ରାଜସ୍ୱ ଉତ୍ପାଦନକାରୀ ରାଜ୍ୟରେ ପରିଣତ ହେବା ପାଇଁ ଓଡ଼ିଶା ସରକାରଙ୍କ ଦୃଷ୍ଟିକୋଣକୁ ସମର୍ଥନ କରୁଛି, ଯାହା ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ, ବିରଳ ପୃଥିବୀ ତତ୍ତ୍ୱ ଏବଂ ରଣନୈତିକ ଖଣିରେ ବିପୁଳ ସମ୍ଭାବନାକୁ ଉନ୍ମୋଚନ କରିବ ।

ପୂର୍ବର ସଫଳତାକୁ ଆଧାର କରି ଫ୍ୟୁଚରେକ୍ସ ଟ୍ରେଡ୍ ଫେୟାର ଆଣ୍ଡ ଇଭେଣ୍ଟସ୍ ପ୍ରାଇଭେଟ୍ ଲିମିଟେଡ୍ ପକ୍ଷରୁ ଓଡ଼ିଶା ଖଣି ଓ ଭିତ୍ତିଭୂମି ଆନ୍ତର୍ଜାତୀୟ ଏକ୍ସପୋ ୨୦୨୬ ଆୟୋଜନ କରାଯାଉଛି, ଯେଉଁଥିରେ ଖଣି ଯନ୍ତ୍ରପାତି, ଉପକରଣ, ଉନ୍ନତ ଜ୍ଞାନକୌଶଳ ସମାଧାନ, ସେବା ଏବଂ ଯୋଗାଣ କ୍ଷେତ୍ରରେ ଅତ୍ୟାଧୁନିକ ଉଦ୍ଭାବନକୁ ପ୍ରଦର୍ଶିତ କରାଯିବ । ଭାରତ, ଜର୍ମାନୀ, ଆମେରିକା, ବ୍ରିଟେନ୍, ଅଷ୍ଟ୍ରେଲିଆ, ବ୍ରାଜିଲ୍, ଚିଲି ଭଳି ପ୍ରମୁଖ ଦେଶ ସମେତ ୨୫ରୁ ଅଧିକ ଦେଶବ୍ୟାପୀ ବ୍ୟାପିଥିବା ଏହି ଏକ୍ସପୋ ଆନ୍ତର୍ଜାତିକ ଦୃଷ୍ଟି ଆକର୍ଷଣ କରିବାକୁ ଲକ୍ଷ୍ୟ ରଖିଛି ।ତୃତୀୟ ଓଡ଼ିଶା ଖଣି ଓ ଭିତ୍ତିଭୂମି ଆନ୍ତର୍ଜାତୀୟ ଏକ୍ସପୋ ୨୦୨୫ରେ ବ୍ୟବସାୟ ଉତ୍ପାଦନରେ ଉଲ୍ଲେଖନୀୟ ଅଭିବୃଦ୍ଧି ଘଟିଛି । ଏହି ଏକ୍ସପୋରେ ୩୦% ଅଭିବୃଦ୍ଧି ଘଟିଥିଲା, ଯେଉଁଥିରେ ଶିଳ୍ପପତି, ସରକାରୀ ପ୍ରତିନିଧି ଏବଂ ନୀତି ନିର୍ଧାରକଙ୍କ ସମେତ ୧୫,୦୦୦ରୁ ଅଧିକ ବ୍ୟବସାୟୀ ପର୍ଯ୍ୟଟକ ଆକର୍ଷିତ ହୋଇଥିଲେ ।