ପୁରୀ (ଓଡ଼ିଶା ତାଜା ନ୍ୟୁଜ୍) ପୁରୀ :- ସ୍ନାନପୂର୍ଣ୍ଣିମା ଦିନ ଶ୍ରୀମନ୍ଦିରସ୍ଥ ସ୍ନାନବେଦୀରେ ଚତୁର୍ଦ୍ଧାମୂର୍ତ୍ତି ୧୦୮ଗରା ଅଭିମନ୍ତ୍ରିତ ଅଧିବାସ ସୁବାସିତ ଜଳରେ ସ୍ନାନ କରିବା ପରେ ଭିଷଣ ଜ୍ବରରେ ପୀଡିତ ହୋଇ ଅଣସର ଘରେ ଅବସ୍ଥାନ କରୁଛନ୍ତି । ଶ୍ରୀମନ୍ଦିରରେ ଭକ୍ତ ଶ୍ରୀଜୀଉଙ୍କ ଦର୍ଶନ କରିନପାରି ବ୍ୟାକୁଳ ହେଉଛନ୍ତି । ଏହି ସମୟରେ ବ୍ରହ୍ମଗିରିସ୍ଥିତ ଶ୍ରୀଅଲାରନାଥ ଚତୁର୍ଦ୍ଧାମୂର୍ତ୍ତି ନାରାୟଣଙ୍କୁ ଦର୍ଶନ କରି ଶ୍ରୀଜୀଉଙ୍କ ଦର୍ଶନର ସମପୂଣ୍ଯ ଫଳ ପ୍ରାପ୍ତ ହୋଇଥାଏ ବୋଲି ବିଶ୍ଵାସ ରହିଛି । ଅଣସର ସମୟରେ ଗୋଟିଏ ଦିନ ଶ୍ରୀଅଲାରନାଥଙ୍କୁ ଦର୍ଶନ କଲେ କୋଟିପୂଣ୍ୟ ମିଳିଥାଏ ବୋଲି ବିଶ୍ଵାସ ରହିଛି । ଶ୍ରୀଅଲାରନାଥଙ୍କ ପ୍ରିୟ ଭୋଗ ଖୀରି ହୋଇଥିବାରୁ ଖୀରି ପ୍ରିୟ ଶ୍ରୀଅଲାରନାଥ ବୋଲି ଭକ୍ତମାନେ କହିଥାନ୍ତି ।
କେମିତି ଶ୍ରୀଅଲାରନାଥଙ୍କୁ ଦର୍ଶନ କରିବେ- ଶ୍ରୀକ୍ଷେତ୍ର ପୁରୀ ସ୍ଥିତ ନରେନ୍ଦ୍ରକୋଣ ଜଟିଆ ବାବାଜୀ ଛକ ଠାରୁ ପୁରୀ ସାତପଡା ରାସ୍ତାରେ ୨୦ କିଲୋମିଟର ଯିବା ପରେ ବ୍ରହ୍ମଗିରି ଗୋପ ଛକ ପଡିଥାଏ । ଏହି ଛକର ବାମ ପାର୍ଶ୍ବରେ ଶ୍ରୀଅଲାରନାଥଙ୍କ ତୋରଣ ଦୃଶ୍ଯମାନ ହୁଏ । ତୋରଣ ଠାରୁ ଅଳ୍ପ ଦୂର ଗଲେ ଶ୍ରୀଅଲାରନାଥଙ୍କ ମନ୍ଦିର ପଡିଥାଏ । ପୁରୀ ବସଷ୍ଟାଣ୍ଡରୁ ସାତପଡା ବସରେ ବ୍ରହ୍ମଗିରି ଯାଇପାରିବେ । ଭଡା ଟ୍ଯାକ୍ସି ଓ ଅଟୋରେ ମଧ୍ଯ ଯାଇପାରିବେ ।
ମନ୍ଦିରର ଇତିହାସ-ଶ୍ରୀଅଲାରନାଥ ଦେବଙ୍କ ମନ୍ଦିର କେବେ ନିର୍ମାଣ ହୋଇଥିଲା, କିଏ ନିର୍ମାଣ କରିଥିଲେ, ତାହା ଅଦ୍ୟାବଧି ଐତିହାସିକ ଓ ପ୍ରତ୍ନତତ୍ତ୍ବବିତ୍ ମାନେ ସଠିକ ମସିହା ନିରୁପଣ କରିପାରି ନାହାଁନ୍ତି ।
ମନ୍ଦିରର କାରୁକାର୍ଯ୍ୟକୁ ଦେଖି ଏହା ନବମ ଶତାବ୍ଦୀର ବୋଲି ଅନୁମାନ କରାଯାଉଛି । ମନ୍ଦିରର ମୁଖଶାଳା, ଜଗମୋହନ ଓ ଗର୍ଭଗୃହ ରହିଛି । ଆର୍ତ୍ତବଲ୍ଲଭ ମହାନ୍ତିଙ୍କ ଲିଖିତ ମାଦଳାପାଞ୍ଜିରୁ ମଦନ ମହାଦେବଙ୍କ ରାଜତ୍ବ କାଳରେ ୧୧୭୧ ରୁ ମନ୍ଦିର ନିର୍ମାଣ କରାଯାଇଥିଲା । ଏହା ଭାଙ୍ଗି ଯିବା ପରେ ମୃତ୍ୟଞ୍ଜୟ ନାୟକଙ୍କ ସମୟରେ ୧୨୧୦ ଖ୍ରୀଷ୍ଟାବ୍ଦରେ ଶ୍ରୀମନ୍ଦିର ନିର୍ମାଣର ୨୦ ବର୍ଷ ପୂର୍ବରୁ ନିର୍ମାଣ କରାଯାଇଥିବା ଅନୁମାନ କରାଯାଉଛି । ଶ୍ରୀଅଲାରନାଥଙ୍କ ନାମକରଣ-ସତ୍ଯ ଯୁଗରେ ବ୍ରହ୍ମା ଶ୍ରୀବିଷ୍ଣୁଙ୍କ ଉପାସନା ଏହି ଗିରି ଉପରେ କରିଥିବାରୁ ଏହାର ନାମ ବ୍ରହ୍ମଗିରି ହୋଇଛି । ଦକ୍ଷିଣ ଭାରତର ଶ୍ରୀବିଷ୍ଣୁଙ୍କ ଉପାସକ ମାନଙ୍କୁ ଅଲବର କୁହନ୍ତି । ଶ୍ରୀଅଲାରନାଥଙ୍କ ପ୍ରତିମା ଟି ଦକ୍ଷିଣ ଭାରତୀୟ ମୂର୍ତ୍ତି ସହ ସାମଞ୍ଜସ୍ଯ ରହିଛି ।
ଏହି ଅଲବର ସମ୍ପ୍ରଦାୟର କିଛି ବ୍ରାହ୍ମଣ ପରିବାର ଶ୍ରୀନାରାୟଣଙ୍କ ମୂର୍ତ୍ତି ସ୍ଥାପନ କରି ପୂଜା ଓ ଉପାସନା କରୁଥିଲେ । କାଳକ୍ରମେ ଆଲବରଙ୍କ ନାଥଙ୍କୁ ଅଲବରନାଥ କାଳକ୍ରମେ ଶ୍ରୀଅଲାରନାଥଙ୍କ ନାମକରଣ ହୋଇଥିବା ଅନୁମେୟ । ସେହି ଗ୍ରାମର ନାମ ଅଲବର ପଟନମ ଓ ପରେ ଅଲାରପାଟଣା ଏବେ ଅଲାରପୁର ନାମରେ ପରିଚିତ । ଶ୍ରୀଅଲାରନାଥଙ୍କ ବିଗ୍ରହ- ଶ୍ରୀଅଲାରନାଥଙ୍କ ବିଗ୍ରହ ସାକ୍ଷାତ ନାରାୟଣ ମୂର୍ତ୍ତି । ମୂର୍ତ୍ତିର ବାମ ଓ ଦକ୍ଷିଣ ପାର୍ଶ୍ବ ଏକ ତୋରଣ ବିଶିଷ୍ଟ ଗୋଟିଏ କଳାମୁଗୁନି ପଥରରେ ଏହା ନିର୍ମିତ ହୋଇଛି ।
ଶ୍ରୀବିଗ୍ରହଙ୍କ ଉଚ୍ଚତା ସାଢେ ପାଞ୍ଚ ଫୁଟ । ଶ୍ରୀବିଗ୍ରହଙ୍କ ଦୁଇପାଦ ପାର୍ଶ୍ବରେ ଭୂଦେବୀ ଓ ଶ୍ରୀଦେବୀ ବିରାଜମାନ । ଚରଣ ତଳେ ଶ୍ରୀଗରୁଡ ମୂର୍ତ୍ତି ପ୍ରାର୍ଥନାରତ । ମୂର୍ତ୍ତିର ଦୁଇ ପାର୍ଶ୍ବରେ ଲଳିତା ଓ ବିଶାଖା ଚାମରରତ । ତୋରଣ ଉପରେ ବ୍ରହ୍ମା ଓ ଶିବ ବିରାଜମାନ । କର୍ଣ୍ଣରେ ମକର କୁଣ୍ଡଳ ଧାରଣ କରିଛନ୍ତି । କଣ୍ଠରେ ରତ୍ନହାର ବିଦ୍ଯମାନ । ସ୍କନ୍ଧରେ ଯଜ୍ଞ ପବିତ ଧାରଣ କରିଛନ୍ତି । ପାଦରେ ନୂପୁର, ହସ୍ତରେ ବାହୁଟି, ଆଙ୍ଗୁଠିରେ ମୁଦ୍ରିକା, ଉର୍ଦ୍ଧ୍ବ ବାମ ହସ୍ତରେ ଶଙ୍ଖ, ଉର୍ଦ୍ଧ୍ବ ଡାହାଣ ହସ୍ତରେ ଚକ୍ର । ନିମ୍ନ ବାମ ହସ୍ତରେ ଗଦା ଓ ନିମ୍ନ ଡାହାଣ ହସ୍ତରେ ପ୍ରଭୁଙ୍କ ପାପୁଲିରେ ପଦ୍ମ ଚିହ୍ନ ରହିଛି । ବିଗ୍ରହଟି କଳା ମୁଗୁନି ପଥରରେ ଜୀବନ୍ତ ଭାବେ ଭକ୍ତଙ୍କୁ ଦୃଶ୍ଯମାନ ହୁଅନ୍ତି । ଏଣୁ ଶ୍ରୀଅଲାରନାଥଙ୍କୁ ଚତୁର୍ଦ୍ଧାମୂର୍ତ୍ତି ନାରାୟଣ ଭାବେ ଭକ୍ତ ଦର୍ଶନ କରିଥାଏ । ଶ୍ରୀମନ୍ଦିରରେ ଭକ୍ତ ଶ୍ରୀବଳଭଦ୍ର, ଦେବୀ ମା ସୁଭଦ୍ରା, ଶ୍ରୀଜଗନ୍ନାଥ ଓ ଶ୍ରୀସୁଦର୍ଶନଙ୍କୁ ଚତୁର୍ଦ୍ଧାମୂର୍ତ୍ତି ଭାବେ ଦର୍ଶନ କରିଥାଏ ।
ଆସ ଅଲାର ଖାଓ ଖୀରି-ଖୀରି ପ୍ରିୟ ଶ୍ରୀଅଲାରନାଥ । ପ୍ରଭୁ ଗରମ ଖୀରି ଯୋଗୁ ହାତ ଓ ମୁହଁରେ ଫୋଟକା ଚିହ୍ନ ରହିଛି । ଖୀରି ସମ୍ପର୍କରେ ଏକ କୌତୁହଳ କାହାଣୀ ରହିଛି । ହଟକିଶୋର ପ୍ରତିହାରୀଙ୍କ ଶ୍ରୀଅଲାରନାଥଙ୍କ ମହିମା ପୁସ୍ତକରେ ବର୍ଣ୍ଣିତ ରହିଛି ଯେ ପ୍ରଭୁଙ୍କ ପୂଜା ପାଇଁ ଦକ୍ଷିଣାତ୍ଯର କୋମା ବ୍ରାହ୍ମଣ ଶ୍ରୀକେତନଙ୍କ ପୂଜା ପାଳି ଥିଲା । ଶ୍ରୀକେତନ କୌଣସି କାମରେ ବାହାରକୁ ଯାଇଥିଲେ । ତାଙ୍କର ଏକମାତ୍ର ୮ ବର୍ଷର ପୁତ୍ର ମଧୁସୂଦନଙ୍କୁ ପାଣି ଛିଞ୍ଚି ଭୋଗ ପାଇଁ କହିଥିଲେ । ମଧୁସୂଦନଙ୍କ ମା ଖୀରି ରାନ୍ଧି ପିତଳ ତସଲାରେ ପୁଅକୁ ପୂଜା ପାଇଁ ପଠାଇଥିଲେ । ପୁଅ ମନ୍ଦିରରେ ଖୀରି ଭୋଗ ଥୋଇ କବାଟ ବନ୍ଦ କରି ସାଙ୍ଗମାନଙ୍କ ସହ ଖେଳୁଥିଲା । ବିଳମ୍ବ ହେବାରୁ ମା ମନ୍ଦିରରୁ ପ୍ରସାଦ ଆଣିବା ପାଇଁ ତାଗିଦ କରିଥିଲେ ।
ମଧୁସୂଦନ କବାଟ ଖୋଲି ଦେଖିଲା ପ୍ରଭୁ ଖିରୀ ଖାଇନାହାନ୍ତି । ଭୋ ଭୋ ହୋଇ କାନ୍ଦିଥିଲା ଓ କହିଥିଲା ଆସ ଅଲାର ଖାଅ ଖିରୀ, ବାପା ଯାଇଛନ୍ତି ବିଦେଶ କରି । ବାପା ଯାଇଛନ୍ତି ବାହାର ଗାଁ ମୁଁ ନଜାଣେ ଦିଅଁଙ୍କ ନାଁ । ଛୋଟ ପିଲାର ଆକୁଳ ନିବେଦନ ଓ ବ୍ୟାକୁଳ କ୍ରନ୍ଦନ ଶୁଣି ଠାକୁର ସବୁ ଖିରୀ ଖାଇଦେଲେ । ଖାଲି ପିତଳ ନେଇ ମଧୁସୂଦନ ଘରକୁ ଗଲା ମାଆ ପଚାରିଲେ ପ୍ରସାଦ କାହିଁ । ପୁଅ କହିଲା ଠାକୁର ସବୁ ଖାଇଦେଲେ ମୁଁ ନିଜ ଆଖିରେ ଦେଖିଛି । ମାଆ କହିଲେ ତୋ ବାପା ଷୋଡ଼ଶ ଉପଚାର ମନ୍ତ୍ର ପାଠ କରି ଭୋଗ ଲଗାନ୍ତି । ଠାକୁର ଖୀରି ଖାଆନ୍ତି ନାହିଁ । ତୁ ମନ୍ତ୍ର ନଜାଣି ଠାକୁର କେମିତି ତୋ ଖିରି ଖାଇଲେ । ତାପର ଦିନ ମାଆ ଖୀରି ରାନ୍ଧି ପୁଅ ପଠାଇଲେ ।
ପୁଅ କବାଟ ବନ୍ଦ କରି ଆସିବା ପରେ କବାଟ ଫାଙ୍କରେ ମାଆ ଦେଖିଲେ ଠାକୁର ଆନନ୍ଦରେ ଖୀରି ପ୍ରସାଦ ଖାଉଛନ୍ତି । ବାପା ଆସିବା ପରେ ମାଆ ସବୁ କଥା କହିଲେ । ତାପର ଦିନ ପୁଅ ଖୀରି ରଖି ପୂର୍ବ ପରି ରଖିଥିଲା । ବାପା କବାଟ ଛିଦ୍ରରେ ଦେଖିଲେ ପ୍ରଭୁ ଖିରି ଖାଉଛନ୍ତି । ବାପା କବାଟ ଖୋଲି ଦେବାରୁ ଠାକୁର ଅନ୍ତର୍ଧାନ ହୋଇଯିବା ପରେ ଠାକୁରଙ୍କ ମୁହଁରେ ଓ ହାତରେ ଫୋଟକା ଚିହ୍ନ ରହିଯାଇଛି । ଶ୍ରୀଚୈତନ୍ୟଙ୍କ ଦର୍ଶନ- ଭକ୍ତି ଆନ୍ଦୋଳନର ମୁଖ୍ଯ ପୁରୋଧା ଶ୍ରୀଚୈତନ୍ଯ ଶ୍ରୀକ୍ଷେତ୍ରରେ ୧୮ ବର୍ଷ ରହି ନାମ ଭକ୍ତି ଆନ୍ଦୋଳନକୁ ଗାଁ ଗାଁରେ ପ୍ରଚାର କରୁଥିଲେ । ଶ୍ରୀଚୈତନ୍ୟ ମହାପ୍ରଭୁଙ୍କ ସ୍ନାନ ଯାତ୍ରା ଓ ହାତୀବେଶ ଦେଖି ମହା ଆନନ୍ଦିତ ହୋଇଥିଲେ ।
ଅନବସର ସମୟରେ ଶ୍ରୀମନ୍ଦିରକୁ ଯାଇ ଶ୍ରୀଜୀଉଙ୍କ ଦର୍ଶନ ନପାଇ ଦୁଃଖ ମନରେ ଫେରିଥିଲେ । ମନ ଦୁଃଖରେ ସମୁଦ୍ରକୂଳେ କୂଳେ ଯାଇ ଶ୍ରୀଅଲାରନାଥଙ୍କ ପୀଠରେ ପହଞ୍ଚିଥିଲେ । ଶ୍ରୀଚୈତନ୍ୟ ପ୍ରଭୁଙ୍କୁ ନଦେଖି ଦର୍ଶନ ବିରହ ଜ୍ବାଳାରେ ଉତ୍ତପ୍ତ ହୋଇଯାଇଥିଲେ । ଶ୍ରୀଅଲାରନାଥଙ୍କୁ ଚତୁର୍ଦ୍ଧାମୂର୍ତ୍ତି ନାରାୟଣ ରୂପରେ ଦେଖି ସ୍ରଷ୍ଟାଙ୍କ ପ୍ରଣିପାତ କରିଥିଲେ । ଯେଉଁ ପଥର ଉପରେ ପ୍ରଣିପାତ କରିଥିଲେ ସେହି ସ୍ଥାନରେ ଶରୀରର ଚିହ୍ନ ରହିଯାଇଥିଲା । ସେହି ପଥରଟି ମନ୍ଦିର ବେଢାରେ ପଡି ରହିଥିଲା । ପରେ ଚୈତନ୍ୟଙ୍କ ମନ୍ଦିର ନିର୍ମାଣ କରାଯାଇ ପଥରକୁ ରଖାଯାଇଛି । ଅନବସର ସମୟରେ ହଜାର ହଜାର ଚୈତନ୍ୟଙ୍କ ଭକ୍ତ ପୁରୀରୁ ସଂକୀର୍ତ୍ତନ ଯାତ୍ରା କରି ଶ୍ରୀଅଲାରନାଥଙ୍କୁ ଦର୍ଶନ କରିଥାନ୍ତି ।
ପର୍ବପର୍ବାଣୀ-ଶ୍ରୀଅଲାରନାଥଙ୍କ ମନ୍ଦିରରେ ଶ୍ରୀମନ୍ଦିର ପରି ଅନେକ ପର୍ବପର୍ବାଣୀ ଓ ଯାନିଯାତ୍ରା ଅନୁଷ୍ଠିତ ହେଉଛି । ପର୍ବପର୍ବାଣୀମାନଙ୍କ ମଧ୍ଯରେ ଅନବସର ଉତ୍ସବ ୧୪ ଦିନ, ମହାଅନବସର ୪୪ ଦିନ, ଚିତାଲାଗି ଅମାବାସ୍ଯା,ଝୁଲଣ ଯାତ୍ରା, ଗହ୍ମାପୂର୍ଣିମା, ଜନ୍ମାଷ୍ଟମୀ, ନନ୍ଦ ଉତ୍ସବ, କୁମାର ପୂର୍ଣ୍ଣିମା , ଦଶହରା, ସପ୍ତପୁରୀ ଅମାବାସ୍ୟା, ପ୍ରଥମାଷ୍ଟମୀ, ଦେବ ଦୀପାବଳି, ଓଢ଼ଣ ଷଷ୍ଠୀ, ନବାଙ୍କ,ଧନୁସଂକ୍ରାନ୍ତି, ପହିଲି ଭୋଗ, ନବାର୍ହ୍ନ, ମକର ସଂକ୍ରାନ୍ତି,ବକୁଳ ଅମାବାସ୍ୟା,ବସନ୍ତ ପଞ୍ଚମୀ, ପୁଷ୍ୟାଭିଷେକ, ଦୋଳଯାତ୍ରା,ଦୋଳପୂର୍ଣ୍ଣିମା, ପଣାସଂକ୍ରାନ୍ତି ଓ ଚନ୍ଦନଯାତ୍ରା ଅନୁଷ୍ଠିତ ହୁଏ । ଠାକୁର ଙ୍କ ବେଶ-ଶ୍ରୀଅଲାରନାଥଙ୍କୁ ବିଭିନ୍ନ ବେଶ କରାଯାଇଥାଏ । ସର୍ବାଙ୍ଗ ଚନ୍ଦନ ବେଶ, ଅନବସର ବେଶ ୧୪ ଦିନ, ରାଜାଧିରାଜ ବେଶ, ରାଧାଦାମୋଦର ବେଶ, କାର୍ତ୍ତିକ ମାସରେ ଲକ୍ଷ୍ମୀନାରାୟଣ ବେଶ, ଘୋଡଲାଗି ବେଶ ଅନୁଷ୍ଠିତ ହୋଇଥାଏ ।
ମନ୍ଦିରର ଦେବାଦେବୀ- ଶ୍ରୀଅଲାରନାଥ ମନ୍ଦିର ପରିସରରେ ଅନେକ ଦେବାଦେବୀ ପୂଜା ପାଉଛନ୍ତି । ସିଂହଦ୍ବାର ଠାରେ ଦୁଇଟି ସିଂହ, କାଶୀବିଶ୍ବନାଥ, ମହାଲକ୍ଷ୍ମୀ ମନ୍ଦିର, ଶ୍ରୀଚୈତନ୍ୟଙ୍କ ମନ୍ଦିର, ନବଗ୍ରହ ପ୍ରସ୍ତର, ଯଜ୍ଞ ମଣ୍ଡପ, ଦୋଳବେଦୀ, ଗଣେଶ ଆଦି ପୂଜା ପାଉଛନ୍ତି ।
ନୀତିକାନ୍ତି- ସକାଳୁ ଦ୍ବାର ଫିଟା, ଅବକାଶ, ଚନ୍ଦନ ଲାଗି, ବଲ୍ଲଭ ଧୂପ, ସୂର୍ଯ୍ଯ ପୂଜା, ଦ୍ବାରପାଳ ପୂଜା, ବଲ୍ଲଭ ଧୂପରେ ଖଇ,ନଡିଆ ପାତି ଚୁଡା ଭୋଗ, ରୋଷହୋମ, ସକାଳ ଧୂପରେ ଖେଚୁଡି ଅନ୍ନ, ଡାଲି, ତରକାରି ଭୋଗ ଲାଗି କରାଯାଇଥାଏ ।
ଦ୍ବିପ୍ରହର ଧୂପରେ ଖୀରି ଭୋଗ ଓ ପ୍ରସାଦ ଲାଗି ହୋଇଥାଏ । ପରେ ପହୁଡ ନୀତି, ଅପରାହ୍ନ ୪ଟାରେ ପହୁଡ ଖୋଲିବା ପରେ ସଂଧ୍ଯାରେ ଆଳତି ଓ ବେଶ ଓଲାଗି ସହ ନୂତନ ବେଶ କରାଯାଇଥାଏ । ପରେ ଅନ୍ଯାନ୍ଯ ନୀତି ପରେ ବଡସିଂହାର ବେଶ ହୋଇ ପହୁଡ ହୋଇଥାନ୍ତି । ପ୍ରତିବର୍ଷ ଅନବସର ସମୟରେ ଲକ୍ଷାଧିକ ଭକ୍ତ ଶ୍ରୀ ଅଲାରନାଥ ଦର୍ଶନ କରିଥାନ୍ତି । ମନ୍ଦିରର ଏକ ପରିଚାଳନା କମିଟି ରହିଛି । ସ୍ଥାନୀୟ ତହସିଲଦାର ମଧ୍ୟବର୍ତ୍ତୀକାଳୀନ ନ୍ଯାସି ଭାବେ କାର୍ଯ୍ଯରତ । ସେବା ପୂଜା ପାଇଁ ଅଲାରପୁର ଗ୍ରାମରେ ଶୁଦ୍ର ସେବାୟତ ଓ ଗୋପ ଗ୍ରାମରେ ପଣ୍ଡା,ସୁଆର ଓ ବ୍ରାହ୍ମଣ ସେବକ ରହିଛନ୍ତି ।
