ଉଦଘାଟନ ହେଲା ପଳାଶୁଣୀ ଫୁଟ୍ ଓଭରବ୍ରିଜ୍

– ଲୋକଙ୍କ ଉଦ୍ଦେଶ୍ୟରେ ଉତ୍ସର୍ଗୀକୃତ କଲେ ସାଂସଦ ଅପରାଜିତା

– ଟଙ୍କପାଣି ସାଇ ମନ୍ଦିର ପାଖରେ ହେବ ଓଭରବ୍ରିଜ୍

– ନଖରା ସମ ହସ୍ପିଟାଲ ପାଖରେ ଆଉ ଏକ ଫୁଟ୍ ଓଭରବ୍ରିଜ୍

୦୭ ମାର୍ଚ୍ଚ ୨୦୨୫ (ଓଡ଼ିଶା ତାଜା ନ୍ୟୁଜ୍) ପଳାଶୁଣୀ :- ବହୁ ପ୍ରତୀକ୍ଷିତ ପଳାଶୁଣୀ ଫୁଟ୍ ଓଭରବ୍ରିଜ୍ ଆଜି ଉଦଘାଟନ ହୋଇଛି । ସାଂସଦ ଅପରାଜିତା ଷଡ଼ଙ୍ଗୀ ଏହାକୁ ଉଦଘାଟନ କରିଛନ୍ତି। ଲୋକଙ୍କ ଉଦ୍ଦେଶ୍ୟରେ ସେ ଏହାକୁ ଉତ୍ସର୍ଗୀକୃତ କରିଛନ୍ତି । ଫଳରେ ପଳାଶୁଣୀ ସମେତ ଆଖପାଖ ଅଞ୍ଚଳର ବାସିନ୍ଦାଙ୍କ ଦୀର୍ଘଦିନର ଦାବି ପୂରଣ ହୋଇଛି । ସାଂସଦ ଶ୍ରୀମତୀ ଷଡ଼ଙ୍ଗୀ କହିଛନ୍ତି, ଗତ କିଛି ବର୍ଷ ଭିତରେ ପଳାଶୁଣୀ ଛକ ଜାତୀୟ ରାଜପଥ ଉପରେ 200ରୁ ଅଧିକ ଦୁର୍ଘଟଣା ହୋଇଛି । ଏଥିରେ ଅନେକ ମୃତାହତ ହୋଇଛନ୍ତି।

ଏହି ସ୍ଥାନରେ ଫୁଟ୍ ଓଭରବ୍ରିଜ୍ ନିର୍ମ।ଣ ପାଇଁ ଦୀର୍ଘ ଦିନରୁ ଦାବି ହେଉଥିଲା । ତେବେ ସାଂସଦ ଶ୍ରୀମତୀ ଷଡ଼ଙ୍ଗୀ ଏହି ଦାବିକୁ ଗୁରୁତର ସହ ନେଇ ଫୁଟ୍ ଓଭରବ୍ରିଜ୍ ନିର୍ମ।ଣ ପାଇଁ ପ୍ରୟାସ ଆରମ୍ଭ କରିଥିଲେ। ଗତବର୍ଷ ଜୁଲାଇ ମାସ ୧୯ ତାରିଖରେ ସେ କେନ୍ଦ୍ର ସଡ଼କ ପରିବହନ ଓ ରାଜମାର୍ଗ ମନ୍ତ୍ରୀ ନୀତିନ ଗଡ଼କରୀଙ୍କୁ ଭେଟି ପଳାଶୁଣୀଠାରେ ଫୁଟ୍ ଓଭରବ୍ରିଜ୍ ପାଇଁ ପ୍ରସ୍ତାବ ଦେଇଥିଲେ। କେନ୍ଦ୍ରମନ୍ତ୍ରୀ ତତ୍କାଳ ପଦକ୍ଷେପ ନେଇ ଏହି ପ୍ରସ୍ତାବକୁ ମଞ୍ଜୁରୀ ଦେବା ସହ ପ୍ରକଳ୍ପ ପାଇଁ 3 କୋଟି ଟଙ୍କାର ଅନୁମୋଦନ ଦେଇଥିଲେ।

କିନ୍ତୁ ପୂର୍ବ ବିଜେଡି ସରକାର ସହଯୋଗ ନ କରିବାରୁ ଫୁଟ୍ ଓଭରବ୍ରିଜ୍ ନିର୍ମ।ଣ କାମ ବିଳମ୍ବିତ ହୋଇଥିଲା । ବିଜେପି ସରକାର ଆସିବା ପରେ ଏହି ପ୍ରକଳ୍ପ କାମ ତ୍ବରାନ୍ବିତ ହୋଇଥିଲା ବୋଲି ସାଂସଦ କହିଛନ୍ତି। ଏହି ଫୁଟ୍ ଓଭରବ୍ରିଜ୍ ଦ୍ବାରା ସ୍ଥାନୀୟ ଲୋକେ ଆଶ୍ବସ୍ତ ହୋଇଛନ୍ତି। ବୃଦ୍ଧ ଓ ବୃଦ୍ଧାଙ୍କଠାରୁ ନେଇ ପଥଚାରୀମାନେ ସୁବିଧାରେ ରାସ୍ତା ପାର୍ ହେବେ ବୋଲି ସେ କହିଛନ୍ତି।
ଟଙ୍କପାଣି ସାଇ ମନ୍ଦିର ଛକରେ ଭିଡ଼କୁ ଏଡ଼ାଇବାକୁ ଏକ ଓଭରବ୍ରିଜ୍ କରାଯିବ ବୋଲି ସାଂସଦ ଶ୍ରୀମତୀ ଷଡ଼ଙ୍ଗୀ କହିଛନ୍ତି।

ଏଥିପାଇଁ ପ୍ରକ୍ରିୟା ଚାଲିଛି। ଖୁବଶୀଘ୍ର କାମ ଆରମ୍ଭ ହେବ । ସେହିଭଳି ନଖରା ସମ୍ ହସ୍ପିଟାଲ ପାଖରେ ଆଉ ଏକ ଫୁଟ୍ ଓଭରବ୍ରିଜ ହେବ ବୋଲି ସାଂସଦ ସୂଚନା ଦେଇଛନ୍ତି । ଆଜିର ଉଦଘାଟନୀ କାର୍ଯ୍ୟକ୍ରମରେ ଏନଏଚ୍ଏଆଇର ପ୍ରକଳ୍ପ ନିର୍ଦ୍ଦେଶକ ସୂରଜ ସିଂ, ଉତ୍ତର ନିର୍ବାଚନମଣ୍ଡଳୀ ବିଧାୟକ ପ୍ରାର୍ଥୀ ପ୍ରିୟଦର୍ଶୀ ମିଶ୍ର ଓ ଅନ୍ୟମାନେ ଉପସ୍ଥିତ ଥିଲେ ।