୪୨ମୌଜା ଶ୍ରୀରାମ ଶନିମନ୍ଦିର ଗଡା ନଦୀବନ୍ଧ କଡରୁ ଗଛକଟା ସହିତ ଚୋରି : ପ୍ରକୃତିପ୍ରେମୀ ଓ ନଦୀବନ୍ଧ ସୁରକ୍ଷା କର୍ମୀମାନଙ୍କ ବିରୋଧ – ରାଜସ୍ୱ ବିଭାଗ ଓ ପୋଲିସ୍ ପ୍ରଶାସନ ପଦକ୍ଷେପ ପାଇଁ ଦାବି  

୦୬ ଅକ୍ଟୋବର ୨୦୨୩ (ଓଡ଼ିଶା ତାଜା ନ୍ୟୁଜ ) ବୟାଳିଶମୌଜା :-> କଟକସଦର ୪୨ମୌଜା ବ୍ରହ୍ମପୁର ପଂଚାୟତସ୍ଥ ଶ୍ରୀରାମ ରାଜସ୍ୱ ମୌଜା ଅନ୍ତର୍ଗତ ପ୍ରଭୂ ଶନି ଦେବଙ୍କ ମନ୍ଦିର ଗଡା ଓ ଲକ୍ଷ୍ମୀଘର ପାଶ୍ୱର୍ ନଦୀବନ୍ଧ କଡରେ ଥିବା ସରକାରୀ ଜମିରେ ବହୁ ଦେବଦାରୁ ଓ ଚାକୁଣ୍ଡା ଗଛ ଲଗାଯାଇଥିଲା । ଯଦ୍ୱାରା କାଠଯୋଡୀ ନଦୀବନ୍ଧ ସୁରକ୍ଷା ହେବା ସହିତ ପରିବେଶକୁ ସୁନ୍ଦର , ସ୍ୱାସ୍ଥ୍ୟକର ବାତାବରଣ ସୃଷ୍ଟି ହେଉଥିଲା । କିନ୍ତୁ ଗତ ୩ଦିନ ଧରି ଏହି ନଦୀବନ୍ଧ ଜନବସତି ଆଡକୁ ଥିବା ଗଛ ଗୁଡିକୁ କେତେକ ଆଂଚଳିକ ଦୁର୍ବୁତମାନେ ଲୋକ ଲଗାଇ ଗଛ କାଟି ନେଇଯାଇଛନ୍ତି ଓ ବିକ୍ରୀ କରି ବହୁ ମୁନାଫା କମାଉଥିବା ବର୍ତମାନ ପ୍ରକୃତିପ୍ରେମୀ ଓ ନଦୀବନ୍ଧ ସୁରକ୍ଷା କର୍ମୀମାନଙ୍କ ମଧ୍ୟରେ ଅଶାନ୍ତିର ବାତାବରଣ ସୃଷ୍ଟି କରିଛି ।

ସେହିପରି ନଦୀବନ୍ଧ କଡରୁ ଗଛଗୁଡିକ କଟାଯିବା ଦ୍ୱାରା ନଦୀବନ୍ଧ ଦୁର୍ବଳ ହେବା ସହିତ ବନ୍ଧ ଭାଙ୍ଗିବା, ଅତଡା ଖସିବା ଓ ରାସ୍ତା ଧସିଯିବା ନିଶ୍ଚିତ ହୋଇଛି । ସେହିପରି ପରିବେଶ ସମ୍ପୂର୍ଣ୍ଣ ଅସ୍ୱାସ୍ଥ୍ୟକର ଏବଂ ଜନ ମାରଣ ହୋଇଯାଇଥିବା ଅଂଚଳର ବହୁ ବୁଦ୍ଧିଜିବୀ ସୂଚନା ଦେଇଛନ୍ତି । ରାଜ୍ୟ ସରକାର ଓ ଜିଲ୍ଲା ପ୍ରଶାସନ ଅଂଚଳର ପରିବେଶ ସୁରକ୍ଷା ପାଇଁ ବୃକ୍ଷରୋପଣ କରାଯାଉଥିବା ବେଳେ ଗଛଗୁଡିକୁ ବେଆଇନ୍ ଭାବରେ କାଟି ବିକ୍ରୀ କରି ମୁନାଫା କମାଇବା ଏକ ପ୍ରକାର ଜନବିରୋଧି କାର୍ଯ୍ୟ ବୋଲି ପ୍ରକୃତି ବନ୍ଧୁ ଓ ସୁଚିନ୍ତକ ସମାଜର କର୍ମକର୍ତା ମତବ୍ୟକ୍ତ କରିଛନ୍ତି ।

ସେହିପରି ଏହି ବିଷୟରେ ରାଜସ୍ୱ ବିଭାଗ , ପୋଲିସ୍ ପ୍ରଶାସନ ଓ ବନାଂଚଳ ଅଧିକାରୀମାନଙ୍କର ଦୃଷ୍ଟି ଆକର୍ଷଣ କରାଯାଇଛି । ଏଥିପାଇଁ ତୁରନ୍ତ ସରକାରୀ ଯାଗାରୁ ବିନା ସରକାରୀ ପରମିସନ୍ ନନେଇ ଗଛକାଟି ଚୋରି କରିନେଉଥିବା ବ୍ୟକ୍ତିପ୍ରତି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରକୃତିବନ୍ଧୁ ନବକିଶୋର ପଣ୍ଡା ତଥା ପ୍ରକୃତିପ୍ରେମୀ ଲକ୍ଷ୍ମଣ ସିଂହ, ନାରାୟଣ ମହାରଣା, ସୀମାଞ୍ଜଳ ଭୋଇ ଓ ଅନ୍ୟ ସମସ୍ତ କର୍ମକର୍ତା ଦାବି କରିଛନ୍ତି ।