କରୋନା ଭାଇରସ ରଜର ସ୍ୱାଦିଷ୍ଟ ପରମ୍ପରା ଜାରି ରହିବ ।

ଓଡିଶା ତାଜା ନ୍ୟୁଜ୍ (୧୩ ଜୁନ୍ ଶନିବାର ) ବାଲେଶ୍ୱର : – ବାଲେଶ୍ୱର ଗୋଟିଏ କଲ୍‌ରେ ଆପଣଙ୍କ ଘରେ ପହଞ୍ଚିବ ସୁସ୍ୱାଦୁ ପିଠା । ଏଭଳି ଏକ ନିଆରା ପ୍ରୟାସ ଜାରି ରଖିଛି ବାଲେଶ୍ୱର ଜିଲ୍ଲାର ବସ୍ତା ବ୍ଳକର ରାଜଘାଟର ” ଜୀବନସାଥୀ ସଂଗଠନ” ଯେଉଁମାନେ ରଜ ପିଠା ଚାହିଁବେ ସେମାନେ ମୋବାଇଲ୍ ଫୋନ୍ ନମ୍ବରରେ କଲ୍ କରି ମନ ମୁତାବକ ପିଠା ମଗାଇ ପାରିବେ । ରଜର ଗଣ ପର୍ବ ରଜ ଆସିଲେ ଚଳଚଞ୍ଚଳ ହୁଏ ଗାଁରୁ ସହର । ଗଛରେ ଲାଗେ ଭଳିକି ଭଳି ଦୋଳି । ପୋଡପିଠା ଆଉ ରଜ ପାନ ସହ ଜମେ ତାସ ଖେଳର ଆସର ।

ପିଲାରୁ ବୁଢ଼ା ସମସ୍ତେ ଏହି ଗଣ ପର୍ବରେ ସାମିଲ ହୁଅନ୍ତି । ସଜବାଜରୁ ବସୁମତୀ ସ୍ନାନ ଯାଏ ପାଞ୍ଚ ଦିନ ଧରି ଜମେ ରଜର ଆସର । ବାଲେଶ୍ୱରରେ ବି ବେଶ ଜମେ ରଜର ଆସର । ସହରବାସୀଙ୍କୁ ଗାଁର ଅନୁଭୂତି ଦେବାକୁ ପ୍ରୟାସ କରନ୍ତି ଅନେକ ସଙ୍ଗଠନ । ବିଭିନ୍ନ ସ୍ଥାନରେ ଆୟୋଜିତ ହୁଏ ରଜ ମଉଜ । ହେଲେ ଏ ଥର ନାଁ ଲାଗିବ ଦୋଳି, ନାଁ ଜମିବ ତାସ୍‌ ଖେଳ ବା ଲୁଡୁର ଆସର । ରଜକୁ ଫିକା କରିଛି କରୋନା ମହାମାରୀ । ସାମାଜିକ ଦୂରତ୍ୱ ପାଇଁ ଗଣ ସମାବେଶ ଉପରେ ଲାଗିଛି କଟକଣା । ଏ ଥର ଦୋଳି ଲାଗିବନି କି ଜନ ସମାବେଶ ହେବନି, କିନ୍ତୁ ପରମ୍ପରା ବଜାୟ ରହିବ । ଏନେଇ ଜୀବନସାଥୀ ସଂଗଠନ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା ହୋଇଛି ।

ଆଉ ଲୋକଙ୍କ ପାଖରେ ପହଞ୍ଚିଯିବ ରଜ ପୋଡ଼ପିଠା । ଏ ନେଇ ଆରମ୍ଭ ହୋଇଛି ପିଠା ହୋମ ଡେଲିଭରି । ଶନିବାର ଓ ରବିବାର ଦୁଇ ଦିନ ସଟଡାଉନକୁ ନଜରରେ ରଖି ଜୁନ ୧୩ ଓ ୧୪ ତାରିଖ ଦୁଇ ଦିନ ପିଠା ହୋମ ଡେଲିଭରି କରାଯିବ । ଦୁଇ ଦିନର ସଟଡାଉନ୍ ମଧ୍ୟରେ ଯେଉଁମାନେ ରଜ ପିଠା ଚାହିଁବେ ସେମାନେ ଆମର ଫୋନ୍ ନମ୍ବର ୭୯୭୮୦୧୧୯୮୨,୮୨୬୦୩୨୪୬୨୯ କୁ ଫୋନ୍ କରି ସେମାନଙ୍କ ଇଚ୍ଛା ମୁତାବକ ପିଠା ମଗାଇ ପାରିବେ,’’ କହିଛନ୍ତି ଜୀବନସାଥୀ ସଂଗଠନର ସଭାପତି ଓ ଯୁବ ସମାଜସେବକ ଦୀପ୍ତିମାନ୍ ପତି । (ଦୀପ୍ତିମାନ୍ ପତି,ବାଲେଶ୍ୱର)