୨୪ ନଭେମ୍ବର ଗୁରୁବାର (ଓଡ଼ିଶା ତାଜାନ୍ୟୁଜ ) ଭୁବନେଶ୍ୱର :- ପଦ୍ମପୁର ଉପନିର୍ବାଚନ ବେଳେ ଚାଷୀଙ୍କ କୌଣସି ନିର୍ଦ୍ଦଷ୍ଟ ସାମୟିକ ସମସ୍ୟା ନଥିଲା ବେଳେ କେବଳ ଚାଷୀମାନଙ୍କୁ ଭ୍ରମିତ କରିବା ପାଇଁ ଚାଷୀ ହତ୍ୟାକାରୀ ବିଜେପି ମିଛ ଚାଷୀ ଆନ୍ଦୋଳନ କରିବା ହାସ୍ୟାସ୍ପଦ ବୋଲି କୃଷକ ସଂଗଠନ ପକ୍ଷରୁ କୁହାଯାଇଛି । ସଂଗଠନର ନେତୃବୃନ୍ଦ କହିଛନ୍ତି ଯେ, ଦେଶର ଯଦି କୌଣସି ଦଳ ଚାଷୀଙ୍କ ସମ୍ପୂର୍ଣ୍ଣ ବିରୋଧୀ ଥାଏ, ତେବେ ସେ ହେଉଛି ବିଜେପି ଦଳ । ଯେଉଁ ଦଳ ମଧ୍ୟ ପ୍ରଦେଶର ମନସୋର ଠାରୁ ଆରମ୍ଭ କରି ଉତ୍ତର ପ୍ରଦେଶର ଖେରୀ ଯାଏ ଚାଷୀଙ୍କୁ ଜିପ୍ ଚକାତଳେ ମାରିବା ସହ ଗୁଳି ଚଳାଇ ନିଜ ହାତକୁ ରକ୍ତରଞ୍ଜିତ କରିଛି । ଉତ୍ତର ପ୍ରଦେଶରେ କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀଙ୍କ ପୁଅ ଯେଭଳି ଆନ୍ଦୋଳନରତ ଚାଷୀଙ୍କ ଉପରେ ଜିପ୍ ଚଢାଇ ସେମାନଙ୍କୁ ହତ୍ୟା କଲେ ଏହାଠାରୁ ବର୍ବୋରଚିତ ଚାଷୀ ଆକ୍ରମଣ କେବେ ବି ସ୍ୱାଧୀନତା ପରେ ଚାଷୀମାନଙ୍କ ଉପରେ ହୋଇନାହିଁ ।
ସେହିଭଳି କୃଷି ଓ କୃଷକ ବିନାଶକାରୀ କଳା କାନୁନ ଆଣି ସାରା ଦେଶରେ ଚାଷୀଙ୍କ ସମ୍ପତ୍ତି ଓ ଅଧିକାରକୁ କର୍ପୋରେଟ ହାତକୁ ଟେକିଦେବା ପାଇଁ ଉଦ୍ୟମ କରି ୭୦୦ ଚାଷୀଙ୍କର ଦିଲ୍ଲୀ ଆନ୍ଦୋଳନରେ ମୃତ୍ୟୁର କାରଣ ପାଲଟିଥିବା ବିଜେପି ଏବେ ଚାଷୀଙ୍କ ସପକ୍ଷରେ ଆନ୍ଦୋଳନ କରୁଛି । ସବୁଠାରୁ ହାସ୍ୟାସ୍ପଦ କଥା ହେଲା ଯେ, ପଦ୍ମପୁର ନିର୍ବାଚନକୁ ଆଖିଆଗରେ ରଖି ବିଜେପି ଦଳ ଧାରଣା ଓ ଆନ୍ଦୋଳନ ଚଳାଇଛି । ଯେଉଁ ବିଜେପି ଚାଷୀଙ୍କୁ ଗାଡ଼ି ଚଢାଇ ହତ୍ୟା କରେ, ସେ ବିଜେପି ଚାଷୀଙ୍କ ପେଟ ପାଇଁ କେବେ ବି ଚିନ୍ତା କରିପାରିବ ନାହିଁ । କେବଳ ଚାଷୀଙ୍କ ମତ କିଭଳି ସେମାନଙ୍କ ସପକ୍ଷରେ ଯାଉ ସେଥିପାଇଁ ଚାଷୀଙ୍କ ନାମରେ ପ୍ରାୟୋଜିତ ଆନ୍ଦୋଳନ ଚାଳିଛି । ମଣ୍ଡିରେ ଧାନ କଟନୀ ଛଟନୀ ବେଳେ, ମରୁଡ଼ି, ଜୱାଦ, ଫାଇଲିନ୍ କ୍ଷତିପୂରଣ ନ ମିଳିଲ ବେଳେ ବିଜେପି ନେତାମାନଙ୍କର ଦେଖା ନଥାଏ ।
ଗଣମାଧ୍ୟମରେ ବିତର୍କ ଉପସ୍ଥାପକମାନେ ଆଲୋଚନା ବେଳେ ଯେତେବେଳେ ସ୍ୱାମୀନାଥନଙ୍କ କମିଟି କାହକିିଁ କାର୍ଯ୍ୟକାରୀ ହେଲାନାହିଁ ପ୍ରଶ୍ନ ହେଲାବେଳେ ନେତାମାନେ ଥତମତ ହୋଇ କୁହନ୍ତି ରାଜ୍ୟ ସରକାର ମଣ୍ଡି ପରିଚାଳନାରେ ବିଫଳ ହୋଇଛନ୍ତି । ଦୁଇ ଦୁଇଟି ଘଟଣାରେ ତଥାକଥିତ ଯଶଶ୍ୱୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେତେ ମିଥ୍ୟାବାଦୀ ତାହା ସ୍ପଷ୍ଟ ହୋଇଛି । ପ୍ରଥମରୁ ପ୍ରଧାନମନ୍ତ୍ରୀ ମୋଦି କହିଥିଲେ ଯେ, ମୁଁ କ୍ଷମତାକୁ ଆସିବା କ୍ଷଣି ସ୍ୱାମୀନାଥନଙ୍କ କମିଟି ସୁପାରିଶ ଲାଗୁ କରିବି । ଏଥିରେ ଫେଲ୍ ମାରି ସୁପ୍ରିମକୋର୍ଟରେ ଭର୍ତ୍ସନାର ଶିକାର ହେଲା ପରେ ପୁଣି ନୂଆ ମିଛ କାହାଣୀ ଆରମ୍ଭ କରିଥିଲେ ୨୦୨୨ ମସିହା ସୁଦ୍ଧା ସମସ୍ତ ଚାଷୀଙ୍କ ଆୟ ଦୁଇଗୁଣା ହେବ । ଏହା ମଧ୍ୟ ସମ୍ପୂର୍ଣ୍ଣ ମିଥ୍ୟା ପ୍ରଚାର ଥିଲା ।
ସେହିଭଳି ରାଜ୍ୟ ବିଜେପି ଧାନ କୁଇଣ୍ଟାଲ ୨୯୩୦ ଟଙ୍କା ପ୍ରସଙ୍ଗରେ ପ୍ରଥମରୁ ଗୃହରେ ସହମତି କରିଥିଲେ ହେଁ ପରେ ଚାଷୀ ସପକ୍ଷବାଦୀ ଏହି ଘଟଣାରେ ନିଜକୁ ଦୂରେଇ ରଖିଥିଲା । ବିଜେପି ସରକାର କର୍ପୋରେଟମାନଙ୍କୁ ଲକ୍ଷ ଲକ୍ଷ କୋଟି ଟଙ୍କା ରିହାତି ଦେଲାବେଳେ ଚାଷୀମାନଙ୍କ ପାଇଁ ଆଗଭର ହେଲା ବେଳେ ଚାଷୀଙ୍କୁ ନଗଣ୍ୟ ସହାୟତା ଦେଇ ବ୍ୟାପକ ପ୍ରଚାର ଚଳାଇଛନ୍ତି । ଏଭଳି ଦଳ ଓ ଚାଷୀ ହତ୍ୟାକାରୀ ପ୍ରତି ପଦ୍ମପୁରର ଭୋଟରମାନେ ସଚେତନ ହେବା ପାଇଁ ଚାଷୀ ବଞ୍ଚାଅ ଅଭିଯାନ ଓ ଚାଷୀ ଏକତା ମଞ୍ଚ ପକ୍ଷରୁ ଚାଷୀନେତା ଅରୁଣ ଜେନା, ସମାଜବାଦୀ କୃଷକ ନେତା ସୁଦର୍ଶନ ପ୍ରଧାନ, ଶୁଭେନ୍ଦୁ ମଲ୍ଲିକ, ସଂଗ୍ରାମ କିଶୋର ପ୍ରମୁଖଙ୍କ ନେତୃତ୍ୱରେ ପିଏମ୍ଜିରେ ଏକ ବିକ୍ଷୋଭ ଅନୁଷ୍ଠିତ ହୋଇଯାଇଛି । ବିକ୍ଷୋଭକାରୀଙ୍କୁ ଉଦ୍ବୋଧନ ଦେଇ ଏହି ନେତାମାନେ କହିଛନ୍ତି ଯେ, ବିଜେପି ଭଳି ଚାଷୀବିରୋଧୀ ଦଳଙ୍କୁ ପଦ୍ମପୁରରେ ଚାଷୀମାନେ ପ୍ରତ୍ୟାଖାନ କରନ୍ତୁ । ବିଜେପି ଭୋଟରେ ଚାଷୀଙ୍କ ଠାରୁ ସବକ ଶିଖିଲେ ଭବିଷ୍ୟତରେ କର୍ପୋରେଟ ଅପେକ୍ଷା କୃଷକମାନଙ୍କୁ ପ୍ରାଧାନ୍ୟ ଦେବ ।
