ବରଗଡ ପୁସ୍ତକ ମେଳା ର ତୃତୀୟ ସନ୍ଧ୍ୟା
୨୨ ନଭେମ୍ବର ମଙ୍ଗଳବାର (ଓଡ଼ିଶା ତାଜାନ୍ୟୁଜ ) ବରଗଡ :- ସଂଚାର କଳା,ସମ୍ବଲପୁରୀ ପାଣ୍ଡୱାନି ସଙ୍ଗୀତ ପୁରାତନ ଓ ନୂତନ ସାଂସ୍କୃତିକ ପରମ୍ପରା ର ବାର୍ତାବହ ଅଟେ ।ଆଜି ବରଗଡ ଗାନ୍ଧୀ ସ୍ମୃତି ପାଠାଗାର ପକ୍ଷରୁ ତୃତୀୟ ସନ୍ଧ୍ୟାରେ ଆୟୋଜିତ ସଂଚାର କଳା ଓ ସମ୍ବଲପୁରୀ ପାଣ୍ଡୱାନି ସଙ୍ଗୀତ ପରିବେଷଣ ଅବସରରେ ଏହି ମତ ପ୍ରକାଶ ପାଇଛି। ପାଠାଗାର ସଦସ୍ୟା ଅଧ୍ୟାପିକା ଜୟଶ୍ରୀ ସାହୁ ଙ୍କ ସଂଯୋଜନା ରେ ଅନୁଷ୍ଠିତ ପ୍ରଥମ କାର୍ଯ୍ୟକ୍ରମ ସଂଚାର କଳା ପ୍ରଦର୍ଶନ କରିଥିଲେ ବିଶିଷ୍ଟ ମହିଳା ସଂଚାର କଳାକାର ଜୟନ୍ତୀ ଦୀପ ଓ ତାଙ୍କର ସାଥୀ ମାନେ। ପଶ୍ଚିମ ଓଡ଼ିଶା ର ଏହି ଅବଲୁପ୍ତ ପ୍ରାୟ ଲୋକନୃତ୍ୟ ପରମ୍ପରା କୁ ଜଣେ ମହିଳା କଳାକାର ଭାବରେ ଚମତ୍କାର ପ୍ରଦର୍ଶନ କରି ଦର୍ଶକ ଙ୍କ ଖୁବ୍ ପ୍ରଶଂସା ସାଉଁଟି ଥିଲେ। ପରେ ସଂଚାର ଗୁରୁ ଅଲେଖ ସାହୁ ମଧ୍ୟ ସ୍ୱଳ୍ପ ସମୟ ପାଇଁ ସଂଚାର କଳା ପ୍ରଦର୍ଶନ କରିଥିଲେ। 
ସମୟ ର ଅପରାହ୍ନ ରେ ସେ ଯେଭଳି ଭାବରେ କଳା ପ୍ରଦର୍ଶନ କଲେ ତାହା ପ୍ରମାଣିତ କରିଥିଲା ଯେ କଳା ପାଖରେ ବୟସ ମଧ୍ୟ ହାର ମାନିଥାଏ। କଳା ପ୍ରଦର୍ଶନ ର କୌଣସି ବୟସ ନଥାଏ।ପରେ ପଶ୍ଚିମ ଓଡ଼ିଶା ର ଲବ୍ଧ ପ୍ରତିଷ୍ଠ ରାଷ୍ଟ୍ରୀୟ ପୁରସ୍କାର ପ୍ରାପ୍ତ କଳାକାର ପୁଷ୍ପା ବେହେରା ଓ ନାଟ୍ୟଶ୍ରୀ ବିପିନ ବିହାରୀ ଦାଶ ଙ୍କ ସାଂସ୍କୃତିକ ଦଳ ସମ୍ବଲପୁରୀ ପାଣ୍ଡୱାନି ନୃତ୍ୟ ସଙ୍ଗୀତ ସର୍ଗିଜନ୍ହ ପରିବେଷଣ କରିଥିଲେ। ଛତିଶଗଡ ର ବିଶିଷ୍ଟ ପାଣ୍ଡୱାନି ଗାୟିକା ପଦ୍ମଶ୍ରୀ ତିଜନ ବାଇ ଙ୍କ ଦ୍ଵାରା ରାମାୟଣ ,ମହାଭାରତ କୁ ଏକ ଭିନ୍ନ ଢ଼ଙ୍ଗରେ ପାଣ୍ଡୱାନି ଗୀତ ମାଧ୍ୟମରେ ପରିବେଷଣ କରି ସମଗ୍ର ଦେଶରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି ।
ତାଙ୍କ ପଦାଙ୍କ ଅନୁସରଣ କରି ପୁଷ୍ପା ବେହେରା ପଶ୍ଚିମ ଓଡ଼ିଶା ର ପରମ୍ପରା , ଲୋକ ଗୀତ ଓ ଲୋକ ସଙ୍ଗୀତ କୁ ପାଣ୍ଡୱାନି ସଙ୍ଗୀତ ଢ଼ଙ୍ଗରେ ପରିବେଷଣ କରି ସମସ୍ତ ଙ୍କୁ ମନ୍ତ୍ର ମୁଗ୍ଧ କରିଥଲେ । ବରଗଡ ପୌର ପରିଷଦ ଅଧ୍ୟକ୍ଷା ଶ୍ରୀମତୀ କଳ୍ପନା ମାଝୀ ଅତିଥି ଭାବରେ ଯୋଗଦେଇ ପାଠାଗାର ପକ୍ଷରୁ ସମସ୍ତ କଳାକାର ଙ୍କୁ ଓ ଛାତ୍ର ଛାତ୍ରୀ ଙ୍କ ସମ୍ବର୍ଦ୍ଧିତ କରିଥିଲେ । ସନ୍ଧ୍ୟା କାର୍ଯ୍ୟକ୍ରମ କୁ ପାଠାଗାର ସଭାପତି ବିମ୍ବାଧର କୁଁଅର, ଅବସରପ୍ରାପ୍ତ ଅଧ୍ୟାପକ ସନ୍ତୋଷ ପଣ୍ଡା ପ୍ରଦୀପ ପ୍ରଜ୍ବଳନ କରି ଉଦ୍ଘାଟନ କରିଥିଲେ । ସରସ୍ଵତୀ ଶିଶୁ ବିଦ୍ୟା ମନ୍ଦିର ଓଡ଼ିଆ ବିଭାଗ ର ଛାତ୍ର ଛାତ୍ରୀ ମାନେ ନାଟିକା “ଫେର ଗୁଟେ ରେବତୀ ” ସହ ସାଂସ୍କୃତିକ ବିଚିତ୍ରା କାର୍ଯ୍ୟକ୍ରମ ପରିବେଷଣ କରିଥିଲେ। ଏହି ଅବସରରେ ଅବସରପ୍ରାପ୍ତ ପୋଲିସ ପ୍ରଶାସକ ରତ୍ନାକର ଦେବତା ଙ୍କ ରଚିତ ପୁସ୍ତକ ଦ୍ଵୟ ଶ୍ରୀ ଗୁରୁ ଗୀତା ଓ ଶ୍ରୀ ସତ୍ୟନାରାୟଣ ବ୍ରତ କଥା ଉନ୍ମୋଚନ ହୋଇଥିଲା ।ଏହାକୁ ସେ ସଂସ୍କୃତ ରୁ ଅନୁବାଦ କରିଛନ୍ତି ।
