ପଟାଙ୍ଗପଡା ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବରୁ ତାଲା

ଓଡ଼ିଶା ତାଜା ନ୍ୟୁଜ (୭ ସେପ୍ଟେମ୍ବର ବୁଧବାର ) କଳାହାଣ୍ଡି :- କଳାହାଣ୍ଡି ଜିଲ୍ଲା ନର୍ଲା ବ୍ଲକ ପଟାଙ୍ଗପଡା ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବ ଅଭିଯୋଗରେ ମଙ୍ଗଳବାର ଅଭିଭାବକ ଓ ଛାତ୍ରଛାତ୍ରୀ ତାଲାବନ୍ଦ କରିଥିଲେ । ବ୍ଲକରେ ଏକ ଆଦର୍ଶ ବିଦ୍ୟାଳୟ ଭାବରେ ପ୍ରତିଷ୍ଠା ଲାଭ କରିଥିବା ବିଦ୍ୟାଳୟ ଗତ କିଛି ବର୍ଷ ହେଲା ବିଭାଗୀୟ ଅବହେଳା ଯୋଗୁଁନାନାଦି ସମସ୍ୟା ଦେଇ ଗତି କରୁଛି । ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୩୦ ପିଲା ପଢୁଥିବା ବେଳେ ପ୍ରଧାନ ଶିକ୍ଷକ ଉଗ୍ରଶେନ ପଟ୍ଟନାୟକଙ୍କ ସମେତ ଦୁଇଜଣ ଶିକ୍ଷକ ଓ ଦୁଇଜଣ ଶିକ୍ଷୟତ୍ରୀ ଅଛନ୍ତି ।

ଶିକ୍ଷକ ଅଭାବ ଯୋଗୁଁ ଅନେକ ସମୟରେ ସ୍କୁଲରେ ଶିକ୍ଷାଦାନ ବାଧାପ୍ରାପ୍ତ ହେଉଥିବା ନେଇ ପୂର୍ବରୁ ଅଭିଯୋଗ ହୋଇଛି । ହେଲେ ବ୍ଲକ ଶିକ୍ଷାଧିକାରୀ ଚିରାଚରିତ ଭାବରେ ମ୍ୟାନେଜ କରିନେବା ପାଇଁ ପରାମର୍ଶ ଦେଇଆସୁଥିବା ଅଭିଯୋଗ ହୋଇଛି । ସମସ୍ୟାର ସମାଧାନ ନହେବାରୁ ମଙ୍ଗଳବାର ସ୍କୁଲରେ ଛାତ୍ରଛାତ୍ରୀ ଓ ଅଭିଭାବକ ତାଲାବନ୍ଦ କରିଥିବା ଦେଖାଯାଇଛି । ଦୀର୍ଘ ସମୟ ପରେ ବିଇଓ ତପିମଣୀ ଜାନୀ ଓ ଏବିଇଓ ଗୋବର୍ଦ୍ଧନ ମାଝୀ ଉପସ୍ଥିତ ରହି ଅଭିଭାବକ ମାନଙ୍କ ସହ ଆଲୋଚନା କରିଥିଲେ। ବୁଧବାର ସୁଦ୍ଧା ଜଣେ ଶିକ୍ଷକ ନିଯୁକ୍ତି ପାଇଁ ଲିଖିତ ପ୍ରତିଶୃତି ଦେବାପରେ ପରିସ୍ଥିତି ସାମାନ୍ୟ ହୋଇଥିଲା ।