ଦରବୃଦ୍ଧି, ଜି.ଏସ୍‌.ଟି., ଏନ୍‌.ଏମ୍‌.ପି. ଓ ଶ୍ରମ କୋଡ୍ ବିରୁଦ୍ଧରେ ଏ.ଆଇ.ଟି.ୟୁ.ସି. ପକ୍ଷରୁ ରାଜ୍ୟବ୍ୟାପୀ ଅଭିଯାନ

ଓଡ଼ିଶା ତାଜା ନ୍ୟୁଜ (୯ ଅଗଷ୍ଟ ମଙ୍ଗଳବାର ) ଭୁବନେଶ୍ୱର :- ଏ.ଆଇ.ଟି.ୟୁ.ସି.ର ପରିବର୍ଦ୍ଧିତ ରାଜ୍ୟ କାର୍ଯ୍ୟକାରୀ କମିଟି ବୈଠକ ଏହାର ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ହୋଇ ଆଗାମୀ ୧୫ ଅଗଷ୍ଟରେ ରାଜ୍ୟବ୍ୟାପୀ ଏ.ଆଇ.ଟି.ୟୁ.ସି. ପକ୍ଷରୁ ଜାତୀୟ ପତାକା ଉତ୍ତୋଳନ ସହ ସ୍ୱାଧୀନତାର ହୀରକ ଉତ୍ସବ ଦେଶର ସ୍ୱାଧୀନତା, ଅଖଣ୍ଡତା, ସାର୍ବଭୌମତ୍ୱ, ସମ୍ବିଧାନ ଓ ବିଭିନ୍ନତା ମଧ୍ୟରେ ଏକତା ରକ୍ଷାପାଇଁ ସଂକଳ୍ପ ଦିବସ ଭାବେ ପାଳନ କରିବାକୁ ସର୍ବସମ୍ମତ ନିଷ୍ପତ୍ତି ହୋଇଅଛି । ୧୬ ଅଗଷ୍ଟରୁ ୩୧ ଅଗଷ୍ଟ ମଧ୍ୟରେ ଦରବୃଦ୍ଧି, ଜି.ଏସ୍‌.ଟି., ଏନ୍‌.ଏମ୍‌.ପି. ଓ ଶ୍ରମ କୋଡ୍‌ ବିରୁଦ୍ଧରେ ଏ.ଆଇ.ଟି.ୟୁ.ସି. ପକ୍ଷରୁ ପ୍ରତ୍ୟେକ ୟୁନିୟନ୍ ଶାଖା, ବ୍ଲକ୍‌, ଜିଲ୍ଲା ଓ ରାଜ୍ୟ ସ୍ତରରେ ବ୍ୟାପକ ଜନଆନ୍ଦୋଳନର ଅଭିଯାନ ପାଇଁ ନିଷ୍ପତ୍ତି ହୋଇଯାଇଛି ।

ରାଜ୍ୟର ଶ୍ରମିକ ଆନ୍ଦୋଳନର ଅନ୍ୟତମ ପ୍ରବାଦ ପୁରୁଷ ଦୁର୍ଗାଚରଣ ମହାନ୍ତିଙ୍କ ଜନ୍ମ ଶତବାର୍ଷିକୀ କଟକ ଶତାବ୍ଦୀଭବନଠାରେ ୧ ସେପ୍ଟେମ୍ବର ୨୦୨୨ରେ ପାଳନ ପାଇଁ ନିଷ୍ପତ୍ତି ହୋଇଅଛି । ସେପ୍ଟେମ୍ବର ମଧ୍ୟରେ ଏ.ଆଇ.ଟି.ୟୁ.ସି. ସଂଯୁକ୍ତ ପ୍ରତ୍ୟେକ ୟୁନିୟନ୍‌ର ବାର୍ଷିକ ସାଧାରଣ ଅଧିବେଶନ ବା ସମ୍ମିଳନୀ, ଅକ୍ଟୋବର ମଧ୍ୟରେ ସମସ୍ତ ଜିଲ୍ଲା ସମ୍ମିଳନୀ ଶେଷ କରିବାକୁ ଧାର୍ଯ୍ୟ କରାଗଲା । ଏଆଇଟିୟୁସିର ତ୍ରୟୋଦଶ ଓଡ଼ିଶା ରାଜ୍ୟ ସମ୍ମିଳନୀ ଇସ୍ପାତନଗରୀ ରାଉରକେଲାଠାରେ ନଭେମ୍ବର ୧୧, ୧୨ ଓ ୧୩ ତାରିଖରେ ଅନୁଷ୍ଠିତ ହେବ ଓ ଏହାର ଖୋଲା ଅଧିବେଶନ ୧୧ ନଭେମ୍ବରରେ ଅନୁଷ୍ଠିତ ହେବ ।

ଏହି ଖୋଲା ଅଧିବେଶନର ଶ୍ରମିକ ସମାବେଶରେ ପ୍ରତ୍ୟେକ ୟୁନିୟନ୍ ଓ ଜିଲ୍ଲାର ଏ.ଆଇ.ଟି.ୟୁସି. ସାଥୀମାନେ ଯୋଗଦେବେ ଏବଂ ସର୍ବଭାରତୀୟ ସାଧାରଣ ସମ୍ପାଦକ ଅମରଜିତ୍ କାଉର ଉଦ୍‌ବୋଧନ ଦେବାର କାର୍ଯ୍ୟକ୍ରମ ଗୃହୀତ ହୋଇଅଛି । ଏଆଇଟିୟୁସି ରାଜ୍ୟ ଉପସଭାପତି ତଥା ପୂର୍ବତନ ବିଧାୟକ ଏନ୍‌. ନାରାୟଣ ରେଡ୍‌ଡିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ରାଜ୍ୟ ଉପସାଧାରଣ ସମ୍ପାଦକ ବିଜୟ ଜେନା ବିବରଣୀ ଉପସ୍ଥାପନ କରିଥିଲେ ।

ଏହି ବୈଠକରେ ଜାତୀୟ ପରିଷଦ ସଦସ୍ୟ ଜୟନ୍ତ ଦାସ, ଗୌରାଙ୍ଗ ପାଣିଗ୍ରାହୀ, ହରପ୍ରିୟା ସ୍ୱାଇଁ, ନମିତା ସାହୁ, ଆକୁଳି ନାଥ, ଶ୍ୟାମସୁନ୍ଦର ଜେନା, ଦେବାଶିଷ ବାବୁ, ସତ୍ୟବାଦୀ ବାଘ, ସୋମନାଥ ଗିରି, ଏସ୍‌.ଏନ୍‌. ବେହେରା, ଅଳକନାଥ ମିଶ୍ର, ଭ୍ରମରବର ରାଉତ, ଜଗନ୍ନାଥ ବାଗ, ସୁର ଜେନା ପ୍ରମୁଖ ବିଭିନ୍ନ ବିଷୟ ଉପରେ ଆଲୋଚନା କରିଥିଲେ ।