No Result
View All Result
ପୂର୍ବରୁ ପଡ଼ିରହିଥିବା ଆବେଦନ ଫର୍ମକୁ ତୁରନ୍ତ ପଞ୍ଜିକରଣ କରି କାର୍ଡ଼ ପ୍ରଦାନ କରିବା ଆଦି ୮ ଦଫା ସମ୍ବଳିତ ଦାବିପତ୍ର ଶ୍ରମ କମିଶନରଙ୍କୁ ପ୍ରଦାନ କରାଯାଇଛି ।
ଓଡ଼ିଶା ତାଜା ନ୍ୟୁଜ୍ /୨୩ ମଇ ସୋମବାର/ଭୁବନେଶ୍ୱର :- ନିର୍ମାଣ ଶ୍ରମିକମାନଙ୍କ ବିଭିନ୍ନ ସମସ୍ୟା ନେଇ ଓଡ଼ିଶା ନିର୍ମାଣ ଶ୍ରମିକ ଫେଡ଼େରେସନ ତରଫରୁ ରାଜ୍ୟ ଶ୍ରମ କମିଶନରଙ୍କୁ ୮ ଦଫା ସମ୍ବଳିତ ଦାବିପତ୍ର ପ୍ରଦାନ କରାଯାଇଛି । ଗତ ୦୧.୦୫.୨୦୨୨ରିଖରେ ନିର୍ମାଣ ଶ୍ରମିକ କଲ୍ୟାଣ ବୋର୍ଡ଼ର ସମସ୍ତ କାର୍ଯ୍ୟ ଯଥା ବାର୍ଷିକ ଦେୟ, ଶିକ୍ଷା, ବିବାହ, ମୃତ୍ୟୁକାଳୀନ ସହାୟତା ଓ ନୂତନ ଭାବେ ପଞ୍ଜିକରଣ କାର୍ଡ଼ ଅନଲାଇନ ମାଧ୍ୟମରେ ପଞ୍ଜିକରଣ କରାଯିବ ବୋଲି ମାନ୍ୟବର ଶ୍ରମ ଓ କର୍ମଚାରୀ ନିୟୋଜନ ମନ୍ତ୍ରୀଙ୍କ ଦ୍ୱାରା ଏକ ପୋର୍ଟାଲ ଜୟଦେବ ଭବନଠାରେ ଉନ୍ମୋଚନ କରାଯାଇଛି । ଓଡ଼ିଶାରେ ୨୦୦୯ ମସିହା ଠାରୁ ଏପର୍ଯ୍ୟନ୍ତ ସମସ୍ତ ପଞ୍ଜିକୃତ ୟୁନିୟନମାନେ ସରକାର ଗରିବ ନିର୍ମାଣ ଶ୍ରମିକ ଭାଇଭଉଣୀଙ୍କର କଲ୍ୟାଣ ପାଇଁ ୟୁନିୟନମାନଙ୍କ ସହାୟତା ନେଇ ଉକ୍ତ ବ୍ୟବସ୍ଥାର ଲୋକାଭିମୁଖୀ ହୋଇପାରିଛି ।
ପରନ୍ତୁ କୌଣସି ଆଲୋଚନା, ପର୍ଯ୍ୟାଲୋଚନା ଓ ପ୍ରଯୁକ୍ତି ବିଦ୍ୟା ସମ୍ପର୍କରେ ୟୁନିୟନମାନଙ୍କ ସଚେତନତା ଶିବିର ନକରାଇ ହଠାତ୍ କାର୍ଯ୍ୟକ୍ରମ ଲଦି ଦେବା ଦ୍ୱାରା ୟୁନିୟନ ଓ ଶ୍ରମିକମାନଙ୍କ ମନରେ ଅନେକ ପ୍ରଶ୍ନବାଚୀ ଛିଡ଼ା କରାଇଛି । ଯାହାକି ଶ୍ରମିକମାନଙ୍କର ଅସନ୍ତୋଷ ଦିନକୁ ଦିନ ବୃଦ୍ଧି ପାଇବାରେ ଲାଗିଛି ଓ ଜିଲ୍ଲା ଶ୍ରମ କାର୍ଯ୍ୟାଳୟରେ ସମସ୍ତ କାର୍ଯର୍୍ୟ ଏକ ପ୍ରକାର ଠପ୍ ହୋଇଯାଇଛି । ତେଣୁ ଏସବୁକୁ ଦୃଷ୍ଟିରେ ରଖି ପୂର୍ବ ତ୍ରୁଟି ବିଚ୍ୟୁତିକୁ ସମାଧାନ ଓ ପ୍ରଯୁକ୍ତି ବିଦ୍ୟା ସମ୍ପର୍କରେ ୟୁନିୟନମାନଙ୍କୁ ନେଇ ଏକ କର୍ମଶାଳା ନିମନ୍ତେ ଦାବି କରାଯାଇଛି । ଅନଲାଇନ୍ ଓ ଅପଲାଇନ୍ ଦୁଇଟି ବ୍ୟବସ୍ଥା କାର୍ଯ୍ୟକାରୀ କରାଯାଉ, ପୂର୍ବରୁ ମଞ୍ଜୁର ହୋଇଥିବା ବ୍ୟାଙ୍କ/ଡ଼ାଟାଏଣ୍ଟ୍ରି ଅପରେଟରଙ୍କ ତ୍ରୁଟି ଯୋଗୁ ହିତାଧିକାରୀଙ୍କ ଆକାଉଣ୍ଟକୁ ସଂଶୋଧନ କରି ବିବାହ, ମୃତ୍ୟୁକାଳୀନ, ଶିକ୍ଷା ଓ ଅନ୍ୟାନ୍ୟ ସହାୟତା ରାଶି ତୁରନ୍ତ ପ୍ରଦାନ କରାଯାଉ, ବାର୍ଷିକ ଦେୟ ଅନଲାଇନ ଓ ଅଫଲାଇନ ଦୁଇଟି ବ୍ୟବସ୍ଥା ଚାଲୁ କରାଯାଉ,
ଶିକ୍ଷା ସହାୟତା ପାଇଁ ଅନଲାଇନରେ ଦେଖା ଦେଇଥିବା ଅନେକ ଜଟିଳତାକୁ ଦୂର କରି ସରଳୀକରଣ କରାଯାଉ, ଜିଲ୍ଲା ଶ୍ରମ କାର୍ଯ୍ୟାଳୟ ମାନଙ୍କରେ କାର୍ଯ୍ୟ କରୁଥିବା ୟୁନିୟନର ପ୍ରାଧିକୃତ ପ୍ରତିନିଧିଙ୍କୁ ଆଇକାର୍ଡ଼ ଦେବାର ବ୍ୟବସ୍ଥା କରାଯାଉ, ସାରା ଓଡ଼ିଶାରେ ଏକ ପ୍ରକାର ନିର୍ମାଣ ଶ୍ରମିକ ଆଇନ୍ ପ୍ରଚଳନ କରାଯାଉ, ପ୍ରତି ଜିଲ୍ଲାରେ ୟୁନିୟନ ତରଫରୁ ଜଣେ ଲେଖାଏଁ ପ୍ରାଧିକୃତ ପ୍ରତିନିଧିଙ୍କୁ କାର୍ଯ୍ୟ କରିବା ପାଇଁ ଅନୁମତି ଦିଆଯାଉ, ପୂର୍ବରୁ ପଡ଼ିରହିଥିବା ଆବେଦନ ଫର୍ମକୁ ତୁରନ୍ତ ପଞ୍ଜିକରଣ କରି କାର୍ଡ଼ ପ୍ରଦାନ କରିବା ଆଦି ୮ ଦଫା ସମ୍ବଳିତ ଦାବିପତ୍ର ଶ୍ରମ କମିଶନରଙ୍କୁ ପ୍ରଦାନ କରାଯାଇଛି । ଏହି କାର୍ଯ୍ୟକ୍ରମରେ ଫେଡ଼େରେସନର ସଭାପତି ଶ୍ରୀ ସୁରେଶ ଚନ୍ଦ୍ର ରାଉତରାୟ, ସାଧାରଣ ସମ୍ପାଦକ ପଞ୍ଚାନନ ମହାରଣା, ଉପସଭାପତି ଭାଗିରଥୀ ସେନାପତି, ଯୁଗ୍ମ ସମ୍ପାଦକ ସୁନିଲ କୁମାର ଗୌଡ଼, ଇନ୍ଦ୍ରମଣି ଜେନା, ମାନସ ଦାସ, ମନୋରଞ୍ଜନ ସାହୁ, ସଞ୍ଜୀବ ମହାନ୍ତି, ପରମାନନ୍ଦ ବେଉରା ପ୍ରମୁଖ ଉପସ୍ଥିତ ଥିଲେ ।
No Result
View All Result