ହାତୀପଲ ଉପଦ୍ରବରେ କଦଳୀ ଚାଷ ଉଜୁଡିଲା

ଓଡ଼ିଶା ତାଜା ନ୍ୟୁଜ୍ (୧୨ଫେବ୍ରୁଆରୀ ଶନିବାର ) କଳାହାଣ୍ଡି :- ନର୍ଲା ବ୍ଳକ ଅନ୍ତର୍ଗତ ପଲସାପଡା (ବୁର୍ଡିପଡା) ନିକଟ ସାନ୍ଦୁଲ ନଦୀ କୂଳରେ ବଣୁଆ ହାତୀ ଆସି ଉପଦ୍ରବ ଆରମ୍ଭ କରିଛନ୍ତି। ଏହି ହାତୀପଲ ପଲସାପଡା ଗ୍ରାମର ଫକୀର ନାଏକଙ୍କ ୨ ଏକର ଜମିରେ ଥିବା କଦଳୀ ବଗିଚାରେ ପଶି ନଷ୍ଟ କରିଛନ୍ତି । ଶ୍ରୀ ନାଏକଙ୍କ ଅଭିଯୋଗ କ୍ରମେ ପ୍ରାୟ ୧୮ ଗୋଟି ହାତୀ କଦଳୀ ବଗିଚାରେ କଦଳୀ ଗଛଗୁଡ଼ିକୁ ଭାଙ୍ଗି ପାଦରେ ଦଳି ଚକଟି ନଷ୍ଟ କରିଦେଇଛନ୍ତି ।

ଗତ ଡ଼ିସେମ୍ବର ମାସରେ କମେଗାଁ, ବାଲିପଡା, ଭାନପୁର, ତୁଲାପଡା, କୁର୍ମେଲ, ଗୁଡାଙ୍ଗଗୋଚ୍ଛା, ତିତକେଲା, ପଲସାପଡା ଓ ବୁର୍ଡିପଡା ଗ୍ରାମରେ ହାତୀପଲ ଆସି ବ୍ୟାପକ ଫସଲ ନଷ୍ଟ କରିଥିଲେ । ସେହି ସମୟରେ ଉକ୍ତ ହାତୀପଲରେ ପ୍ରାୟ ୨୯ଟି ହାତୀ ରହିଥିଲେ । ହାତୀମାନେ ନର୍ଲା ରେଞ୍ଜ ଅଚଂଳରେ ଦୀର୍ଘ ଦିନରୁ ରହି ଆସୁଥିବା ବେଳେ ବାରମ୍ବାର ଫସଲ ନଷ୍ଟ କରି ଚାଲିଥିବାରୁ ଚାଷୀ ଘୋର କ୍ଷତିରେ ରହି ଆସୁଛି । କ୍ଷତିଗ୍ରସ୍ତ ଚାଷୀଙ୍କୁ ସରକାରୀ ସହାୟତା ରାଶି ପ୍ରଦାନ କରାଯିବାକୁ ଚାଷୀ ମହଳରେ ଦାବି ହେଉଛି ।