କୋଇଲା ବୋଝେଇ ଟ୍ରକ ଦୁର୍ଘଟଣା ଅଳ୍ପକେ ବର୍ତ୍ତିଲେ ଡ଼୍ରାଇଭର

ଓଡ଼ିଶା ତାଜା ନ୍ୟୁଜ୍ (୨ ଫେବ୍ରୁଆରୀ ବୁଧବାର ) କଳାହାଣ୍ଡି :- ନର୍ଲା ବ୍ଳକ ଅନ୍ତର୍ଗତ ପିପଲପଦର ଗ୍ରାମ ନିକଟରେ ଏକ କୋଇଲା ବୋଝେଇ ଟ୍ରକ ଓଲଟି ପଡିବାରୁ ଅଳ୍ପକେ ଟ୍ରକ ଡ଼୍ରାଇଭର ରକ୍ଷା ପାଇଛନ୍ତି  । ମଙ୍ଗଳବାର ଦିନ ସନ୍ଧ୍ୟା ସମୟରେ ମ.ରାମପୁର ଓ ନର୍ଲା ମୁଖ୍ୟ ରାସ୍ତାର ପିପଲପଦର ବୁଲାଣିରେ ଏକ କୋଇଲା ବୋଝେଇ ଟ୍ରକ (ଓଡି ୧୭ଏସ୪୯୬୧)ଟି ଭାରସାମ୍ୟ ହରାଇ ଧାନ ବିଲକୁ ପଶି ଓଲଟି ପଡିଥିଲା । ଦୁର୍ଘଟଣାରେ ଟ୍ରକ ଡ୍ରାଇଭରର ଗୋଡ ଟ୍ରକ କବାଟରେ ଚାପି ହୋଇ ରହିଯାଇ ଥିଲା ।

ଖବର ପାଇ ନର୍ଲା ପୋଲିସ ଓ ଦମକଳବାହିନୀ ଘଟଣା ସ୍ଥଳରେ ପହଞ୍ଚି ଥିବା ସତ୍ତ୍ବେ ନର୍ଲା ଦମକଳ କେନ୍ଦ୍ରରେ କଟର ମେସିନ ନଥିବାରୁ ଭବାନୀପାଟଣା ଦମକଳ କେନ୍ଦ୍ରରୁ କଟର ଉପକରଣ ଆସିବା ପରେ ଦୀର୍ଘ ୨ ଘଣ୍ଟା ପରେ କବାଟ କଟାଯାଇ ଡ଼୍ରାଇଭର ଜଣଙ୍କୁ ଉଦ୍ଧାର କରାଯାଇ ନର୍ଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା ।

ବିଶାଖାପାଟଣାରୁ ବରଗଡ଼କୁ କୋଇଲା ପରିବହନ ଟ୍ରକଟି ଯାଉଥିବା ଜଣାପଡିଛି । ଏଠାରେ ସୂଚନାଯୋଗ୍ୟ ଏହି ବୁଲାଣିରେ ଅନେକ ଥର ଦୁର୍ଘଟଣା ମାନ ଘଟି ଅନେକ ଧନଜୀବନ ନଷ୍ଟ ହେବାରେ ଲାଗିଛି । ପ୍ରଶାସନ ପକ୍ଷରୁ ଏହି ସ୍ଥାନକୁ ବ୍ଲାକ ସ୍ପଟ୍ ଭାବେ ଚିହ୍ନଟ କରାଯାଇ ଆବଶ୍ୟକ ପଦକ୍ଷେପ ଗ୍ରହଣ କରାଯିବାକୁ ଦାବି ହେଉଛି ।