ବନ୍ଦ ଲଫାପା ର ଖେଳ ; ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ କାହା ମୁଣ୍ଡରେ ଢାଳିବ ସୁନା କଳସ – ରଣପୁର

ରଣପୁରରେ ଚିନ୍ତା ର କାରଣ : ଜିଲ୍ଲା ପରିଷଦ ପଦ ପାଇଁ କାହାକୁ ବାଛିବେ କାହାକୁ ରଖିବେ ସତ୍ୟ ନାରାୟଣ

ଓଡ଼ିଶା ତାଜା ନ୍ୟୁଜ୍ (୧୫ ଜାନୁଆରୀ ଶନିବାର) ରଣପୁର :- ନୟାଗଡ ଜିଲ୍ଲା ରଣପୁର ତ୍ରିସ୍ତରୀୟ ପଞ୍ଚାୟତ ନିର୍ବାଚନ ନିମନ୍ତେ ରଣପୁର ବ୍ଲକର ୫୫ଗୋଟି ପଞ୍ଚାୟତ,ରଣପୁର ନିର୍ବାଚନ ମଣ୍ଡଳୀ ରେ ୬ ଟି ଜିଲ୍ଲା ପରିଷଦ ଜୋନ ରେ ଧୀରେ ଧୀରେ ରାଜନୈତିକ ଉଷ୍ମତା ବଢୁଥିବା ଦେଖିବାକୁ ମିଳିଅଛି । ଗାଁ ଗାଁ ରେ ପୋଷ୍ଟର ବ୍ୟାନର ଛାଉଣୀ ସମେତ ଭୋଜି ଭାତର ଆସର ଜମୁଥିବା ବେଳେ ନିର୍ବାଚନ କୋଭିଡ କଟକଣା ଆଗାମୀ ନିର୍ବାଚନ ପ୍ରଚାର ପ୍ରସାରକୁ ଫିକା ପକାଇବ ବୋଲି ଏବେ ଠାରୁ ଦ୍ଵନ୍ଦ ଉପୁଜିଲାଣି ।

ଏଭଳି ପରିସ୍ଥିତିରେ ଦଳୀୟ ସମର୍ଥିତ ସମସ୍ତ ସରପଞ୍ଚ ଏବଂ ସମିତିସଭ୍ୟ ପ୍ରାର୍ଥୀଙ୍କୁ ବିଜୟ ଲାଭ କରିବା ଉଦ୍ଦେଶ୍ୟରେ ଶାସକ ବିଜେଡି ଦଳ ପ୍ରତି ଗାଁ ଗାଁ ରେ ରାଜନୀତିକ ସମୀକ୍ଷକ ତଥା କିଛି ପୁରୁଖା ନେତାଙ୍କୁ ଗୁପ୍ତଚରଭାବେ ପ୍ରେରଣ କରି ଆଶାୟୀ ପ୍ରାର୍ଥୀଙ୍କ ସମ୍ବନ୍ଧରେ ପୁଙ୍ଖାନୁପୁଙ୍ଖ ତର୍ଜମା କରିବା ସହ ଏକ ତଥ୍ୟ ପ୍ରସ୍ତୁତ କରିଅଛି । ସାଧାରଣ ଲୋକଙ୍କ ମତାମତକୁ କେନ୍ଦ୍ର କରି ଏହି ତଥ୍ୟାବଳୀ ପ୍ରସ୍ତୁତ ହୋଇଥିବା ଜଣାପଡିଛି । ବିଶେଷ କରି ଆଶାୟୀଙ୍କ ଲୋକପ୍ରିୟତାକୁ ଆଧାର କରି ବିଜୟୀ ହାର ଅଧିକା ଥିବା ଆଶାୟୀଙ୍କୁ ଦଳ ପ୍ରାର୍ଥୀ କରିପାରେ ବୋଲି ଆଲୋଚନା ହେଉଅଛି ।

ଇତି ମଧ୍ୟରେ ନିଜ ସପକ୍ଷରେ ମତାମତ ପ୍ରଦାନ ନିମନ୍ତେ କିଛି ଆଶାୟୀ ଗୁପ୍ତଚରଙ୍କୁ ହାତବାରିସି କରି ସନ୍ତୁଷ୍ଟ କରିବାକୁ ଚେଷ୍ଟା କରିଛନ୍ତି ,ଏ ପରିପ୍ରେକ୍ଷୀରେ କିଛି ପଞ୍ଚାୟତରେ ସଠିକରୂପେ ପର୍ଯ୍ୟବେକ୍ଷଣ ହୋଇ ପାରିବ କି ନାଇଁ ତାକୁ ନେଇ ସନ୍ଦେହ ଉପୁଜିଛି । ପ୍ରାର୍ଥୀପତ୍ର ଦାଖଲ ନିମନ୍ତେ ତାରିଖ ନିକଟତର ହେଉଥିବାବେଳେ ଇତି ମଧ୍ୟରେ ପର୍ଯ୍ୟବେକ୍ଷକରୂପୀ ଗୁପ୍ତଚରମାନେ ଏକ ବନ୍ଦ ଲଫାପା ମାଧ୍ୟମରେ ନିଜ ନିଜର ଅନୁଶୀଳନ ରିପୋର୍ଟ ଦଳୀୟ ହାଇକମାଣ୍ଡଙ୍କ ନିକଟକୁ ପଠାଇଥିବା ଜଣାପଡିଛି ।

ଉକ୍ତ ରିପୋର୍ଟ ଆଧାରରେ ଦଳୀୟ ଟିକେଟ ମିଳିବ ନା ନାହିଁ ତାକୁ ନେଇ ଆଶାୟୀ ଏବେ ଦ୍ଵନ୍ଦରେ ଥିବାବେଳେ ଖୁବ ଶ୍ରୀଘ୍ର ଏଥିରେ ଯବନିକା ପଡିବ ବୋଲି ଆଶା କରାଯାଉଛି । ଇତି ମଧ୍ୟରେ ୨୦୧୯ ସାଧାରଣ ନିର୍ବାଚନରେ ଭୋଟରଙ୍କ କୌଶଳ ଯୁକ୍ତ ମତଦାନ ସବୁ ରାଜନୈତିକ ଦଳ ନିମନ୍ତେ ଚିନ୍ତାର କାରଣ ପାଲଟି ଥିବା ବେଳେ ଲୋକସଭା ଏବଂ ବିଧାନସଭା ପାଇଁ ଭୋଟର ପୃଥକ ପୃଥକ ମତଦାନ ସାବ୍ୟସ୍ତ କରିଥିଲେ ।

ଦଳୀୟ ଜିଲ୍ଲାପରିଷଦ ଭୋଟ ବ୍ୟାଙ୍କକୁ ନିଜ ସପକ୍ଷରେ ରଖିବାକୁ ଦୃଷ୍ଟିରେ ରଖି ଶାସକଦଳ ସମର୍ଥିତ ପ୍ରାର୍ଥୀଙ୍କ ତାଲିକାରେ ମୋହର ବାଜିବ ବୋଲି ବିଶ୍ୱସ୍ତ ସୂତ୍ରରୁ ଜଣାପଡିଛି । ତେବେ ଆଗାମୀ ନିର୍ବାଚନରେ ଗୁପ୍ତଚରମାନଙ୍କ ଅଙ୍କକଷା ଦଳୀୟ ହାଇକମାଣ୍ଡଙ୍କ ପାଇଁ କେତେ ଲାଭପ୍ରଦ ହେବ ତାହା ଦେଖିବାକୁ ବାକି ରହିଲା ।