ବିଭିନ୍ନ ସମସ୍ୟାକୁ ନେଇ ରାଜ୍ୟ ୬ ନଂ ରାଜପଥ ଅବରୋଧ, ଶହ ଶହ ଯାନବାହାନ ଅଟକ

ଓଡ଼ିଶା ତାଜା ନ୍ୟୁଜ୍ (୦୮ ଡିସେମ୍ବର ବୁଧବାର ) କଳାହାଣ୍ଡି :- ଲାଞ୍ଜିଗଡ଼ ବ୍ଳକ ଲାଞ୍ଜିଗଡ଼ ରୋଡ଼ ପଞ୍ଚାୟତବାସୀ ବିଭିନ୍ନ ସମସ୍ୟାକୁ ନେଇ ଆଜି ଭବାନୀପାଟଣା ଠାରୁ ରାୟଗଡା ଜିଲ୍ଲାକୁ ସଂଯୋଗ କରୁଥିବା ରାଜ୍ୟ ୬ ନଂ ରାଜପଥକୁ ଅବରୋଧ କରିଥିଲେ।ଆଜି ଭୋର ସକାଳ ୬ ଘଣ୍ଟା ସମୟରେ କିଡିଙ୍ଗ ଗାଁ ଛକ ନିକଟରେ ପଞ୍ଚାୟତର ବିଭିନ୍ନ ଗ୍ରାମର ଶହ ଶହ ମହିଳା ଓ ପୁରୁଷ ଏହି ରାଜପଥ ଅବରୋଧ କରିଥିଲେ।ଏହି ପଞ୍ଚାୟତ ଅଧିନରେ ଥିବା ଅନେକ ଗାଁ ଯାହା କି ଆଜି ବି ସରକାରଙ୍କ ବିଭିନ୍ନ ମୌଳିକ ଅଧିକାର ପାଇବାରୁ ବଞ୍ଚିତ ରହି ଥିବା ନେଇ ଦାବି ହୋଇଥିଲା ।

ଏଥି ମଧ୍ୟରୁ ମୁଖ୍ୟ ହେଉଛି କିଡିଙ୍ଗ ଗାଁ ଛକ ରାଜ୍ୟ ୬ ନଂ ରାଜପଥ ଠାରୁ ଲାଞ୍ଜିଗଡ଼ରୋଡ଼ ପର୍ଯ୍ୟନ୍ତ ପିଡବ୍ଲୁଡି ରାସ୍ତା ନିର୍ମାଣ, ମାଡିବନ୍ଧା ଓ ମହେଶ୍ୱର ପୁର ଗ୍ରାମଠାରୁ ଲାଞ୍ଜିଗଡ଼ରୋଡ଼ ମଧ୍ୟରେ ଥିବା ସାନ୍ଧୁଲ ନଦୀରେ ପୋଲ ନିର୍ମାଣ, ଲାଞ୍ଜିଗଡ଼ରୋଡ଼ ହାଇସ୍କୁଲ ଠାରୁ କାଉଗୁଡା ଆଶ୍ରମ ସ୍କୁଲ ମଧ୍ୟରେ ଥିବା ସାନ୍ଧୁଲ ନଦୀରେ ପୋଲ ଓ ରାସ୍ତା ନିର୍ମାଣ, ମାଡିବନ୍ଧା ସାନ୍ଧୁଲ ନଦୀଠାରୁ ବସୁଧା ପାନୀୟ ଜଳ ଯୋଗାଣରେ ବହୁ ବିଳମ୍ବ ଯୋଗୁଁ ଅତିଶୀଘ୍ର କାର୍ଯ୍ୟ ତ୍ୱରାନ୍ୱିତ କରିବା ସହ ଘରକୁ ଘର ପାନୀୟ ଜଳ ଯୋଗାଣ ଆଦି ଦାବି କରି ଏହି ରାସ୍ତା ଅବରୋଧ କରିଥିଲେ ।

ଏନେଇ ପୂର୍ବରୁ ଜିଲ୍ଲା ପ୍ରଶାସନ ଅଧିକାରୀ ମାନଙ୍କ ନିକଟରେ ବାରମ୍ବାର ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳି ନ ଥିବା ଯୋଗୁଁ ଏନେଇ ପଞ୍ଚାୟତ ଅଞ୍ଚଳବାସୀଙ୍କ ମଧ୍ୟରେ ଏକ ଅସନ୍ତୋଷର ବାତାବରଣ ସୃଷ୍ଟି ହୋଇଥିଲା । ଏହାକୁ ନେଇ କିଛିଦିନ ପୂର୍ବରୁ ପଞ୍ଚାୟତବାସୀଙ୍କ ମଧ୍ୟରେ ଏକ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ପଞ୍ଚାୟତର ବିଭିନ୍ନ ଗ୍ରାମର ଲୋକମାନେ ସାମିଲ ହୋଇ ଆସନ୍ତା ଡିସେମ୍ବର ୮ ତାରିଖରେ ସକାଳ ୬ ରୁ ସନ୍ଧ୍ୟା ୬ ଘଣ୍ଟା ପର୍ଯ୍ୟନ୍ତ ଭବାନୀପାଟଣା ଠାରୁ ରାୟଗଡା ଜିଲ୍ଲାକୁ ସଂଯୋଗ କରୁଥିବା ରାଜ୍ୟ ୬ ନମ୍ବର ରାଜପଥ ଅବରୋଧ କରିବା ପାଇଁ ନିଷ୍ପତ୍ତି ନେଇଥିଲେ ।

ଆଜି ସକାଳେ ଏହି ରାସ୍ତା ଅବରୋଧ ହୋଇଥିବା ବେଳେ ଜରୁରୀ କାଳୀନ ସେବା ବ୍ୟତୀତ ଶହ ଶହ ମାଲ ପରିବହନ ଓ ଯାତ୍ରୀ ବାହି ବସ ଅଟକି ରହିଥିଲା।ଯାହା ଫଳରେ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ।ଯେପର୍ଯ୍ୟନ୍ତ ପ୍ରଶାସନ ଅଧିକାରୀ ଆସି ପ୍ରତିଶ୍ରୁତି ନଦେବେ ସେ ପର୍ଯ୍ୟନ୍ତ ଧାରଣା ଜାରି ରହିବ ବୋଲି ପଞ୍ଚାୟତବାସୀ ଚେତାବନୀ ଦେଇଥିଲେ।ଏହାକୁ ଦୃଷ୍ଟିରେ ରଖି ଶାନ୍ତି ଶୃଙ୍ଖଳା ରକ୍ଷା ପାଇଁ ନର୍ଲା ଥାନା ଅଧିକାରୀ ରେଣୁକା ସୁନା ଓ ସିକେରକୁପା ଫାଣ୍ଡି ଅଧିକାରୀ ସୁବାସ ଚନ୍ଦ୍ର ଗୁରୁଙ୍କ ନେତୃତ୍ୱରେ ପୁଲିସ ଫୋର୍ସ ଘଟଣା ସ୍ଥଳରେ ଉପସ୍ଥିତ ରହିଥିଲେ।

ଏହାପରେ ପ୍ରଶାସନ ପକ୍ଷରୁ କଳାହାଣ୍ଡି ଏଡିସନାଲ ଏସପିଙ୍କ ସ଼ହ ନର୍ଲା ତହସିଲଦାର ମାନସ ରଞ୍ଜନ ତ୍ରିପାଠୀ, ଲାଞ୍ଜିଗଡ଼ ତହସିଲଦାର ମୁନିନ୍ଦ୍ର ହୋନ୍ନାଙ୍ଗା ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବହୁ ବୁଝାସୁଝା ଓ ପ୍ରତିଶ୍ରୁତି ପରେ ପ୍ରାୟ ୯ ଘଣ୍ଟା ପରେ ଯାତାୟତ ସ୍ୱାଭାବିକ ହୋଇଥିଲା।ଆଗାମୀ ଦିନରେ ପ୍ରତିଶ୍ରୁତି ପୂରଣ ନ ହେଲେ ପୁଣି ଥରେ ଲୋକେ ରାସ୍ତା ଅବରୋଧ ତଥା ଭୋଟ ବର୍ଜନ କରିବାକୁ ଚେତାବନୀ ଦେଇଛନ୍ତି ।