ଥୁଆପଦର ଗ୍ରାମରେ ଡକାୟତି : ମାରଣାସ୍ତ୍ର ଦେଖାଇ ଲୁଟିନେଲେ ନଗଦ ଟଙ୍କା ସହ ସୁନା ଓ ରୂପା

ଓଡ଼ିଶା ତାଜା ନ୍ୟୁଜ୍ (୧ ଡିସେମ୍ବର ବୁଧବାର ) କଳାହାଣ୍ଡି :- ନର୍ଲା ବ୍ଲକ ଥୁଆପଦର ଗ୍ରାମର ପ୍ରାଥମିକ ବିଦ୍ୟାଳୟ ନିକଟରେ ଥିବା ଅନ୍ତରାମ ପାତ୍ରଙ୍କ ଘରେ ଘଟିଯାଇଛି ସଶସ୍ତ୍ର ଡକାୟତି । ସୂଚନାମତେ ଅନ୍ତରାମଙ୍କ ପୁଅ ବରୁଣ ଦାଦନ ଶ୍ରମିକ ଭାବରେ ରାଜକୋଟରେ ଥିବାବେଳେ ତାଙ୍କ ଘରେ ଏହି ଡକାୟତ ହୋଇଛି । ପ୍ରାୟ ୮ ରୁ ୧୦ ଜଣ ଏକ ଡକାୟତ ଗ୍ୟାଙ୍ଗ୍ ପ୍ରଥମେ ଏକ ନବ ନିର୍ମିତ ଘରେ ପ୍ରବେଶ କରି ଉକ୍ତ ଘରେ ଶୋଇଥିବା ବରୁଣଙ୍କ ବାପା ଅନ୍ତରାମ ଓ ପଡୋଶୀ ପଙ୍କଜ ଦୀପଙ୍କ ହାତକୁ ପଛପଟୁ ବାନ୍ଧିଦେଇ କାବୁକରିବା ପରେ ବନ୍ଧୁକ ଓ ଟାଙ୍ଗିଆ ଦେଖାଇ ଚୁପଚାପ୍ ରହିବାକୁ କହିଲେ ଓ ଦୁଇଜଣ ଡକାୟତ ଉକ୍ତ ଦୁଇଜଣଙ୍କୁ ଜଗି ରହିଥିବା ବେଳେ ଗ୍ୟାଙ୍ଗର ଅନ୍ୟମାନେ ଅନ୍ତରାମଙ୍କ ଅନ୍ୟ ଏକଘରେ ଚଢଉ କରିଥିଲେ ।

ଉକ୍ତ ଘରେ ପୁଅ ବରୁଣର ଅନୁପସ୍ଥିତିରେ ପୁତ୍ରବଧୁ ,ତିନି ନାତୁଣୀ ଓ ତାଙ୍କ ଛୋଟନାତି ଶୋଇଥିବା ବେଳେ ଡକାୟତ ମାନେ ଧକ୍କାମାରି ମୁଖ୍ୟଦ୍ୱାରର କବାଟ ଖୋଲି ଭିତରକୁ ପ୍ରବେଶ କରି ସମସ୍ତଙ୍କୁ କାବୁ କରିବା ପରେ ଘର ଭିତରେ ଥିବା ଏକଭରି ଓଜନର ସୁନା ଗହଣା, ପ୍ରାୟ ଏକ କେଜି ଓଜନର ରୂପା ଗହଣା ଓ ନଗଦ ୧୮ ହଜାର ଟଙ୍କା ସମେତ ଘରେ ଥିବା ଏକ ବଡ ଛେଳି , ଗୋଟିଏ ମୋବାଇଲ ଉଠାଇ ନେଇଥିଲେ ।

ସମସ୍ତ ଡକାୟତ ମଙ୍କିକ୍ୟାପ୍ ଓ ମାସ୍କ୍ ପିନ୍ଧିଥିଲେ ବୋଲି ପରିବାର ଲୋକେ ପ୍ରକାଶ କରିଛନ୍ତି । ତେବେ ଏ ବାବଦରେ କେସିଙ୍ଗା ଥାନାରେ ଅଭିଯୋଗ ହେବାପରେ କେଶ୍ ନଂ ୪୬୦/୨୧ ରେ ମାମଲା ରୁଜୁକରି କେସିଙ୍ଗା ଆଦର୍ଶ ଥାନାର ଥାନାଧିକାରୀ ସତ୍ୟକୁମାର ନନ୍ଦ, ଏସ୍.ଡି.ପି.ଓ ଏସ୍.ସୁଶ୍ରୀ, ସଦର ଥାନାର ଡି.ଏସ୍.ପି ସୁନରମ୍ ହେମ୍ବ୍ରମ୍ ଓ ପଲମ ଫାଣ୍ଡି ଅଧିକାରୀ ଅସିତ ପଣ୍ଡାଙ୍କ ସମେତ ସାଇଣ୍ଟିଫିକ୍ ଟିମ୍ ତଦନ୍ତ ଆରମ୍ଭ କରିଛନ୍ତି ।