ଯୁବପିଢି ୧୯୭୧ ଯୁଦ୍ଧର କାହାଣୀ ସଂପର୍କରେ ଜାଣି ଦେଶପ୍ରେମରେ ଉଦ୍‌ବୁଦ୍ଧ ହେବାର ଆବଶ୍ୟକତା ରହିଛି – ବିଜୟୀ ଯୋଦ୍ଧା

ଓଡ଼ିଶା ତାଜା ନ୍ୟୁଜ୍ (୨ ନଭେମ୍ବର ମଙ୍ଗଳବାର) ଭୁବନେଶ୍ୱର :- ୧୯୭୧ ମସିହାରେ ସଂଘଠିତ ପାକିସ୍ତାନ ଉପରେ ଭାରତର ବିଜୟ ଲାଭର ୫୦ ବର୍ଷ ପୂର୍ତି ପାଳନ ଉପଲକ୍ଷେ ଭୁବନେଶ୍ୱରରେ ପହଁଚିଥିବା ସ୍ୱର୍ଣ୍ଣିମ ବିଜୟ ମଶାଲ ୪ର୍ଥ ଦିବସରେ ଆଜି ଏହି ଯୁଦ୍ଧରେ ଅଂଶଗ୍ରହଣ କରିଥିବା ୪ ଜଣ ବୀର ଯବାନଙ୍କ ଘରକୁ ଗସ୍ତ କରିଥିଲା । ପାଇପ୍ ବ୍ୟାଣ୍ଡ ଶୋଭାଯାତ୍ରା ମଧ୍ୟରେ ବିଜୟ ମଶାଲ ଆଜି ସେମାନଙ୍କ ଘରେ ପହଁଚିବା ପରେ ସମସ୍ତ ବୀର ଯୋଦ୍ଧାମାନେ ଆନନ୍ଦ ଓ ଭାବବିହ୍ୱଳ ହେବା ସହ ଯୁଦ୍ଧରେ ସେମାନଙ୍କର ଅଭିଜ୍ଞତା ଓ ଭୂମିକା ସଂପର୍କରେ ପ୍ରକାଶ କରିଥିଲେ ।

ଯୁଦ୍ଧରେ ଅଂଶଗ୍ରହଣ କରିଥିବା ଭୁବନେଶ୍ୱର ଆଇ.ଆର.ସି ଭିଲେଜରେ ରହୁଥିବା ଲେଫ୍‌ଟନାଣ୍ଟ କର୍ଣ୍ଣେଲ ଲୋକନାଥ ସାହୁ କହିଲେ ଯେ, ସେ ଜଣେ ଡାକ୍ତର ଭାବରେ ଯୋଗଦେଇ ୨୦୦ରୁ ଅଧିକ ଆହତ ସୈନିକଙ୍କୁ ବିଭିନ୍ନ ଡାକ୍ତରଖାନାକୁ ନେଇ ଆରୋଗ୍ୟ କରାଇଥିଲେ । ୧୪ ଦିନ ଯୁଦ୍ଧରେ ୯୩୦୦୦ ପାକିସ୍ତାନୀ ସେନା ଆତ୍ମ ସମର୍ପଣ କରିବା ସହିତ ବାଂଲାଦେଶ ସୃଷ୍ଟି ହେଲା । ଆମ ଦେଶ ତଥା ରାଜ୍ୟର ଯୁବ ପିଢି ୧୯୭୧ର ସଂଘଟିତ ଏହି ଯୁଦ୍ଧ ଏବଂ ଯୋଦ୍ଧାମାନଙ୍କ ବୀରତ୍ୱ ସଂପର୍କରେ ଅଧିକରୁ ଜାଣି ଦେଶପ୍ରେମରେ ଉଦ୍‌ବୁଦ୍ଧ ହେବା ଓ ଦେଶପ୍ରତି ଅନୁରକ୍ତି ରହିବା ଉପରେ ସେ କହିଥିଲେ ।

ସେହିପରି ୧୯୭୧ ଯୁଦ୍ଧରେ ଅଂଶଗ୍ରହଣ କରିଥିବା ଆଇ.ଆର.ସି ଭିଲେଜରେ ରହୁଥିବା ଅନ୍ୟତମ ବୀର ଯବାନ କର୍ଣ୍ଣେଲ ସମରେନ୍ଦ୍ର ଚନ୍ଦ୍ର ମହାନ୍ତି ଙ୍କ ଘରକୁ ବିଜୟ ମଶାଲ ପଂହଚିବା ପରେ ସେ ଆନନ୍ଦବ୍ୟକ୍ତ ତାଙ୍କର ଅଭିଜ୍ଞତା ବଖାଣି କହିଲେ ଯେ, ଯୁଦ୍ଧ ସମୟରେ ସେ ଦେଶର ପଶ୍ଟିମ କ୍ଷେତ୍ର ବାରମେର ସେକ୍ଟରରେ କାର୍ଯ୍ୟ କରିଥିଲେ । ସେ ଟେକ୍ନିକାଲ(ବୈଷୟିକ) କୋର ଗ୍ରୁପ୍‌ରେ ଥିଲେ ା ଯୁଦ୍ଧରେ ବୈଷୟିକ ଯନ୍ତ୍ରପାତି ଖରାପ ହେଲେ ସେମାନଙ୍କୁ ତତ୍‌କ୍ଷଣାତ ମରାମତି କରିବାକୁ ପଡୁଥିଲା ।

ଆମ ସେନା ସେନାବାହିନୀ ଯୁଦ୍ଧ ସମାପ୍ତ ହେବା ପର୍ଯ୍ୟନ୍ତ ଶତ୍ରୁମାନଙ୍କ ଅଂଚଳକୁ ନିଜ କବ୍‌ଜାରେ ରଖିଥିଲେ । ଯୁଦ୍ଧ ପରେ ସେ ଅଂଚଳ ବହୁ କ୍ଷତିଗ୍ରସ୍ତ ହୋଇଥିଲା । ମିଳିତ ଜାତିସଂଘର “ଜେନେଭା” ବୁଝାମଣା ଅନୁସାରେ ଯୁଦ୍ଧ ପରେ ଲୋକମାନଙ୍କ ଘର ସଜାଡିବା ଓ ସେ ଅଂଚଳର ଭିତିଭୂମି ସଜାଡିବା ପାଇଁ ଆମ ସେନା ଉଲ୍ଲେଖନୀୟ କାର୍ଯ୍ୟକରି ବିଶ୍ୱ ସମୁଦାୟ ଆଗରେ ଉଚ୍ଚ ପ୍ରଶଂସିତ ହୋଇଥିଲା । ୧୯୭୧ ଯୁଦ୍ଧ ଆମ ପାଇଁ ଉଲ୍ଲେଖନୀୟ ସଫଳତା ବୋଲି ପ୍ରକାଶ କରିବା ସହିତ ଆମର ସାର୍ବଭୌମତ୍ୱକୁ ରକ୍ଷା କରିବାରେ ନୂତନ ପିଢିଙ୍କ ପାଇଁ ବାର୍ତା ରହିଛି ବୋଲି ସେ କହିଥିଲେ ।

ଆଇ.ଆର.ସି ଭିଲେଜରେ ରହୁଥିବା ୧୯୭୧ର ଅନ୍ୟତମ ବୀର ଯୋଦ୍ଧା ବ୍ରିଗେଡିୟର ବି.ଏନ୍‌.ପଣ୍ଡା କହିଲେ ଯେ, ସେ ଜଣେ ଡାକ୍ତର ଭାବେ ଯୁଦ୍ଧରେ ୨୩ ବର୍ଷ ବୟସରେ ନୂଆ ନୂଆ ଯୋଗଦାନ କରିଥା’ନ୍ତି । ଯୁଦ୍ଧ ସମୟରେ ସେମାନେ କିପରି ମାଟି ଓ ଛଣର ଆଶ୍ରୟରେ ସତର୍କତା ଅବଲମ୍ବନ କରି ରହୁଥିଲେ, ଯୁଦ୍ଧରେ ଆହତ ହୋଇଥିବା ସୈନିକମାନେ କିପରି ଅଳ୍ପ ଆରୋଗ୍ୟ ଲାଭ କରିଥିଲେ ମଧ୍ୟ ଯୁଦ୍ଧ କ୍ଷେତ୍ରକୁ ଯିବା ପାଇଁ ସଙ୍ଗେ ସଙ୍ଗେ ଆଗ୍ରହ ପ୍ରକାଶ କରୁଥିଲେ ତାହା ବର୍ଣ୍ଣନା କରିଥିଲେ । ଥରେ ତାଙ୍କର ଅତି ନିକଟରେ ଏକ ଗୁଳି ଚାଲିଯାଇଥିଲା ।

ଏହି ଅନୁଭୂତିକୁ ନେଇ ସେ କହିଲେ ଯେ, ଯେପର୍ଯ୍ୟନ୍ତ ତୁମ ନାମରେ ଗୁଳି ଲେଖା ହୋଇନାହିଁ, ସେ ପର୍ଯ୍ୟନ୍ତ ତୁମ ଜୀବନ ଯାଇନାହିଁ । ସେହିପରି ସ୍ୱର୍ଗତ ଲେଫ୍ଟନାଣ୍ଟ ଜେନେରାଲ କେ.ପି.ଡି ସାମନ୍ତଙ୍କ ପତ୍ନୀ ଶ୍ରୀମତୀ ସୁମଞ୍ଜଳୀ ଦେବୀଙ୍କ ଘରକୁ ବିଜୟ ମଶାଲ ଯାତ୍ରା କରିଥିଲା । ଦେଶ ପକ୍ଷରୁ ୧୯୭୧ ଯୁଦ୍ଧରେ ତାଙ୍କ ପତି ଅଂଶଗ୍ରହଣ କରିଥିବାରୁ ସେ ଗର୍ବିତ ବୋଲି ପ୍ରକାଶ କରିଥିଲେ । ସବୁସ୍ଥାନରେ ଯୁଦ୍ଧ ବୀର ଯବାନଙ୍କ ପରିବାର, ସଂପର୍କିୟମାନେ ଉପସ୍ଥିତ ରହି ବିଜୟ ମଶାଲକୁ ଉଚ୍ଛ୍ୱସିତ ସମ୍ବର୍ଦ୍ଧନା ଜ୍ଞାପନ କରିଥିଲେ । ‘ଭାରତମାତା କି ଜୟ’ସ୍ଲୋଗାନରେ ଯୁଦ୍ଧ ବୀରମାନଙ୍କ ବାସଗୃହ ପ୍ରକମ୍ପିତ ହୋଇଥିଲା ।