ମହାକାଳପଡା ବିଧାୟକ ଅତନୁ ସବ୍ୟସାଚୀ ନାୟକ : ମାର୍ଶାଘାଇ ଓ ମହାକାଳପଡା ବ୍ଲକ ଗସ୍ତ କରି ସମ୍ଭାବ୍ୟ ବନ୍ୟାର ସମୀକ୍ଷା କରିଛନ୍ତି

ଓଡ଼ିଶା ତାଜା ନ୍ୟୁଜ୍ (୧୮ ସେପ୍ଟେମ୍ବର ଶନିବାର) ମାର୍ଶାଘାଇ :- ମହାକାଳପଡା ବିଧାୟକ ଅତନୁ ସବ୍ୟସାଚୀ ନାୟକ ଶୁକ୍ରବାର ମାର୍ଶାଘାଇ ଓ ମହାକାଳପଡା ବ୍ଲକ ଗସ୍ତ କରି ସମ୍ଭାବ୍ୟ ବନ୍ୟାର ସମୀକ୍ଷା କରିଛନ୍ତି । ମାର୍ଶାଘାଇ ବ୍ଲକରେ ବିଡିଓ ନିରଂଜନ ସାହୁଙ୍କ ସହିତ ଆଲୋଚନା କରି ବ୍ଲକ ପ୍ରଶାସନର ପ୍ରସ୍ତୁତି ସଂପର୍କରେ ବୁଝିଥିଲେ । ଏହାପରେ ମହାକାଳପଡା ବ୍ଲକର ଦଶମୈାଜି ଅଞ୍ଚଳ ଗସ୍ତ କରିଥିଲେ । ମହାନଦୀର ଶାଖା ନଦୀ ଲୁଣା ନଦୀର ଘେରା ମଧ୍ୟରେ ରହିଥିବା ଦଶମୈାଜିରେ ରହିଥିବା ଦୁଇଟି ପଞ୍ଚାୟତ ବଡକୂଳ ଓ କରଞ୍ଜ ପଞ୍ଚାୟତର ନଦୀ ବନ୍ଧ ପରିଦର୍ଶନ କରିଥିଲେ ।

ବଡକୂଳ ପଞ୍ଚାୟତର ଗୋପୀନାଥପୁର ଠାରେ ସ୍ଥାନୀୟ ଜନସାଧାରଣଙ୍କ ସହିତ ବନ୍ୟା ମୁକାବିଲା ପାଇଁ ପ୍ରସ୍ତୁତି ସଂପର୍କରେ ଆଲୋଚନା କରିଥିଲେ । ନଦୀ ବନ୍ଧକୁ ଦୁର୍ବଳ ସ୍ଥାନକୁ ସତର୍କ ନଜର ରଖିବା ସହିତ ବାଲି ବସ୍ତା ପ୍ରସ୍ତୁତ କରି ରଖିବା ପାଇଁ ଉପସ୍ଥିତ ଜଳସଂପଦ ଅଧିକାରୀମାନଙ୍କୁ ପରାମର୍ଶ ଦେଇଥିଲେ । ବିଧାୟକଙ୍କ ସହିତ ଜଳସଂପଦ ବିଭାଗର ନିର୍ବାହୀ ଯନ୍ତ୍ରୀ, ପୂର୍ବତନ ସରପଞ୍ଚ ଉତ୍ତମ ଦାସ, ଯୁବନେତା ନିହାର ରଂଜନ ଦାସ, କୁଞ୍ଜବିହାରୀ ଦାସ, ବିପ୍ର ମହାପାତ୍ର, ଅଜୟ ରାଉତ, ବାବୁଲି ସାମନ୍ତରାୟ ପ୍ରମୁଖ ଉପସ୍ଥିତ ଥିଲେ ।