ହିଂଜିଳିକାଟୁ, ( ଓଡିଶାତାଜାନ୍ୟୁଜ୍ ) 21.4.2020 ଏପ୍ରିଲ,ରିପୋର୍ଟ – ଶେଷଦେବ ସାହୁ :- ମହାମାରୀ କରୋନା ଭୁତାଣୁ ସଂକ୍ରମଣ ପାଇଁ ସାରା ଦେଶରେ ଏବେ ଲକଡ଼ାଉନ । ଗତ ମାର୍ଚ୍ଚ ୨୨ ତାରିଖ ଠାରୁ ଆସନ୍ତା ମେ ୩ ତାରିଖ ପର୍ଯ୍ୟନ୍ତ ସାରା ଦେଶକୁ ଲକଡ଼ାଉନ ଘୋଷଣା କରିଛନ୍ତି ସରକାର । ଅତ୍ୟାବଶ୍ୟକ ନହେଲେ ଘରୁ ବାହାରକୁ ବାହାରିବାକୁ ବାରଣ କରାଯାଇଛି ।
ଅତ୍ୟାବଶ୍ୟକ ସମୟରେ ଚାଲି ଚାଲି କିମ୍ବା ସାଇକେଲ ଯୋଗେ ଆସି ବଜାର ସଉଦା କିମ୍ବା ଅତ୍ୟାବଶ୍ୟକ ସାମଗ୍ରୀ କିଣିବା ସକାଶେ ପ୍ରଶାସନ ପକ୍ଷରୁ ଜନସାଧାରଣଙ୍କୁ ପରାମର୍ଶ ଦିଆଯାଇଛି । ପ୍ରତ୍ୟେକ କ୍ଷେତ୍ରରେ ସାମାଜିକ ଦୂରତ୍ୱ ରକ୍ଷା କରିବା ସହ ଘରୁ ବାହାରକୁ ବାହାରିଲେ ମାସ୍କ ବ୍ୟବହାର ସକାଶେ ପ୍ରଶାସନ ପକ୍ଷରୁ ଜନ ସଚେତନ କରାଯାଉଛି । ବିଶେଷ କରି ମୋଟର ସାଇକେଲ ଚଳାଚଳକୁ ସମ୍ପୁର୍ଣ୍ଣ ଭାବେ ବାରଣ କରାଯାଇଛି । ତଥାପି କିଛି ଅମାନିଆ ଏଥିରୁ ନିବୃତ ହେଉନାହାନ୍ତି ।
ତେବେ କିଛି ସଚେତନ ଜନସାଧାରଣ ବର୍ତମାନ ମୋଟର ସାଇକେଲ ଚଲାଇବାରୁ ନିଜକୁ ନିବୃତ ରଖି ଜରୁରୀ କାମ ପାଇଁ ସାଇକେଲ ବ୍ରବହାର କରୁଥିବା ଦେଖିବାକୁ ମିଳିଛି । ଏଥି ପାଇଁ ଘରେ ସାଇତି ରଖିଥିବା ପୁରୁଣା ସାଇକେଲକୁ ବାହାର କରି ଚଲାଇବାକୁ ବାଧ୍ୟ ହେଉଛନ୍ତି । କେତେକ ଜନସାଧାରଣ ନିଜ ପିଲାଙ୍କ ସାଇକେଲ ଧରି ବଜାରକୁ ଆସୁଥିବା ବେଳେ କିଛି ଲୋକ ନିଜ ବନ୍ଧୁ ପରିଜନଙ୍କ ଠାରୁ ସାଇକେଲ ମାଗି ବ୍ୟବହାର କରୁଥିବାର ଦେଖିବାକୁ ମିଳୁଛି ।
ପ୍ରତ୍ୟେହ ବହୁ ପରିମାଣରେ ଗାଡ଼ି ମୋଟର ଚଳପ୍ରଚଳ ହେବା ସେଥିରୁ ନିର୍ଗତ ବିଷାକ୍ତ ଅଙ୍ଗାରକାମ୍ଳ ଗ୍ୟାସ ବାୟୁରେ ମିଶି ବାୟୁମଣ୍ଡଳ ଦୁଷିତ ହେବା ସହ ପ୍ରଦୂଷଣ ବୃଦ୍ଧି ପାଉଥିଲା । ତେବେ ମୋଟର ସାଇକେଲର ସ୍ଥାନ ସାଇକେଲ ନେଇଥିବାରୁ ବାୟୁମଣ୍ଡଳ ପ୍ରଦୂଷିତ ନହେବା ସହ ଶବ୍ଦ ପ୍ରଦୂଷଣ ଓ ଦୂର୍ଘଟଣା ହାର କମିଛି । ସାଇକେଲ ଚାଳନା ଦ୍ୱାରା ବ୍ୟାୟମ କରିବାର ଲାଭ ମିଳିପାରୁଛି ବୋଲି କିଛି ବୁଦ୍ଧିଜୀବି ମତ ପ୍ରକାଶ କରିଛନ୍ତି ।
