ଗର୍ଭବତୀ ମହିଳାଙ୍କୁ ଗଳାକାଟି ହତ୍ୟା ଉଦ୍ୟମ, ଅଭିଯୁକ୍ତ ସ୍ଵାମୀ ଗିରଫ

ଓଡ଼ିଶା ତାଜା ନ୍ୟୁଜ୍ (୧ ସେପ୍ଟେମ୍ବର ବୁଧବାର ) କଳାହାଣ୍ଡି :- କେସିଙ୍ଗା ଥାନା ଅନ୍ତର୍ଗତ ଧଅଁରାମାଲ ଟାଙ୍ଗରୀ ପାହାଡ଼ ପାଦଦେଶରେ ଥିବା ଏକ କୁଡ଼ିଆରୁ ଗୁରୁତର ଆହତ ଅବସ୍ଥାରେ ଜଣେ ମହିଳାଙ୍କୁ ପୋଲିସ ଉଦ୍ଧାର କରିଛି । ମହିଳା ଜଣକ ଗର୍ଭବତୀ ଥାଇ ତାଙ୍କୁ ଗଳାକାଟି ହତ୍ୟା ଉଦ୍ୟମ କରାଯାଇଛି ।  ସମ୍ବଲପୁର ଜିଲ୍ଲା ଅଇଁଠାପାଲି ଥାନା ଅନ୍ତର୍ଗତ ନୂଆପାଲି ଗ୍ରାମର ପ୍ରକାଶନୀ ସାହାଣୀ (୨୨) ଧଅଁରାମାଲ ଗାଁ ନିକଟରେ ଥିବା ଏକ ଚାଷଜମି କୁଡ଼ିଆରେ ଗୁରୁତର ଅବସ୍ଥାରେ ପଡିଥିବାର ଦେଖି ଗ୍ରାମବାସୀମାନେ ତାଙ୍କୁ ଉଦ୍ଧାର କରିବା ପାଇଁ ପ୍ରଥମେ ପଲମ ଫାଣ୍ଡି ପୋଲିସକୁ ସୂଚନା ଦେଇଥିଲେ ।  ଫାଣ୍ଡି ଅଧିକାରୀ ଅସିତ ପଣ୍ଡା, କେସିଙ୍ଗା ଇନ୍ସପେକ୍ଟର ଦୀପାଞ୍ଜଳୀ ପ୍ରଧାନ, ଆଇଆଇସି ସତ୍ୟ କୁମାର ନନ୍ଦ ଘଟଣାସ୍ଥଳକୁ ଆସି ଆହତ ମହିଳାକୁ ଉଦ୍ଧାର କରି ଚିକିତ୍ସା ପାଇଁ କେସିଙ୍ଗା ଡ଼ାକ୍ତରଖାନାରେ ଭର୍ତ୍ତି କରାଇଥିଲେ ।

ପୋଲିସର ସୂଚନା ଅନୁଯାୟୀ ସମ୍ବଲପୁର ଜିଲ୍ଲା ଅଇଁଠାପାଲି ଥାନା ଅନ୍ତର୍ଗତ ନୂଆପାଲି ଗ୍ରାମର ନିହାର ସାହାଣୀ (୨୩) ପ୍ରକାଶନୀକୁ ଗତବର୍ଷ ପ୍ରେମ ବିବାହ କରିଥିଲେ । ପ୍ରକାଶନୀକୁ ନିହାର ନିଜ ମାମୁଁ ଘରକୁ ବୁଲାଇ ନେବାକୁ କହି ସେମାନେ ବସ ଯୋଗେ ସମ୍ବଲପୁରରୁ ଆସି କେସିଙ୍ଗା ଠାରେ ପହଞ୍ଚି ଥିଲେ । କେସିଙ୍ଗା ଅଞ୍ଚଳର ଜଣେ ସାଙ୍ଗ ସହ ମିଶି ବାଇକରେ ଧଅଁରାମାଲ ଗାଁ ନିକଟରେ ଥିବା ପାହାଡ଼ ପାଦଦେଶରେ ନିହାର ଓ ସାଙ୍ଗ ମିଶି ମହିଳାଙ୍କୁ ଗଳାକାଟି ହତ୍ୟା ଉଦ୍ୟମ କରିଥିଲେ ।

ଏଥିରେ ପ୍ରକାଶନୀ ଅଚେତ ହେବାରୁ ମୃତ୍ୟୁ ହୋଇଯାଇଥିବା ଭାବି ଅଭିଯୁକ୍ତ ମାନେ ଫେରାର ହୋଇଥିଲେ । ପ୍ରକାଶନୀଙ୍କ ଚେତା ଆସିବା ପରେ ସେ ନିକଟରେ ଥିବା ଏକ କୁଡ଼ିଆରେ ରାତି କଟାଇଥିଲେ । ବର୍ତ୍ତମାନ ମହିଳା ଜଣକ ନିଜ ବୟାନରେ ଠିକଣା ଦେବା ଯୋଗୁଁ ପୋଲିସ ଏକ ଟିମ୍ ଗଠନ କରି ସମ୍ବଲପୁର ଅଞ୍ଚଳକୁ ଯାଇ ନିହାରକୁ ଧରିବାରେ ସକ୍ଷମ ହୋଇଥିବା ସୂଚନା ମିଳିଛି । କେସିଙ୍ଗା ଆଦର୍ଶ ଥାନା ପକ୍ଷରୁ କେସ ନଂ ୨୧୯/୨୧ରେ ମାମଲା ରୁଜୁ କରି ଅଧିକ ତଦନ୍ତ ଜାରି ରଖିଥିବା ପୋଲିସ ସୂତ୍ରରୁ ଜଣାଯାଇଛି । ( ରିପୋର୍ଟ ପ୍ରଦୀପ କୁମାର ଗଉଡ କଳାହାଣ୍ଡି ବ୍ୟୁରୋ ଚିଫ)