ପିଲାଛୁଆ ନହେବାର କରୁଣ ପରିଣତି , ରଶି ଲଗାଇ ଆତ୍ମହତ୍ୟା କଲେ ସ୍ୱାମୀ-ସ୍ତ୍ରୀ

ଓଡ଼ିଶା ତାଜା ନ୍ୟୁଜ (୨୪ ଜୁଲାଇ ଶନିବାର ) କୋରାଇ :- ପିଲାଛୁଆ ନହେବାର କରୁଣ ପରିଣତି । ରଶି ଲାଗାଇ ଆତ୍ମ ହତ୍ୟା କଲେ ସ୍ୱାମୀ-ସ୍ତ୍ରୀ । ଏଭଳି ଅଭାବନୀୟ ଘଟଣା ଆଜି ଦେଖିବାକୁ ମିଳିଛି କୋରାଇ ଥାନା ଅନ୍ତର୍ଗତ ଗୌରପୁର ପଂଚାୟତ ଯୁଗଳ ଗ୍ରାମରେ । ଏହାକୁ ପରିବାରିକ କଳହ କୁହାଯାଇଥିଲା ବେଳେ ପାଖ ପଡୋଶୀ ପିଲାଛୁଆ ନହେବା କାରଣ ଜନିତ ବୋଲି କହୁଛନ୍ତି । ହେଲେ ପ୍ରକୃତ କାରଣ ଅସ୍ପଷ୍ଟ ରହିଥିଲା ବେଳେ ଦମ୍ପତିଙ୍କ ଆତ୍ମ ହତ୍ୟା ଏବେ ସ୍ଥାନୀୟ ଅଂଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲୋଟିଛି । ଆତ୍ମହତ୍ୟା କରିଥିବା ଦମ୍ପତି ଯୁଗଳ ଗାଁର ବ୍ରଜକିଶୋର ଯେନାଙ୍କ ପୁଅ ଶାନ୍ତନୁ (୩୯) ଓ ବୋହୁ ସବିତା ଯେନା ବୋଲି ଜଣାପଡିଛି । ଖବର ପାଇ କୋରାଇ ପୁଲିସ ଘଟଣା ସ୍ଥଳେ ପହଂଚି ତଦନ୍ତ ଜାରି ରଖିଛନ୍ତି । ପୁଲିସ ସୂତ୍ରରୁ ପ୍ରକାଶଯେ, ବ୍ରଜିକୋଣରଙ୍କ ଦୁଇ ପୁଅ ଶାନ୍ତନୁ ଓ ସନ୍ତୋଷ ।

ଦୁଇ ପୁଅ ଅଲଗା ହୋଇ ରହୁଥିଲା ବେଳ ବାର୍ଦ୍ଧକ୍ୟ ଜନିତ ରୋଗରେ ପୀଡିତଥିବା ବାପା ବ୍ରଜକିଶୋର ସାନପୁଅ ପାଖରେ ରହୁଥିଲେ । ବଡ ପୁଅ ଶାନ୍ତନୁ ୫ବର୍ଷ ପୂର୍ବେ ଏହି ଥାନା ଅନ୍ତର୍ଗତ ପଛିକୋଟ ପଂଚାୟତ ପତରକଣା ଗ୍ରାମରେ ସବିତାଙ୍କୁ ବିବାହ କରିଥିଲେ । ଉଭୟ ସ୍ୱମୀ-ସ୍ତ୍ରୀଙ୍କ ସଂପର୍କ ଭଲ ରହିଥିଲେହେଁ ବିବାହର ୫ବର୍ଷ ବିତିଯିବା ପରେ ପିଲାପିଲି ହେଉ ନଥିବାରୁ ଲୋକଙ୍କ ଟାହି ଟାପରା ମଧ୍ୟ ଶୁଣିବାକୁ ମିଳୁଥିଲା । ଏନେଇ ସ୍ୱାମୀ-ସ୍ତ୍ରୀ ଉଭୟଙ୍କ ମଧ୍ୟରେ ଅସନ୍ତୋଷ ଲାଗି ରହିଥିଲା । ଗତକାଲି ରାତିରେ ସ୍ୱାମୀ-ସ୍ତ୍ରୀ ମଧ୍ୟରେ ଅଯୋଥା ଝଗଡା ହୋଇଥିଲା । ହେଲେ ପରେ ସ୍ୱାମୀ-ସ୍ତ୍ରୀ ଦୁହେଁ ଖାଇପିଇ ଶୋଇଥିଲେ । କିନ୍ତୁ ପରିବାର ଲୋକେ ସକାଳୁ ଦେଖିଲା ବେଳକୁ ଶାନ୍ତନୁ ବେକରେ ଲୁଙ୍ଗି ବାନ୍ଧି ବାରିର ଏକ ଗଛରେ ଆତ୍ମ ହତ୍ୟା କରିଛି । ପରେ ଘର ଭିତରେ ଯାଇ ଦେଖନ୍ତିତ ସବିତା ମଧ୍ୟ ବେକରେ ରଶି ଲାଗଇ ଆତ୍ମହତ୍ୟା କରିଛନ୍ତି ।

ଘଟଣା ସ୍ଥଳେ ଗାଁ ଲୋକେ ରୁଣ୍ଡିଭୁତ ହୋଇ ଉଭୟଙ୍କୁ ଉଦ୍ଧାରକରି ଡାକ୍ତରଖାନା ନେବାକୁ ଚାହିଁଥିଲେହେଁ ସେତେବେଳକୁ ଦୁହିଁଙ୍କର ତାଙ୍କର ମୃତ୍ୟୁ ହୋଇସାରିଥିଲା । ସ୍ଥାନୀୟ ସରପଂଚଙ୍କ ପ୍ରତିନିଧି ରମେଶ ସାହୁ ଘଟଣା ସ୍ଥଳେ ପହଂଚି ପୁଲିସକୁ ଖବର ଦେଇଥିଲେ । ତଦନୁଯାୟୀ କୋରାଇ ଥାନା ଅଧିକାରୀ ରଞ୍ଜିତ ମହାନ୍ତି ଘଟଣା ସ୍ଥଳେ ପହଂଚି ବିଧିବଦ୍ଧଭାବେ ତଦନ୍ତ କରି ଶବ ବ୍ୟବଛେଦ ନିମନ୍ତେ ଦାନଗଦି ଡାକ୍ତରଖାନା ପଠାଇଛନ୍ତି । ହେଲେ ମୃତ୍ୟୁର କାରଣ ଅସ୍ପଷ୍ଟ ରହିଥିଲା ବେଳେ ପିଲାଛୁଆ ହେଉନଥିବାରୁ ମନସ୍ତାପରେ ସ୍ୱାମୀ-ସ୍ତ୍ରୀ ଦୁହେଁ ଆତ୍ମ ହତ୍ୟା କରିଥିବା ପରିବାର ପକ୍ଷରୁ କୁହାଯାଉଥିଲା ବେଳେ ସବିତାଙ୍କ ବାପଘର ପକ୍ଷରୁ ତାଙ୍କ ଝିଅର ପିଲାପିଲି ହେଉନଥିବାରୁ ତାଙ୍କ ଝିଅକୁ ମାରି ଦିଆଯାଇଥିବା ଅଭିଯୋଗ କରିଛନ୍ତି । ଏନେଇ ପୁଲିସ ଏକ ମାମଲା ରୁଜୁ କରି ବିଧିବଦ୍ଧ ଭାବେ ତଦନ୍ତ ଜାରି ରଖିଛନ୍ତି । ( ରଶ୍ମିରେଖା ମଲ୍ଲିକଙ୍କ ରିପୋର୍ଟ )