ଲକ୍ଷ୍ମୀନଗର ପଂଚାୟତ ମୁଖ୍ୟ ରାସ୍ତା ବିପର୍ଯ୍ୟସ୍ତ ଜଳନିଷ୍କାସନ ପାଇଁ ବ୍ୟବସ୍ଥା ନାହିଁ ; ଯାତାୟତରେ ଯାତ୍ରୀ ହିନସ୍ତା

ଓଡ଼ିଶା ତାଜା ନ୍ୟୁଜ୍ (୧୨ ଜୁଲାଇ ସୋମବାର ) କୋରାଇ :- ଲକ୍ଷ୍ମୀନର-ତରାପୁର ପଂଚାୟତ ରାସ୍ତା ବିପର୍ଯ୍ୟସ୍ତ ହୋଇ ପଡିଥିଲା ବେଳେ ଖୋଦ ପଂଚାୟତର ସମ୍ମୁଖରେ ଆଣ୍ଠୁଏ ପାଣି ଜମି ରହିଛି । ଯାହାକି ଏକ ନଦୀ ଭ୍ରମ ସୃଷ୍ଟି କରିଛି । ଏହି ରାସ୍ତା ଦେଇ ଯାତ୍ରୀଙ୍କୁ ଯାତାୟତ କରିବାରେ ନାହିଁନଥିବା ଅସୁବିଧାର ସମ୍ମୁଖିନ ହେବାକୁ ପଡୁଛି । ଫଳରେ ଯାତ୍ରୀଙ୍କ ସମେତ ଅଂଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ଏହି ରାସ୍ତାଟି ତରାପୁରରୁ ଲକ୍ଷ୍ମୀନଗର ଗାଁକୁ ଯାଇଛି । ଏହି ରାସ୍ତା ଦେଇ ତରାପୁର, କୁମ୍ଭାରସାହି, ନକଡାସାହି ସମେତ ସମଗ୍ର ଲକ୍ଷ୍ମୀନଗର ପଂଚାୟତ ବାସୀ ପଂଚାୟତ କାର୍ଯ୍ୟାଳୟ, ଡାକ୍ତରଖାନା, ଇଞ୍ଜିନିୟରିଂ କଲେଜ, ତରାପୁରହାଟ, ଆରାଧ୍ୟଦେବୀ ମାଆ ହିଙ୍ଗୁଳା ମନ୍ଦିର, କୁଆଖିା, ଯାଜପୁରୋଡ, କଳିଙ୍ଗନଗର ଆଦି ବିଭିନ୍ନ ସ୍ଥାନକୁ ଯାତାୟତ କରିଥାନ୍ତି ।

ଏହା ପଂଚାୟତ ରାସ୍ତା ହୋଇଥିଲା ବେଳେ ମରାମତି ଅଭାବରୁ କେତେକ ସ୍ଥାନରେ ଖାଲଖମା ଭରିଗଲାଣି । ଏମିତିକି ମାଆ ହିଙ୍ଗୁଳା ମନ୍ଦିର ନିକଟସ୍ଥ ଖୋଦ ପଂଚାୟତ କାର୍ଯ୍ୟାଳୟ ମୁଖ ରାସ୍ତାରେ ସୃଷ୍ଟି ହୋଇଛି ବିରାଟ ଖାଲା । ଆଣ୍ଠୁଏ ଉଚ୍ଚାର ପାଣି ଜମିରହି ଏକ ନଦୀ ଭ୍ରମ ସୃଷ୍ଟି କରୁଛି । ଲୋକେ ଏହି ବାଟଦେଇ ଯାତାୟତ କରୁଥିଲା ବେଳେ ଖାଲରେ ପଡି ଦୁର୍ଘଟଣାର ସମ୍ମୁଖିନ ହେଉଛନ୍ତି । ଜମିରୁଥିବା ଜଳ ନିଷ୍କାସନ ପାଇଁ ତଳମୁଣ୍ଡ ମହାଦେବ ପୋଖରୀକୁ ଯିବାକ କଥା । ହେଲେ ପୋଖରୀ ଆଡିବନ୍ଧ ବନ୍ଧାଯାଇଥିବାରୁ ତାହା ନିଷ୍କାସନ ହୋଇ ନପରି ଜଳ ରାସ୍ତାରେ ଜମିରହୁଛି । ଯାହାକି ଦୁର୍ଘଟଣାର କ୍ଷେତ୍ର ପାଲୋଟି ଯାଇଛି ।

ଅଂଚଳବାସୀଙ୍କ ଲାଗି ଏହା ଏକ ଗୁରୁତ୍ୱ ପୁର୍ଣ୍ଣ ରାସ୍ତା ହୋଇଥିଲା ବେଳେ ପଂଚାୟତ ପକ୍ଷରୁ ରାସ୍ତାର ଖାଲଖମା ପୋତାଯିବା ସହ ମରାମତି କରାନଯିବା ନେଇ ତୀବ୍ର ଅସନ୍ତୋଷ ପ୍ରକାଶ ପାଇଛି । ଏନେଇ ସ୍ଥାନୀୟ ପଂଚାୟତର ସରପଂଚ ଗାୟତ୍ରୀ ସାହୁଙ୍କୁ ପଚାରିବାରୁ ଏହି ରାସ୍ତାର ନିର୍ମାଣ ପାଇଁ ଗୋପବନ୍ଧୁ ଗ୍ରାମିଣ ଯୋଜନାରେ ପଂଚାୟତ କାର୍ଯ୍ୟାଳୟ ଠାରୁ ତରାପୁର ସଂଯୋଗୀ ରାସ୍ତା ଯାଏ ନିର୍ମାଣ ଓ ମରାମତି ଲାଗି ଯୋଜନା ପ୍ରସ୍ତୁତ କରାଯାଇଛି ; କିନ୍ତୁ ତାହାପୂର୍ବରୁ ମହାଦେବ ପୋଖରୀ ଆଡିବନ୍ଧ କଟାଯାଇ ରାସ୍ତାରୁ ଜଳ ନିଷ୍କାସନ କରି ଲୋକଙ୍କ ଯାତାୟତ ଲାଗି ପ୍ରାରମ୍ଭିକ ଭାବେ ମରାମତି କରାଯିବ ବୋଲି ପ୍ରତିକ୍ରିୟାରେ କହିଛନ୍ତି ।  (କୋରାଇରୁ ରଶ୍ମିରେଖା ମଲ୍ଲିକଙ୍କ ରିପୋର୍ଟ)