ତାଲାବନ୍ଦ ସତ୍ୱେବି ଗାଁ’ରେ ହେଉଛି ରଜ ପରବ ଝିଅଙ୍କ ସାହି ବୁଲା ଓ ବାଡି ଅଗଣାରେ ରଜଦୋଳି ଗୀତରେ ମୁଖରିତଗାଁ ପରିବେଶ

ଓଡ଼ିଶା ତାଜା ନ୍ୟୁଜ୍ (୧୫ ଜୁନ ମଙ୍ଗଳବାର) କୋରାଇ :- ଆଜି ସଂକ୍ରାନ୍ତି ତଥା ଦି୍ୱତୀୟ ରାଜ । ଗତକାଲି ରାତିରୁ ଲାଗି ରହିଥିବା ଲଘୁଚାପ ବର୍ଷା ସକାଳେ ଛାଡି ଯାଇଥିଲା । କରୋନା ଜନିତ ୩ପର୍ଯ୍ୟାୟ ତାଲାବନ୍ଦ ଜାରି ରହିଥିଲେ ମଧ୍ୟ ଗଣ ପର୍ବ ରଜକୁ ଛାଡିପାରି ନାହାଁନ୍ତି ଗାଁଲୋକେ । ଅଳ୍ପବହୁତେ କେତେକ ସ୍ଥାନେର ରଜ ମନାଯାଉଥିବା ଦେଖାଯାଇଛି । ମଙ୍ଗଳବାର ରଜ ସଂକ୍ରାନ୍ତା । ଆଜି ଦିନତମାମ ପାଗ କୋହଲା ରହିଥିବାରୁ ଦେବାଦେବୀ ସ୍ଥାନରେ ଗାଁ ମଣ୍ଡପରେ ଲୋକଙ୍କ ସମାଗମ ଲାଗି ରହିଥିବା ଦେଖାଯାଇଥିଲା ।

ରଜର ୨ୟ ଦିବସରେ ଗାଁର ଝିଅମାନେ ନୂଆ ଜାମା ପଟା ପିନ୍ଧି, ପାଦରେ ଅଳତା, ହାତରେ ମେହେନ୍ଦି, କୁକୁମ, ଅତର ଲଗାଇ ନାନା ପରିପାଟିରେ ସଜବାଜ ହୋଇ ସାଙ୍ଗହୋଇ ସାଇସାଇ ବୁଲି ଖିଲିପାନ ଓ ପିଠାପଣା ଖାଉଛନ୍ତି । ହେଲେ ଗାଁର ତୋଟାରେ ଏବର୍ଷ ଦୋଳି ଲାଗିନଥିଲେ ହେଁ ନିଜନିଜ ବାଡିରେ ଲାଗିଥିବା ଦୋଳି ଖେଳି ଆନନ୍ଦରେ ରଜ ମନାଉଛନ୍ତି ଝିଅମାନେ । କରୋନା ଲାଗି ରଜ ମଉଜ ଫିକା ପଡିଯାଇଥିଲେହେଁ ଘର ଅଗଣା ଓ ବାଡିପଟୁ ଝିଅଙ୍କ ସୁଲଳିତ କଣ୍ଠରୁ ଭାସିଆସୁଛି ବନସ୍ତେ ଡ଼ାକିଲା ଗଜ, ମୋ’ଭାଈ ମୁଣ୍ଡରେ ସୁନା ମୋକଟ….. ଆଦି ଗୀତର ଲହରି ।

ଏଥିସହିତ ପ୍ରତି ଘରେ ଘରେ ପୋଡପିଠା, ଆରିଶା ପିଠା ଆଦି ନାନା ରକମର ପିଠା କରାଯାଇଥିଲା ବେଳେ ଆମ୍ବ, ପଣଶର ସମ୍ଭାର ଖାଇବାକୁ ବେଶ ଆକୃଷ୍ଟ କରିଛି । ଗାଁର ବୟସ୍କ ଲୋକମାନେ ପଶା, ତାସ ଖେଳୁଥିଲା ବେଳେ ଯୁବକମାନେ ଚେସ ଖେଳରେ ମସଗୁଲ । ସେହିପରି ଘର ଅଗଣାରେ ଝିଅବୋହୁ ଲୁଡୁ, ତାସ ଆଦି ଖେଳୁଥିଲା ବେଳେ କୁନିପିଲାମାନେ ଦୋଳିରେ ବସି ଖେଳିବା ଲାଗି ଅଝଟ କରିବା ପରବକୁ ଉତ୍ସବ ମୁଖରିତ କରିଛି । ଗାଁ ମୁଣ୍ଡରେ ପୂଜା ପାଉଥିବା ଦେବା ଦେବୀଙ୍କୁ ଆଜି ସଂକ୍ରାନ୍ତି ଅବସରରେ ସମାଜିକ ଦୂରତା ଭିତିରେ କେବଳ କର୍ତା ଓ ବ୍ରାହ୍ମଣଙ୍କ ଦ୍ୱାରା ପୂଜାର୍ଚ୍ଚନା କରାଯାଇଛି । (କୋରାଇରୁ ରଶ୍ମିରେଖା ମଲ୍ଲିକଙ୍କ ରିପୋର୍ଟ )