ବାତ୍ୟା ଓ ବନ୍ୟା ପ୍ରଭାବରେ ରବି ଫସଲ ନଷ୍ଟ , ଶତାଧିକ ଏକର ପରିବା ଫସଲ ସମେତ ଡ଼ାଳୁଅଧାନ କ୍ଷତିଗ୍ରସ୍ତ ; ଚାଷୀମୁଣ୍ଡରେ ଚଡକ ଚାଷୀଙ୍କୁ କ୍ଷତିପୁରଣ ଦେବାକୁ ଦାବି

ଓଡ଼ିଶା ତାଜା ନ୍ୟୁଜ୍ ( ୨୯ ମଇ , ଶନିବାର ) କୋରାଇ :-  ବାତ୍ୟା ‘ୟସ’ ଟଳିଯିବା ପରେ ବୈତରଣୀ ନଦୀରେ ଆସିଥିଲା ବନ୍ୟା । ବନ୍ୟା ଓ ବାତ୍ୟା ଉଭୟ ପ୍ରଭାବରେ କୋରାଇ ବ୍ଲକରେ ବ୍ୟାପକ ଭାବେ ରବି ଫସଲ ନଷ୍ଟ ହୋଇଯାଇଛି । ବିଶେଷକରି ଶତାଧିକ ଏକର ଜମିରେ ରବି କାଳୀନ ପରିବାଚାଷ ସମ୍ପୁର୍ଣ୍ଣ ନଷ୍ଟ ହୋଇଥିବା ବେଳେ ପ୍ରାୟ ୪ହଜାର ହେକ୍ଟର ଜମିରେ ହୋଇଥିବା ଡ଼ାଳୁଅ ଧାନର ମଧ୍ୟ କ୍ଷତି ହୋଇଛି । ହେଲେ କୋରାଇ ବ୍ଲକର ତଣ୍ଡରା, ବଡ଼ବିରୁହାଁ, ଖମଣ, ଗୋଳେଇପୁର ବାତ୍ୟା ଜନିତ ଫସଲର କ୍ଷତି ସାଧିତ ହୋଇଥିଲା । ଏଥି ସହିତ କେନ୍ଦୁଝରର ଉପରମୁଣ୍ଡରେ ବର୍ଷା ହେବା ଫଳରେ ବୈତରଣଣୀ ନଦୀରେ ବନ୍ୟା ଆସି ଏହି ବ୍ଲକର ନଦୀପଠାସ୍ଥିତ ରଣପୁର, ମକୁନ୍ଦପୁର, ବନ୍ଦାଳୋ, ଅସନଝର, ଗୌରପୁର, ମୁଳାପାଳ,

ବରୁଣ୍ଡାଇ ପ୍ରମୁଖ ପଂଚାୟତରେ ହୋଇଥିବା ପୋଟଳ, ବାଇଗଣ, ଝୁଡଙ୍ଗ, କଲରା ଆଦି ପରିବା କିଆରିରେ ଜଳପ୍ଲାବିତ ହୋଇଛି । ଫଳରେ କ୍ଷେତରୁ ଅମଳ କରିବାକୁ ଥିବା ଫସଲ ପଚିଯାଇଛି । ପାଣି କଟିବାର କୌଣସି ସୁବ୍ୟବସ୍ଥା ନଥିବାରୁ ପରିବା ପଚି ନଷ୍ଟ ହୋଇଯିବାରୁ ଚାଷୀ ମୁଣ୍ଡରେ ହାତଦେଇ ବସିଛି ।  ବ୍ଲକ ପ୍ରଶାସନ ପକ୍ଷରୁ ଚାଷୀଙ୍କୁ ଜଳ ନିଷ୍କାସନ ପାଇଁ ପମ୍ପର ବ୍ୟବସ୍ଥା କରାଯାଇନଥିବାରୁ ଚାଷୀଙ୍କ ଆଖି ଆଗରେ ଫସଲ ସବୁ ନଷ୍ଟ ହୋଇଥିଲେହେଁ ସେଥିରୁ ରକ୍ଷାକରିବାର ଉପାୟ ଶୂନ୍ୟ ହୋଇପଡିଛନ୍ତି । ସେହିପରି ଜହ୍ନା, ବରୁଣ୍ଡାଇ, ଧନେଶ୍ୱର, ସାଦକପୁର, ତୁଳତି, କାଚରାସାହି, କନ୍ତୋର ଆଦି ବହୁ ପଂଚାୟତରେ ୪ହଜାର ଏକର ଜମିରେ ଚାଷ କରାଯାଇଥିବା ଡାଳୁଅ ଧନପାଚି ଯାଇଥିଲା । ବତ୍ୟାପୂର୍ବରୁ କେତେକାଂଶରେ ଚାଷୀ ତରଭରିଆଭାବେ ମେସିନ ସାହାଯ୍ୟାରେ ଧନା କଟି ଦେଇଥିଲେ । ଆଉ କାଟି ପାରିନଥିବା ଚାଷୀଙ୍କର ଧାନ ପାଣିରେ ପଡି ପଚିଯାଇଛି ।

ଏନେଇ କୋରାଇ ବ୍ଲକ କୃଷି ଅଧିକାରୀ ଲକ୍ଷ୍ମୀଧର ସାହୁଙ୍କୁ ପଚାରିବାରୁ ବାତ୍ୟାର ଅବ୍ୟବହିତ ପୂର୍ବରୁ ୩୯୦୦ଏକର ଜମିରେ ହୋଇଥିବା ଡାଳୁଅ ଧାନ ସବୁ ଚାଷୀଙ୍କୁ ସୂଚନା ଦେଇ କାଟି ଦିଆଯାଇଥିବା କହିଥିଲେ । ଅନ୍ୟପକ୍ଷରେ ୧୨୦ ଏକର ଚାଷ ଜମିରେ ପରିବା ଚାଷ ନଷ୍ଟ ହୋଇଥିବା ହର୍ଟିକଲଚର (ଉଦ୍ୟାନ ବିଭାଗ) ପକ୍ଷରୁ ଆକଳନ କରାଯାଇଥିବା କୁହାଯାଇଛି । ପରିବା ଓ ଧାନ କ୍ଷେତ ପାଣିରେ ବୁଡ଼ି ନଷ୍ଟ ହୋଇଯାଇଥିବାରୁ ଧାରକରଜ କରି ଚାଷ କରିଥିବା ଚାଷୀଙ୍କୁ ସରକାର କ୍ଷତିପୁରଣ ଦେବା ଲାଗି ଖରସ୍ରୋତା ମଣ୍ଡଳର ବିଜେପି ସଭାପତି ତଥା ବଡବିରୁଆଁ ସମିତିସଭ୍ୟ ପ୍ରମୋଦ କୁମାର ସାହୁ ଦାବି କରିଛନ୍ତି ।   ( ରିପୋର୍ଟ – ରଶ୍ମିରେଖା ମଲ୍ଲିକ  )