ଅଧିକାର ମାଇକ୍ରୋଫାଇନାନ୍ସ : ଗୋଷ୍ଠୀ ବୋର୍‍ୱେଲ କାର୍ଯ୍ୟକ୍ରମ ଜରିଆରେ ସ୍ୱଚ୍ଛ ଜଳ ଉପଲବ୍ଧ କରାଉଛି

ଓଡ଼ିଶା ତାଜା ନ୍ୟୁଜ (୧୮ ମଇ ମଙ୍ଗଳବାର ) ବଲାଙ୍ଗୀର :- ଦେଶର ଅନେକ ଭାଗ ଭଳି ଓଡ଼ିଶାର କେବିକେ (କୋରାପୁଟ-ବଲାଙ୍ଗୀର- କଳାହାଣ୍ଡି)ର ଅଧିକାଂଶ ଜିଲା ଅନେକ ସମୟରେ ଗୁରୁତର ଜଳ ସଙ୍କଟ ପରିସ୍ଥିତିର ସମ୍ମୁଖୀନ ହୋଇଥାଏ । ପ୍ରଚଣ୍ଡ ଗ୍ରୀଷ୍ମ ସମୟରେ ତାପମାତ୍ରା ଶୀର୍ଷରେ ପହଞ୍ଚିବାବେଳେ ଅଧିକାଂଶ ନଳକୂପ ଏବଂ କୂପ ଆଦି ଶୁଷ୍କ ହୋଇଯାଇଥାଏ ଏବଂ ତଦ୍ଦ୍ୱାରା ଜଳଭାବ ପରିସ୍ଥିତି ଅତ୍ୟନ୍ତ ଜଟିଳ ରୂପ ଧାରଣ କରିଥାଏ । ଏଭଳି ପରିସ୍ଥିତି ବିଶେଷକରି ଓଡ଼ିଶାର ପାର୍ବତ୍ୟ ଏବଂ ପଛୁଆ ଅଞ୍ଚଳରେ ସାଧାରଣ ଘଟଣା । ଏତଦ୍‍ବ୍ୟତୀତ ମିଳୁଥିବା ପାଣି ମଧ୍ୟ ପିଇବା ପାଇଁ ନିରାପଦ ନୁହେଁ । ୨୦୧୯ ନଭେମ୍ବରରେ କେନ୍ଦ୍ର ଜଳ ଶକ୍ତି ମନ୍ତ୍ରଣାଳୟ ରିପୋର୍ଟରୁ ଜଣାଯାଇଥିଲା ଯେ ଓଡ଼ିଶାର ୩୦ ଜିଲା ମଧ୍ୟରୁ ୧୫ଟି ଜିଲାରେ ପାନୀୟ ଜଳ ପ୍ରଦୂଷିତ । ବଲାଙ୍ଗୀରରେ ୪୦ଟି ଜନବସତିରୁ ସଂଗୃହୀତ ନମୁନା ମଧ୍ୟରୁ ୩୨ଟି ଜନବସତି ନମୁନାରେ ପାନୀୟ ଜଳ ନିରାପଦ ନଥିବା ଲକ୍ଷ୍ୟ କରାଯାଇଥିଲା ।

ଜନସାଧାରଣଙ୍କୁ ସ୍ୱଚ୍ଛ ଓ ନିରାପଦ ପାନୀୟ ଜଳ ଉପଲବ୍ଧ ସୁଗମ କରାଇବା ଲକ୍ଷ୍ୟରେ ଅଧିକାର ମାଇକ୍ରୋ ଫାଇନାନ୍ସ ଏକ ଗୋଷ୍ଠୀ ବୋର୍‍ୱେଲ କାର୍ଯ୍ୟକ୍ରମ ବିକଶିତ କରିଥିଲା । ଉକ୍ତ କାର୍ଯ୍ୟକ୍ରମ ଅଧୀନରେ ଅଧିକାର ମାଇକ୍ରୋଫାଇନାନ୍ସ ବନ୍ଧକମୁକ୍ତ ଋଣ ଏକ ମିଳିତ ଦାୟବଦ୍ଧ ଗୋଷ୍ଠୀକୁ ପ୍ରଦାନ କରୁଛି ଯାହା ସେମାନଙ୍କୁ ଏକ ବୋର୍‍ୱେଲ ନିର୍ମାଣ ଦିଗରେ ସହାୟତା କରିବ, କାରଣ ବ୍ୟକ୍ତିଗତ ପରିବାରଗୁଡିକ ବୋର୍‍ୱେଲ ଖନନରେ ପୁଞ୍ଜି ଖଟାଇବା କଷ୍ଟକର । ଗୋଷ୍ଠୀ ବୋର୍‍ୱେଲ କାର୍ଯ୍ୟକ୍ରମ ଆରମ୍ଭ ହେବାପରେ ବଲାଙ୍ଗୀର ଜିଲା ଭଟଲି ପଞ୍ଚାୟତର ପାଞ୍ଚଟି ମହିଳା ପରିବାର ଅଧିକାର ମାଇକ୍ରୋଫାଇନାନ୍ସ ସହିତ ଯୋଗାଯୋଗ କରିଥିଲେ । ଅଧିକାର ମାଇକ୍ରୋଫାଇନାନ୍ସର କ୍ଷେତ୍ର କର୍ମଚାରୀଙ୍କ ସହାୟତାରେ ସେମାନେ ଏକ ମିଳିତ ଦାୟବଦ୍ଧ ଗୋଷ୍ଠୀ ଗଠନ କରିଥିଲେ, ଯାହାର ନାମ ବଜରଙ୍ଗବାଲି ମହିଳା ଗୋଷ୍ଠୀ ଏବଂ ତାହା ଜରିଆରେ ସେମାନେ ୧ ଲକ୍ଷ ଟଙ୍କା ଋଣ ପାଇଁ ଆବେଦନ କରିଥିଲେ ।

ଉକ୍ତ ପାଣ୍ଠି ଅର୍ଥକୁ ବୋର୍‍ୱେଲ ଖନନ, ବିଦ୍ୟୁତକରଣ, ପାଣି ପମ୍ପ ସ୍ଥାପନ ଏବଂ ସଦସ୍ୟ ପରିବାରଗୁଡିକୁ ପାଇପ ସଂଯୋଗ ଆଦିରେ ଖର୍ଚ୍ଚ କରାଯାଇଥିଲା । ଏବେ ପ୍ରତିଦିନ ପରିବାରଗୁଡିକ ସେମାନଙ୍କ ଘରୋଇ ବ୍ୟବହାର ନିମନ୍ତେ ୭୫୦ ଲିଟର ପାଣି ପାଇପାରୁଛନ୍ତି । ବୋର୍‍ୱେଲ ବର୍ଷତମାମ ସ୍ୱଚ୍ଛ ପାଣି ଯୋଗାଇବା ସହିତ ସେମାନଙ୍କର ସମୟ ମଧ୍ୟ ବଞ୍ଚାଉଛି । ଆଧାର ମାଇକ୍ରୋଫାଇନାନ୍ସ ପ୍ରତି ନିଜର କୃତଜ୍ଞତା ପ୍ରକାଶ କରି ଜଣେ ସଦସ୍ୟା କହିଛନ୍ତି, “ପୂର୍ବରୁ ଗ୍ରାମର ସର୍ବସାଧାରଣ କୂଅରୁ ପାଣି ଆଣିବାକୁ ମୋତେ ଅନେକ ସମୟ ଅପଚୟ କରିବାକୁ ପଡୁଥିଲା । ଜଣେ ଦିନ ମଜୁରିଆ ହୋଇଥିବାରୁ ଏହା ମୋର ଆୟ ଉପରେ ଗୁରୁତର ପ୍ରତିକୂଳ ପ୍ରଭାବ ପକାଉଥିଲା । ଅଧିକାର ମାଇକ୍ରୋଫାଇନାନ୍ସର ଗୋଷ୍ଠୀ ବୋର୍‍ୱେଲ କାର୍ଯ୍ୟକ୍ରମକୁ ଧନ୍ୟବାଦ, ମୁଁ ଏବେ ସୁସ୍ଥ ଏବଂ ସ୍ଥିର ଜୀବନ ନିର୍ବାହ କରିପାରୁଛି ।” ଅଧିକାର ମାଇକ୍ରୋଫାଇନାନ୍ସ ପ୍ରାଇଭେଟ ଲିମିଟେଡର ପରିଚାଳନା ନିର୍ଦ୍ଦେଶକ ଓ ସିଇଓ ଶ୍ରୀ ମହମ୍ମଦ ଏନ ଅମିନ୍‍ କହିଛନ୍ତି, “ଗ୍ରାହକଙ୍କର ଆସ୍ଥା ଓ ବିଶ୍ୱାସ ଜିତି ଅଧିକାର ମାଇକ୍ରୋଫାଇନାନ୍ସ ଜନସାଧାରଣଙ୍କୁ ଜଳ, ପରିମଳ ଏବଂ ସ୍ୱାସ୍ଥ୍ୟରକ୍ଷା ଭଳି ମୌଳିକ ଆବଶ୍ୟକତାର ସୁଯୋଗ ଅନେକ ଗ୍ରାମାଞ୍ଚଳ ପରିବାର ପାଇଁ ଏକ ବାସ୍ତବତାରେ ପରିଣତ କରି ଏକ ସୁସ୍ଥ ସମାଜ ଗଠନ ଦିଗରେ କାର୍ଯ୍ୟକରୁଛି । ସରକାରୀ ଜଳ ଯୋଗାଣ ଯଥେଷ୍ଟ ହେଉନଥିବାବେଳେ ଦରିଦ୍ର ଲୋକମାନେ ସ୍ୱଚ୍ଛ ଏବଂ ପର୍ଯ୍ୟାପ୍ତ ଜଳ ପାଇବାରେ ଅସୁବିଧାର ସମ୍ମୁଖୀନ ହେଉଛନ୍ତି ।

ତେଣୁ ଅଧିକାର ଦ୍ୱାରା ଏଭଳି ଏକ ପ୍ରୟାସ ପ୍ରତିଫଳିତ କରୁଛି ଯେ ଗୋଷ୍ଠୀ ବୋର୍‍ୱେଲ କାର୍ଯ୍ୟକ୍ରମ ଦ୍ୱାରା ସ୍ୱଚ୍ଛ ଏବଂ ପର୍ଯ୍ୟାପ୍ତ ଜଳ ଉପଲବ୍ଧତା ଅନେକ ଦରିଦ୍ର ପରିବାର ପାଇଁ ଏକ ବାସ୍ତବତା ହୋଇପାରିବ । ତେଣୁ ଓଡ଼ିଶାର ସମସ୍ତ ପରିବାର ପାଇଁ ସ୍ୱଚ୍ଛ ଜଳ ଉପଲବ୍ଧ କରାଇବା ଦିଗରେ ଆହୁରି ଅନେକ କିଛି କରିବାକୁ ବାକି ଥିବାବେଳେ ଏହି ଅଭିଯାନରେ ସାମିଲ ହେବାକୁ ମୁଁ ସମସ୍ତ ଅର୍ଥଲଗାଣକାରୀ ସଂସ୍ଥା ଏବଂ ନାଗରିକ ସଂଗଠନଗୁଡିକୁ ଆମନ୍ତ୍ରଣ କରୁଛି ।” ଜଳଭାବ ବ୍ୟତୀତ ଜଳସ୍ତରରେ ଦ୍ରୁତ ହ୍ରାସ ମଧ୍ୟ ଏକ ପ୍ରମୁଖ ଚିନ୍ତାର ବିଷୟ ହୋଇଛି । କେନ୍ଦ୍ରୀୟ ଭୂତଳ ଜଳ ବୋର୍ଡ ପକ୍ଷରୁ ପ୍ରସ୍ତାବ ଦିଆଯାଇ କୁହାଯାଇଛି ଯେ ଓଡ଼ିଶାର ୨୪ଟି ଜିଲାରେ ଭୂତଳ ଜଳ ସ୍ତର ଆଗାମୀ ଦଶନ୍ଧି ସୁଦ୍ଧା ୨ ମିଟରରୁ ଅଧିକ ହ୍ରାସପାଇବ । ଭୂତଳ ଜଳର ସ୍ଥାୟୀ ପରିଚାଳନା ଦିଗରେ ଉଚିତ ପଦକ୍ଷେପ ନିଆନଗଲେ ସ୍ଥଜନସଂଖ୍ୟା ବୃଦ୍ଧି ସହିତ ପରିସ୍ଥିତି ଅଧିକ ଖରାପ ହୋଇପଡିବ । ଏହି ସମସ୍ୟାର ଗମ୍ଭୀରତାକୁ ହୃଦୟଙ୍ଗମ କରି ଅଧିକାର ମାଇକ୍ରୋଫାଇନାନ୍ସ ମଧ୍ୟ ଓଡ଼ିଶାର ବିଭିନ୍ନ ଜିଲାରେ ହ୍ରାସ ପାଉଥିବା ଭୂତଳ ଜଳସ୍ତରରେ ଉନ୍ନତି ସାଧନ ଦିଗରେ କାର୍ଯ୍ୟ କରୁଛି । ୱାଟର ଡଟ୍‍ ଓଆରଜି ସହିତ ମିଶି ଅଧିକାର ମାଇକ୍ରୋଫାଇନାନ୍ସ ଏକ କୃତ୍ରିମ ଭୂତଳ ଜଳ ଭରଣା କାର୍ଯ୍ୟକ୍ରମ ଆରମ୍ଭ କରିଛି । କୃତ୍ରିମ ଭୂତଳ ଜଳ ଭରଣା ୟୁନିଟଗୁଡିକର ନିର୍ମାଣ ଦ୍ୱାରା ଭବିଷ୍ୟତରେ ଭୂତଳ ଜଳସ୍ତର ବୃଦ୍ଧିରେ ତାହା ବହୁଳ ଭାବରେ ସହାୟକ ହେବା ଆଶା କରାଯାଉଛି ।(ରିପୋର୍ଟ/ଗୋରେଖନାଥ ବରିହା)