୨ ଲକ୍ଷରୁ ଊର୍ଦ୍ଧ୍ବ ମୂଲ୍ୟର ନକଲି ବିଦେଶୀ ମଦ ଜବତ,୨ ଜଣଙ୍କୁ ଗିରଫ କରାଯାଇଥିବା ବେଳେ ଜଣେ ଫେରାର

ଓଡ଼ିଶା ତାଜା ନ୍ୟୁଜ (୧୭ ମଇ ସୋମବାର ) ପାଟଣାଗଡ :- ପାଟଣାଗଡ ଉପଖଣ୍ଡ ଅନ୍ତର୍ଗତ ଲାଠୋର ହାଟପଦା ପଡ଼ାଠାରେ ବିଦେଶୀ ମଦ ତିଆରି କାରବାରକୁ ଅବକାରୀ ବିଭାଗ ଠାବ କରିଛି । ୨ ଲକ୍ଷରୁ ଊର୍ଦ୍ଧ୍ବ ମୂଲ୍ୟର ନକଲି ବିଦେଶୀ ମଦ ଜବତ କରିଥିବା ଜଣାଯାଇଛି । ଏ ମାମଲାରେ ଲାଠୋରର ପିତାମ୍ବର ମେହେର ଓ ଗୋପାଳ ମେହେରଙ୍କୁ ବିଭାଗ ଗିରଫ କରିଥିବା ବେଳେ ମାଷ୍ଟରମାଇଣ୍ଡ କୁହାଯାଉଥିବା ଗୌରୀଶଙ୍କର ଥନାପତି ଓରଫ୍‍ ସଞ୍ଜୁଲ ଫେରାର ମାରିଥିବା ଜଣାଯାଇଛି । ବିଶ୍ୱସ୍ତ ସୂତ୍ରରୁ ଲାଠୋର ହାଟପଦା ପଡ଼ାଠାରେ ନକଲି ବିଦେଶୀ ମଦ ତିଆରି କାରବାର ଚାଲିଥିବା ଖବର ପାଇ ଅବକାରୀ ଇନ୍ସପେକ୍ଟର ଉଦେଲାଲ ନାଏକଙ୍କ ନେତୃତ୍ୱରେ ଏକ ୨୦ ଜଣ ଜଣିଆ ଅବକାରୀ ଦଳ ଆଜି ଦିନ ପ୍ରାୟ ୧୨ଟା ସମୟରେ ଚଢଉ ଆରମ୍ଭ କରିଥିଲେ ।

ଦୀର୍ଘ ୪ ଘଣ୍ଟା ଧରି ଛାନଭିନ କରିବା ପରେ ପିତାମ୍ବର ମେହେର ଏବଂ ଗୋପାଳ ମେହେରଙ୍କ ନିକଟରୁ ବିପୁଳ ପରିମାଣର ନକଲି ବିଦେଶୀ ମଦ ଜବତ କରିବାରେ ଅବକାରୀ ବିଭାଗ ସଫଳ ହୋଇଛି। ବହୁ ନାମୀ ଦାମୀ କମ୍ପାନୀର ବିପୁଳ ପରିମାଣର ନକଲି ମଦ (ଯାହାର ଆନୁମାନିକ ମୂଲ୍ୟ ୨ ଲକ୍ଷ ଟଙ୍କାରୁ ଊର୍ଦ୍ଧ୍ବ ହେବ ବୋଲି ବିଭାଗ ଆକଳନ କରିଛି) ସହ ୨ଟି ଫ୍ରିଜ ଏବଂ ଅନ୍ୟାନ୍ୟ ଆସବାବ ପତ୍ର ଜବତ କରାଯାଇଥିବା ଜଣାଯାଇଛି। ଏହି ମାମଲାରେ ୨ ଜଣଙ୍କୁ ଗିରଫ କରାଯାଇଥିବା ବେଳେ ଜଣେ ଫେରାର  । ତେବେ ଖୁବଶୀଘ୍ର ତାକୁ ଗିରଫ କରାଯିବ ବୋଲି ଶ୍ରୀ ନାଏକ ଦୃଢୋକ୍ତି ପ୍ରକାଶ କରିଛନ୍ତି। ଏହି ଚଢଉରେ ଅନ୍ୟମାନଙ୍କ ମଧ୍ୟରେ ପ୍ରମୋଦ ପଣ୍ଡା, ପଦ୍ମଲୋଚନ ନାୟକ, ଅରୁଣ ଯୋଷୀ, ବିଶ୍ୱନାଥ ପରିଡ଼ା ଏବଂ ବଲାଙ୍ଗିର ଓ ପାଟଣାଗଡର ଅବକାରୀ ବିଭାଗ କର୍ମଚାରୀମାନେ ସାମିଲଥିଲେ ।  (ପାଟଣାଗଡ଼/ଗୋରେଖନାଥ ବରିହା )