କରୋନା ସଂକ୍ରମଣ ବୃଦ୍ଧି ପାଉଥିବାରୁ ଚଳିତ ବର୍ଷ ବିନା ଭକ୍ତରେ ହେବ ବିଶ୍ବ ପ୍ରସିଦ୍ଧ ପୁରୀ ରଥଯାତ୍ରା

ଓଡ଼ିଶା ତାଜା ନ୍ୟୁଜ (୧୫ ମଇ ଶନିବାର ) ପୁରୀ :- କରୋନା ସଂକ୍ରମଣ ବୃଦ୍ଧି ପାଉଥିବାରୁ ଚଳିତ ବର୍ଷ ବିନା ଭକ୍ତରେ ହେବ ବିଶ୍ବ ପ୍ରସିଦ୍ଧ ପୁରୀ ରଥଯାତ୍ରା । ତାହାକୁ ଦୃଷ୍ଟିରେ ରଖି ପ୍ରସ୍ତୁତି ଆରମ୍ଭ କରିଛି ଶ୍ରୀମନ୍ଦିର ପ୍ରଶାସନ । ଶ୍ରୀଜୀଉଙ୍କ ସ୍ନାନଯାତ୍ରା ପୂର୍ବରୁ ସବୁ ସେବାୟତଙ୍କୁ ଦିଆଯିବ କରୋନା ପ୍ରତିଷେଧକ ଟିକା । ରଥଯାତ୍ରା ସହ ସଂପୃକ୍ତ ସେବାୟତଙ୍କ ନିୟମିତ ସ୍ବାସ୍ଥ୍ୟ ପରୀକ୍ଷା କରାଯିବ । ଆବଶ୍ୟକ ପଡିଲେ ସେମାନଙ୍କୁ ଶ୍ରୀମନ୍ଦିର ଭକ୍ତନିବାସରେ ସଙ୍ଗରୋଧରେ ରଖାଯିବ । ୧୮ବର୍ଷ ବୟସରୁ ଊର୍ଦ୍ଧ୍ବ ସବୁ ସେବାୟତଙ୍କୁ କରୋନା ଟିକା ଦିଆଯିବା ପ୍ରସ୍ତାବକୁ ରାଜ୍ୟ ସରକାର ଅନୁମୋଦନ କରିଛନ୍ତି । ରଥଯାତ୍ରା ସହ ସଂପୃକ୍ତ ସେବାୟତଙ୍କୁ ୧୬ ତାରିଖଠାରୁ ପ୍ରତିହାରୀ ନିଯୋଗ ବୈଠକ ଘର ଏବଂ ବୈକୁଣ୍ଠଧାମ ଲଜିଂରେ ଟିକା ଦିଆଯିବ । ରଥ ଟାଣିବାକୁ ଆଗ୍ରହୀ ସେବାୟତଙ୍କ ତାଲିକା ପ୍ରସ୍ତୁତି ଆରମ୍ଭ ହୋଇଛି । କରୋନାରେ ସଂକ୍ରମିତ ହୋଇନଥିବା ସେବାୟତଙ୍କୁ ରଥଯାତ୍ରାରେ ସାମିଲ କରାଯିବ ।

ଗତବର୍ଷ ପରି ଚଳିତବର୍ଷ ମଧ୍ୟ ଶ୍ରୀଜୀଉଙ୍କ ସ୍ନାନଯାତ୍ରା ଏବଂ ରଥଯାତ୍ରାରେ ପାଳିଆ ସେବାୟତଙ୍କ ସମେତ ଅଳ୍ପ ସଂଖ୍ୟକ ଅଧିକାରୀ ଏବଂ ପୁଲିସ କର୍ମଚାରୀ ଅଂଶଗ୍ରହଣ କରିବେ । କରୋନା କଟକଣା ସହ ଶ୍ରୀଜୀଉଙ୍କ ଶ୍ରୀଗୁଣ୍ଡିଚା, ବାହୁଡା, ସୁନାବେଶ ଏବଂ ନୀଳାଦ୍ରି ବିଜେ ଅନୁଷ୍ଠିତ ହେବ। ଦାରୁବ୍ରହ୍ମ ଶ୍ରୀଗୁଣ୍ଡିଚା ମନ୍ଦିର ଆଡ଼ପ ମଣ୍ଡପରେ ବିଜେ କରିବା ବେଳେ କୌଣସି ଭକ୍ତଙ୍କୁ ଦର୍ଶନ ପାଇଁ ଅନୁମତି ଦିଆଯିବ ନାହିଁ । ଏ ସମ୍ପର୍କରେ ଆନୁଷ୍ଠାନିକ ଭାବେ ଘୋଷଣା କରାଯାଇ ନଥିଲେ ମଧ୍ୟ ପ୍ରଶାସନିକ ସ୍ତରରେ ବିନାଭକ୍ତରେ ରଥଯାତ୍ରା ପାଇଁ ପ୍ରସ୍ତୁତି ଆରମ୍ଭ ହୋଇଛି ।

ରଥ ନିର୍ମାଣ କାର୍ଯ୍ୟରେ ନିୟୋଜିତ ହେବାକୁ ଥିବା ୨ଶହରୁ ଊର୍ଦ୍ଧ୍ବ ମହାରଣା, ଭୋଇ, ଚିତ୍ରକାର, ରୂପକାର, ଦରଜି ଏବଂ ଓଝା ସେବକଙ୍କୁ କରୋନା ଟିକା ଦିଆଯାଇଛି । ରଥଖଳା ଚତୁଃପାର୍ଶ୍ବରେ କନାବାଡ କରାଯିବା ସହ ସାଧାରଣ ଲୋକଙ୍କ ପ୍ରବେଶ ଉପରେ କଟକଣା ଜାରି କରିଛି ମନ୍ଦିର ପ୍ରଶାସନ ।  କରୋନା ସଂକ୍ରମଣ ବୃଦ୍ଧି ଆଶଙ୍କା କରି ବିନାଭକ୍ତରେ ଶ୍ରୀଜୀଉଙ୍କ ରଥଯାତ୍ରା ପାଇଁ ଗତବର୍ଷ ସର୍ବୋଚ୍ଚ ନ୍ୟାୟାଳୟ ଅନୁମତି ଦେଇଥିଲେ ।  ଚଳିତବର୍ଷ ସେହିପରି ଶ୍ରୀଜୀଉଙ୍କ ରଥଯାତ୍ରା କରାଯିବା ଯଥେଷ୍ଟ ସମ୍ଭାବନା ରହିଛି। ପୁରୀ ରଥଯାତ୍ରା ସହ ବିଶ୍ବର କୋଟି କୋଟି ଲୋକଙ୍କ ଭାବାବେଗ ଜଡ଼ିତ ଥିବାରୁ ଦୂରଦର୍ଶନରେ ତାହାର ସିଧା ପ୍ରସାରଣ କରାଯିବ ।

ଅକ୍ଷୟ ତୃତୀୟା ତିଥିରେ ଶନିବାର ଶ୍ରୀଜୀଉଙ୍କ ରଥ ନିର୍ମାଣ ଅନୁକୂଳ ଏବଂ ଚନ୍ଦନଯାତ୍ରା ବିନାଭକ୍ତରେ କରାଯିବ । ଏଥିପାଇଁ ପୁରୀ ବଡ଼ଦାଣ୍ଡ ସମେତ ନରେନ୍ଦ୍ର ପୁଷ୍କରିଣୀ ଚତୁଃପାର୍ଶ୍ବରେ ୧୪୪ ଧାରା ଜାରି କରାଯାଇଛି । ରଥନିର୍ମାଣ ଏବଂ ଚନ୍ଦନଯାତ୍ରା ସହ ସଂପୃକ୍ତ ସେବାୟତଙ୍କୁ ଅନୁମତିପତ୍ର ପ୍ରଦାନ କରାଯାଇଛି ।  ଶ୍ରୀଜୀଉଙ୍କ ଚଳନ୍ତି ପ୍ରତିମା ନରେନ୍ଦ୍ର ପୁଷ୍କରିଣୀରେ ୨୧ଦିନ ଧରି ଜଳକ୍ରୀଡା କରିବେ ।  ଲୋକଙ୍କ ସମାଗମ ରୋକିବା ପାଇଁ ଅପରାହ୍ଣ ୩ଟାରୁ ରାତି ୯ଟା ପର୍ଯ୍ୟନ୍ତ ପୁରୀ ବଡ଼ଦାଣ୍ଡ ସମେତ ନରେନ୍ଦ୍ର ପୁଷ୍କରିଣୀ ଚତୁଃପାର୍ଶ୍ବରେ ଜାରି କରାଯାଇଛି ୧୪୪ଧାରା ।  ଏହି କଟକଣା ଅକ୍ଷୟ ତୃତୀୟା ସମେତ ଜୁନ୍‌ ୪ତାରିଖ ଭଉଁରିଯାତ୍ରା ଦିନ କଡାକଡି କାର୍ଯ୍ୟକାରୀ କରାଯିବ। ଜିଲାପାଳ ସମର୍ଥ ବର୍ମା ଏ ସମ୍ପର୍କରେ ସୂଚନା ଦେଇଛନ୍ତି ।   (ରିପୋର୍ଟ ଭଞ୍ଜ ବିହାରୀ ମହାନ୍ତି )