ଫେରାର ଗ୍ୟଙ୍ଗଷ୍ଟାର ହାଇଦରକୁ ସହଯୋଗ କରିଥିବା ଦୁଇ ପୋଲିସ କର୍ମଚାରୀ ଗିରଫ

ଓଡ଼ିଶା ତାଜା ନ୍ୟୁଜ୍ ( ୨୦ ଏପ୍ରିଲ ,ମଙ୍ଗଳବାର )କଟକ :- କଟକ ମଙ୍ଗଳାବାଗ ପୋଲିସ ସେକ୍ ହାଇଦର ଫେରାର ହୋଇଯିବା ଘଟଣାରେ ଦୁଇଜଣ ପୋଲିସ କର୍ମଚାରୀଙ୍କୁ ଆଜି ଗିରଫ କରି କୋର୍ଟ ଚାଲାଣ କରିଛି । ଗିରଫ ହୋଇ ଥିବା କନେଷ୍ଟବଳ ମହମ୍ମଦ ମୌସୁମୀ ଏବଂ ଜେଲ ୱ।ର୍ଡର ଶିବ ନାରାୟଣ ନନ୍ଦ ସମ୍ବଲପୁର ଜିଲ୍ଲାର ।

ଏମାନେ ନିଜ କର୍ତ୍ତବ୍ୟରେ ଅବହେଳା କରିଥିବାରୁ , କଟକ ବଡ଼ ଡାକ୍ତରଖାନାରୁ ଗତ ୧୦ ତାରିଖ ଅପରାହ୍ନ ସାଢେ ୪ଟାରେ ଫେରାର ହୋଇ ଯାଇଥିଲା କୁଖ୍ୟାତ ଅପରାଧୀ ଶେକ୍ ହାଇଦର । ହାଇଦରକୁ କଟକ ପୋଲିସ ହାଇଦ୍ରାବାଦ ତେଲେଙ୍ଗାନାର ସାଙ୍ଗାରେଡଡି ଜିଲ୍ଲାରୁ ଗିରଫ କରି କଟକ ଆଣିଥିଲା ।

ହାଇଦରକୁ ଫେରାର କରିବାରେ ସହଯୋଗ କରିଥିବା ବ୍ୟକ୍ତିଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ଆୟୋଜିତ ସାମ୍ବାଦିକ ସମ୍ମିଳନୀରେ ପ୍ରକାଶ କରିଥିଲେ । ପରେପରେ ମଙ୍ଗଳାବାଗ ଥାନାରେ ମାମଲା ରୁଜୁ କରାଯାଇଛି । ପୂର୍ବରୁ ତିନିଜଣଙ୍କୁ ଗିରଫ କରାଯାଇଥିଲା ବେଳେ ଆଜି ଦୁଇ ଜଣଙ୍କୁ ଗିରଫ କରାଯାଇଛି । (କଟକରୁ ଅମୂଲ୍ୟ କୁମାର ବାରିକଙ୍କ ରିପୋର୍ଟ ) ।