ଟାଙ୍ଗୀ-ଚୌଦ୍ୱାର ତହସିଲ ଅଧୀନ ମଣିଆ ମୌଜାରେ ମାଟି; ମୋରମ ଓ ପଥର ମାଫିଆଙ୍କ ଦୌରାତ୍ମ୍ୟ ବଢିବାରେ ଲାଗିଛି

ଓଡ଼ିଶା ତାଜା ନ୍ୟୁଜ୍ (୦୮ ଏପ୍ରିଲ ୨୦୨୧, ଗୁରୁବାର ) ଟାଙ୍ଗୀ :- ରାସ୍ତା ଓ ରେଳପଥ ସମ୍ପସାରଣ କାର୍ଯ୍ୟ ପାଇଁ ସେମାନେ ଅନାବାଦୀ, ଗୋଚର ଓ ଜଙ୍ଗଲ କିସମ ଜମିରୁ ମାଟି, ମୋରମ ଓ ପଥର ଚାଲାଣ କରିଥିବା ଅଭିଯୋଗ ହୋଇଛି । ଏହାଦ୍ୱାରା ଲୋକମାନେ ନିଜ ଚାଷଜମିକୁ ଯିବା ପାଇଁ ଅସୁବିଧାର ସମ୍ମୁଖୀନ ହୋଇଥିବାବେଳେ ହାତୀଙ୍କ ଚଲାପଥ ପ୍ରଭାବିତ ହୋଇଛି । ଏବେ ଗ୍ରାମବାସୀଙ୍କ ଜମିରୁ ମାଫିଆମାନେ ବେଆଇନ ଭାବେ ମାଟି, ମୋରମ ଓ ପଥର ଖୋଳି ନେଉଛନ୍ତି। ଏହାର ପ୍ରତିବାଦ କଲେ ସେମାନେ ଜୀବନରୁ ମାରିଦେବାକୁ ଧମକ ଦେଉଛନ୍ତି । ଏହାକୁ ନେଇ ସେମାନେ ଭୟଭୀତ ହୋଇପଡିଛନ୍ତି ।

ତୁରନ୍ତ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଗ୍ରାମବାସୀ ସ୍ଥାନୀୟ ପୋଲିସ ଓ ରାଜସ୍ବ ନୀରିକ୍ଷକ ଙ୍କ ନିକଟରେ ଅଭିଯୋଗ କରିଥିଲେ। ଏ ନେଇ ରାଜସ୍ବ ନିରୀକ୍ଷକ ସରଜମିନ ତଦନ୍ତ କରିବା ପରେ ତହସିଲ କାର୍ଯ୍ୟାଳୟକୁ ଏହାର ରିପୋର୍ଟ ପଠାଇଥିଲେ । ଅନୁରୂପଭାବେ ଟାଙ୍ଗୀ ଥାନା ଅଧିକାରୀ ଏହାର ତଦନ୍ତ କରିବା ପାଇଁ ବିଶ୍ୱାଳି ଫାଣ୍ଡି ଅଧିକାରୀଙ୍କୁ ପଠାଇଥିଲେ । ଫାଣ୍ଡି ଅଧିକାରୀ ଏହାର ତଦନ୍ତ କରିବା ପରେ ରିପୋର୍ଟ ଥାନାଧିକାରୀଙ୍କୁ ଦେଇଥିଲେ ।

ଇତିମଧ୍ୟରେ ଅନେକଦିନ ବିତି ଯାଇଥିଲେ ମଧ୍ୟ ମାଫିଆମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ଫଳରେ ଗ୍ରାମବାସୀ ଜିଲାପାଳ, ଉପ ଜିଲାପାଳ, ଆର୍‌ଡିସିଙ୍କ ନିକଟରେ ଅଭିଯୋଗ କରିବା ସହ ଉଚିତ ପଦକ୍ଷେପ ନେବାକୁ ଅନୁରୋଧ କରିଛନ୍ତି । ରାଜସ୍ବ ନିରୀକ୍ଷକ କହିଛନ୍ତି, ମୁଁ ତଦନ୍ତ ରିପୋର୍ଟ ତହସିଲ କାର୍ଯ୍ୟାଳୟକୁ ପଠାଇ ଦେଇଛି । ଯାହା ବୁଝିବା କଥା ତହସିଲଦାରଙ୍କୁ ପଚାରନ୍ତୁ । (ରିପୋର୍ଟ /ଭଞ୍ଜ ବିହାରୀ ମହାନ୍ତି)