ହଁ ଚପଲ ଫିଙ୍ଗିଛୁ, ମାନିଲେ ବିଜେପି ର ତିନି ବିଧାୟକ

ଗଣତନ୍ତ୍ରର ମନ୍ଦିର ପବିତ୍ର ବିଧାନସଭାରେ ଆଜି ବାଚସ୍ପତିଙ୍କ ଉପରକୁ ବିଜେପି ବିଧାୟକମାନେ ଚପଲ ଫିଙ୍ଗିଛନ୍ତି । ଗୃହର ମଧ୍ୟଭାଗରେ ହଟ୍ଟଗୋଳ ବେଳେ ସେମାନେ ବାଚସ୍ପତିଙ୍କ ପୋଡିୟମ୍ ଉପରକୁ ଚପଲ, ଖାତା, ହେଡଫୋନ୍ ଏବଂ ଡଷ୍ଟବିନ୍ ଫିଙ୍ଗିଥିଲେ । ଚପଲ ଫିଙ୍ଗିଥିବା ବିରୋଧୀ ଦଳ ଉପନେତା ବିଷ୍ଣୁ ସେଠୀ, ବରିଷ୍ଠ ବିଧାୟକ ଜୟନାରାୟଣ ମିଶ୍ର ଏବଂ ମୁଖ୍ୟ ସଚେତକ ମୋହନ ମାଝୀଙ୍କୁ ବାଚସ୍ପତି ଗୃହରୁ ସସପେଣ୍ଡ କରିଛନ୍ତି । ଚଳିତ ଅଧିବେସନର ଅବଶିଷ୍ଟ ଦିନ ସେମାନେ ଗୃହରେ ଯୋଗ ଦେଇପାରିବେ ନାହିଁ ।

ଓଡ଼ିଶା ତାଜା ନ୍ୟୁଜ୍  (୩ ଏପ୍ରିଲ ଶନିବାର ,ଶୁକ୍ରବାର ) ଭୁବନେଶ୍ୱର  :- ‘ହଁ ଆମେ ଚପଲ ଫିଙ୍ଗିଛୁ’ ବୋଲି ବିଷ୍ଣୁ ସେଠୀ, ଜୟନାରାୟଣ ମିଶ୍ର ଏବଂ ମୋହନ ମାଝୀ ଗଣମାଧ୍ୟମରେ ପ୍ରଥମେ ଦମ୍ଭ ଦେଖାଇଥିଲେ ମଧ୍ୟ ସେମାନେ ନିଜେ ଫିଙ୍ଗିନାହାନ୍ତି ବୋଲି ସଫେଇ ଦେଇଥିଲେ । ମାତ୍ର ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ଗୃହର ଫୁଟେଜ୍ ଭଲଭାବେ ଯାଞ୍ଚ କଲା ପରେ ଏହି ତିନି ଜଣ ଚପଲ ଫିଙ୍ଗିଥିବା ସ୍ପଷ୍ଟ ହୋଇଥିଲା । ବିଜେପି ସଦସ୍ୟଙ୍କ ଏଭଳି ଲଜ୍ଜାଜନକ ଆଚରଣକୁ ବିଜେଡ଼ି ଓ କଂଗ୍ରେସ ପକ୍ଷରୁ ନିନ୍ଦା କରାଯାଇଥିଲେ ମଧ୍ୟ ସେମାନେ କିନ୍ତୁ ଅନୁତପ୍ତ ନୁହଁନ୍ତି । ଯାହା କରିଛନ୍ତି ଠିକ୍ କରିଛନ୍ତି ବୋଲି ଜୟନାରାୟଣ କହିଛନ୍ତି ।

ବାଚସ୍ପତିଙ୍କ ଉପରକୁ ଚପଲ ଫିଙ୍ଗିଥିବା ବିଧାୟକମାନଙ୍କୁ ଗୃହରୁ ସସପେଣ୍ଡ କରିବାକୁ ବିଜେଡ଼ି ସଦସ୍ୟମାନେ ଗୃହରେ ଦାବି କରିଥିଲେ । ଏହା ବାଚସ୍ପତିଙ୍କ ପଦମର୍ଯ୍ୟାଦା କ୍ଷୂର୍ଣ୍ଣ କରିବା ସହ ବିଧାନସଭା ଇତିହାସରେ କଳଙ୍କିତ ଅଧ୍ୟାୟ ସୃଷ୍ଟି କରିଛି ବୋଲି କହିଥିଲେ । ଏହାପରେ ସରକାରୀ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ ସଂପୃକ୍ତ ବିଧାୟକଙ୍କୁ ସସପେଣ୍ଡ କରିବା ପାଇଁ ପ୍ରସ୍ତାବ ଆଣିଥିଲେ । ଗୃହରେ ଏହା ସମ୍ମତି ଲାଭ କରିବା ପରେ ବାଚସ୍ପତି କାର୍ଯ୍ୟାନୁଷ୍ଠାନ ଘୋଷଣା କରିଥିଲେ । ବିଷ୍ଣୁ ସେଠୀ, ଜୟନାରାୟଣ ମିଶ୍ର ଏବଂ ମୋହନ ମାଝୀଙ୍କୁ ତୁରନ୍ତ ଗୃହ ଛାଡ଼ି ଚାଲିଯିବାକୁ ରୁଲିଂ ଦେଇଥିଲେ ।

ବିଧାନସଭାରେ କଂଗ୍ରେସ ପକ୍ଷରୁ ଖଣି ଦୁର୍ନୀତି ପ୍ରସଙ୍ଗରେ ଦିଆଯାଇଥିବା ମୁଲତବୀ ନୋଟିସ୍ କୁ ବାଚସ୍ପତି ସୂର୍ଯ୍ୟନାରାୟଣ ପାତ୍ର ଅଗ୍ରାହ୍ୟ କରିବାରୁ ଶୁନ୍ୟକାଳରେ ବିରୋଧୀ ସଦସ୍ୟମାନେ ହଟ୍ଟଗୋଳ କରିଥିଲେ । ଫଳରେ ଗୃହ ଚାଲିପାରି ନ ଥିଲା । ଗୃହରେ ସ୍ୱାଭାବିକ ଅବସ୍ଥା ଫେରାଇବାକୁ ବାଚସ୍ପତି ସର୍ବଦଳୀୟ ବୈଠକ ଡାକିଥିଲେ । ଏହାପରେ ବାଚସ୍ପତି ଗୃହକାର୍ଯ୍ୟକୁ ୩୦ ମିନିଟ୍ ବୃଦ୍ଧି କରି କିଛି ବିଲ୍ ପାରିତ ପାଇଁ ପଦକ୍ଷେପ ନେଇଥିଲେ । ଉଭୟ କଂଗ୍ରେସ ଓ ବିଜେପି ସଦସ୍ୟମାନେ ଏହାର ପ୍ରତିବାଦ କରି ଗୃହରେ ପ୍ରବଳ ହଟ୍ଟଗୋଳ କରିଥିଲେ । ଆଉ ସେତିକିବେଳେ ବିଜେପି ବିଧାୟକମାନେ ବାଚସ୍ପତିଙ୍କ ପୋଡିୟମ୍ କୁ ଲକ୍ଷ୍ୟ କରି ଫିଙ୍ଗାଫୋପଡ଼ା କରିଥିଲେ ।

କିଏ ଚପଲ ତ ଆଉ କିଏ ହେଡଫୋନ୍, କାଗଜ, କଲମ୍ ଯାହା ପାଇଲେ ଫିଙ୍ଗି ଚାଲିଲେ । କେହି ବିଧାୟକ ଡଷ୍ଟବିନ୍ ବି ଫିଙ୍ଗିବାକୁ ଭୁଲିଲେ ନାହିଁ । ତେବେ ବିଜେପି ସଦସ୍ୟଙ୍କ ହଟ୍ଟଗୋଳ ମଧ୍ୟରେ ଗୃହରେ ଲୋକାୟୁକ୍ତ ସଂଶୋଧନ ବିଲ୍ ଏବଂ ସମିତି ପଞ୍ଜିକରଣ ସଂଶୋଧନ ବିଲ୍ ପାରିତ ହୋଇଥିଲା । ଏହି ଘଟଣା ପରେ ବାଚସ୍ପତି ସୂର୍ଯ୍ୟନାରାୟଣ ପାତ୍ର କହିଥିଲେ ଯେ ଆଇନ ତା’ ବାଟରେ ଯିବ । କିଏ ଚପଲ ଫିଙ୍ଗିଛନ୍ତି ତାହା ଅନୁଧ୍ୟାନ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ ହେବ । ବାଚସ୍ପତିଙ୍କ ପୋଡିୟମ୍ ଉପରକୁ ଚପଲ ଫିଙ୍ଗା ଘଟଣାକୁ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ନିନ୍ଦା କରିଛନ୍ତି । ଏହା ଗଣତାନ୍ତ୍ରିକ ବିଧି ବ୍ୟବସ୍ଥା ଓ ବିଧାନସଭା ମର୍ଯ୍ୟାଦା କ୍ଷୁର୍ଣ୍ଣ କରିଥିବା ସେ କହିଛନ୍ତି ।