ଓଡ଼ିଶା ଦିବସ ସମାରୋହ – ୨୦୨୧ ପାଳନ ଅବସରରେ ଓଡ଼ିଆ ଜାତିର ସ୍ଵାଭିମାନ ରକ୍ଷା ନିମନ୍ତେ ମାନ୍ୟବର ମନ୍ତ୍ରୀ ଅରୁଣ ସାହୁଙ୍କ ଆହ୍ୱାନ, ଢେଙ୍କାନାଳ

ଓଡ଼ିଶା ତାଜା ନ୍ୟୁଜ୍ (୦୧ ଏପ୍ରିଲ ୨୦୨୧, ଗୁରୁବାର) ଢେଙ୍କାନାଳ :- ଜିଲ୍ଲା ସଦର ମହକୁମାରେ ୮୬ତମ ଓଡ଼ିଶା ଦିବସ ପାଳିତ ହୋଇଯାଇଅଛି । ଏହି ଅବସରରେ ସକାଳ ୬ ଘଟିକା ସମୟରେ ଜିଲ୍ଲା ସୂଚନା ଓ ଲୋକସମ୍ପର୍କ କାର୍ଯ୍ୟାଳୟ ପକ୍ଷରୁ ଡ଼ାକବାଜି ଯନ୍ତ୍ର ଦ୍ବାରା ସହର ମଧ୍ୟରେ “ବନ୍ଦେ ଉତ୍କଳ ଜନନୀ” ସଙ୍ଗୀତ ଗାନ କରାଯାଇଥିଲା । ସକାଳ ୯ ଘଟିକା ସମୟରେ ମାନ୍ୟବର ମନ୍ତ୍ରୀ, କୃଷି ଓ କୃଷକ ସଶକ୍ତିକରଣ, ମତ୍ସ୍ୟ ଓ ପ୍ରାଣୀସମ୍ପଦ ଓ ଉଚ୍ଚଶିକ୍ଷା ବିଭାଗ, ଓଡ଼ିଶା, ଡଃ ଅରୁଣ କୁମାର ସାହୁ, ମାନ୍ୟବର ବିଧାୟକ ଶ୍ରୀ ସୁଧୀର କୁମାର ସାମଲ, ଜିଲ୍ଲାପାଳ ଶ୍ରୀ ଭୁମେଶ ଚନ୍ଦ୍ର ବେହେରା, ଅତିରିକ୍ତ ଜିଲ୍ଲାପାଳ ଶ୍ରୀ ଶଶାଙ୍କ ଶେଖର ଦାଶ,

ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ଶ୍ରୀ ନରୋତ୍ତମ ବେହେରା, ପୌର ନିର୍ବାହୀ ଅଧିକାରୀ ଶ୍ରୀ ଅତନୁ କୁମାର ସାମନ୍ତ ପ୍ରମୁଖ ଉତ୍କଳ ଗୌରବ ମଧୁସୂଦନ ଦାସ, ସ୍ଵାଧୀନତା ସଂଗ୍ରାମୀ ସାରଙ୍ଗଧର ଦାସ, ଜାତିର ଜନକ ମହାତ୍ମାଗାନ୍ଧୀ, ଡଃ ବି ଆର୍ ଆମ୍ବେଦକରଙ୍କ ପ୍ରତିମୂର୍ତ୍ତୀରେ ଏବଂ ବାଜିଚୌକ ସ୍ଥିତ ସହୀଦ ସ୍ମୃତି ସ୍ତମ୍ଭରେ ପୁଷ୍ପ ମାଲ୍ୟାର୍ପଣ କରିଥିଲେ । ପରେ ଟାଉନ୍ ହଲସ୍ଥ ଉତ୍କଳମଣି ଗୋପବନ୍ଧୁ ଦାସଙ୍କ ପ୍ରତିମୂର୍ତ୍ତୀରେ ମାଲ୍ୟାର୍ପଣ କରି ବ୍ୟାସକବି ଫକୀରମୋହନ ସେନାପତି, ଗୋପବନ୍ଧୁ ଦାସ, ମଧୁସୂଦନ ଦାସ ଏବଂ ପାରଳା ମହାରାଜା କୃଷ୍ଣଚନ୍ଦ୍ର ଦେବଙ୍କ ଫଟୋଚିତ୍ରରେ ପୁଷ୍ପାର୍ଘ୍ୟ ପ୍ରଦାନ କରିଥିଲେ ।

ଟାଉନ୍ ହଲରେ ଆୟୋଜିତ ସାଧାରଣ ସଭାରେ ମାନ୍ୟବର ମନ୍ତ୍ରୀ ଡଃ ଅରୁଣ କୁମାର ସାହୁ ମୁଖ୍ୟ ଅତିଥି ଭାବେ ଯୋଗ ଦେଇ ଓଡ଼ିଶା ପ୍ରଦେଶ ଗଠନର କର୍ଣ୍ଣଧାର ମହାନ୍ ବରପୁତ୍ରମାନଙ୍କ ଦୀର୍ଘ୍ୟ ଦିନର ଲଢେଇର ଫଳ ସ୍ବରୂପ ଆମେ ଭାଷା ଭିତ୍ତିକ ସ୍ବତନ୍ତ୍ର ରାଜ୍ୟ ପାଇପାରିଛେ ବୋଲି ମତବ୍ୟକ୍ତ କରିଥିଲେ। ଆମେ ଯେଭଳି ବିଭିନ୍ନ ପର୍ବପର୍ବାଣି ସ୍ଵତଃ ପ୍ରବୃତ୍ତ ଭାବେ ଉତ୍ସାହର ସହିତ ପାଳନ କରିଥାଉ। ସେହିପରି ପରମ ଶ୍ରଦ୍ଧାର ସହିତ ଓଡ଼ିଶା ଦିବସ ପାଳନ କରିବାକୁ ଆହ୍ବାନ ଦେଇଥିଲେ।

ଓଡ଼ିଆ ଭାଷାର ବ୍ୟବହାର ଉପରେ ଅଧିକ ଗୁରୁତ୍ବ ଦେବାକୁ ପରାମର୍ଶ ଦେବା ସହିତ ଭାରତର ଯୁବଗୋଷ୍ଠୀ ଈର୍ଷା ଓ ଆଳସ୍ୟ ଠାରୁ ଦୂରରେ ରହି ଆତ୍ମ ନିର୍ଭରଶୀଳ ହେବାକୁ କହିଥିଲେ ଅତୀତ ଓ ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି ଭବିଷ୍ୟତର ଖସଡ଼ା ପ୍ରସ୍ତୁତ କରି ମାନସିକ ସ୍ତରରେ ପ୍ରସ୍ତୁତ ହୋଇ କର୍ମ ପ୍ରବଣତାକୁ ବ୍ୟାପକ କରି ଓଡ଼ିଆ ଜାତିକୁ ଶିଖରରେ ପହଞ୍ଚାଇ ପାରିଲେ ଆମେ ଅସଲ ଦାୟଦ ହୋଇ ପାରିବା ବୋଲି ମତବ୍ୟକ୍ତ କରିଥିଲେ। ଓଡ଼ିଶାର ଅସ୍ମିତାକୁ ନେଇ ସମସ୍ତଙ୍କ ମଧ୍ୟରେ ପୁନଃ ଜାଗରଣ ଆବଶ୍ୟକ ଏବଂ ଯୁବପିଢି ଏ ଦିଗରେ ଯତ୍ନବାନ ହେବା ପାଇଁଁ ମାନ୍ୟବର ମନ୍ତ୍ରୀ ଆହ୍ୱାନ ଦେଇଥିଲେ।

ଉତ୍ସବରେ ସମ୍ମାନୀୟ ଅତିଥି ଭାବେ ମାନ୍ୟବର ସାଂସଦ ଶ୍ରୀ ମହେଶ ସାହୁ ବ୍ୟାସକବି ଫକୀରମୋହନ ସେନାପତିଙ୍କ ଅକ୍ଲାନ୍ତ ସଂଗ୍ରାମ ଦ୍ବାରା ଭାଷା ଭିତ୍ତିକ ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନ ସମ୍ଭବ ହୋଇ ପାରିଛି ବୋଲି ପ୍ରକାଶ କରିଥିଲେ। ବରପୁତ୍ରମାନଙ୍କ ଉତ୍ସର୍ଗୀକୃତ ତ୍ୟାଗ ଯୋଗୁଁ ଓଡ଼ିଶା ମାଟିର ଇତିହାସ, ସଂସ୍କୃତି ଆଦି ଗୌରବମୟ ହୋଇ ପାରିଛି ଏବଂ ଢେଙ୍କାନାଳ ମାଟିର ଯୋଗ୍ୟ ସନ୍ତାନ ଭୀମଭୋଇ, ସର୍ବ କନିଷ୍ଠ ଶହୀଦ ବାଜି ରାଉତ, ସାରଙ୍ଗଧର ଦାସ ପ୍ରମୁଖଙ୍କର ଅବଦାନ ଚିର ସ୍ମରଣୀୟ ହୋଇ ରହିବ ବୋଲି କହିଥିଲେ। ମାନ୍ୟବର ବିଧାୟକ ଶ୍ରୀ ସୁଧୀର କୁମାର ସାମଲ ନିଜ ଅଭିଭାଷଣରେ ଆମେ ସମସ୍ତେ ସର୍ବଦା ଓଡ଼ିଆ ଭାଷାରେ କଥା କହିବା ଏବଂ ଓଡ଼ିଶା ଆମର ପରିଚୟ ଓ ଗର୍ବ ହେବା ଉଚିତ୍ ବୋଲି ମତବ୍ୟକ୍ତ କରିଥିଲେ।

ବିଶିଷ୍ଟ ଶିକ୍ଷାବିତ ଓ ପରିବେଶବିତ୍ ଶ୍ରୀ ପ୍ରଦ୍ୟୁମ୍ନ ରଥ ମୁଖ୍ୟବକ୍ତା ଭାବେ ଯୋଗଦେଇ ବାଜି ରାଉତ ମାଟି ଢେଙ୍କାନାଳ ମହିମା ଧର୍ମ ଆଜି ସାରା ବିଶ୍ବକୁ ଦିଗଦର୍ଶନ ଦେଉଛି ବୋଲି ମତବ୍ୟକ୍ତ କରିଥିଲେ। ଜିଲ୍ଲାପାଳ ଶ୍ରୀ ଭୁମେଶ ଚନ୍ଦ୍ର ବେହେରା ଉତ୍ସବରେ ସଭାପତିତ୍ବ କରି ଭାଷା, ସଂସ୍କୃତି ଓ ପରମ୍ପରା ଓଡ଼ିଶା ବାସୀଙ୍କୁ ଏକ୍ କରି ପାରିଥିଲା। ସେଥିପାଇଁ ଭାଷା ଆନ୍ଦୋଳନ ମାଧ୍ୟମରେ ସ୍ବତନ୍ତ୍ର ଓଡ଼ିଶା ପ୍ରଦେଶ ଗଠନ ହୋଇ ପାରିଛି ବୋଲି ପ୍ରକାଶ କରିଥିଲେ। ଆମେ ସମ୍ମୁଖୀନ ହେଉଥିବା ନୂଆ ସମସ୍ୟାର ତୁରନ୍ତ ସମାଧାନ ହେବା ଆବଶ୍ୟକ, ସେଥିପାଇଁ ଏକତା ଏବଂ ସମସ୍ତଙ୍କର ଅବଦାନ ଓ ସହଯୋଗର ଆବଶ୍ୟକତା ରହିଛି ବୋଲି ମତବ୍ୟକ୍ତ କରିଥିଲେ।

ଏହି ଅବସରରେ ଉଚ୍ଚ ବିଦ୍ୟାଳୟ ସ୍ତରୀୟ ଓଡ଼ିଆ ବକ୍ତୃତା ପ୍ରତିଯୋଗିତାର କୃତି ପ୍ରତିଯୋଗୀଙ୍କୁ ଅତିଥି ମାନେ ପୁରସ୍କୃତ କରିଥିଲେ। ଏହି ଉତ୍ସବରେ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ଶ୍ରୀ ସୀତାଂଶୁ ଶେଖର ଦାସଙ୍କ ସମେତ ବିଭିନ୍ନ ବିଭାଗୀୟ ଅଧିକାରୀ,ସହରର ବୁଦ୍ଧିଜୀବୀ ମାନେ ଉପସ୍ଥିତ ଥିଲେ। ଏହି ଅବସରରେ ଅପରାହ୍ନ ୫ଟା ୩୦ମି ସମୟରେ ଢେଙ୍କାନାଳ ପୌର ପାଳିକା ପକ୍ଷରୁ ସ୍ଵଚ୍ଛତା ଓ କୋଭିଡ୍ ସମ୍ପର୍କିତ ଏକ ସଚେତନତା ପଦଯାତ୍ରା ବାଜିଚୌକ୍ ଠାରୁ ବାହାରି ଶ୍ରୀ ବଳରାମ ମନ୍ଦିର ପର୍ଯ୍ୟନ୍ତ ଆସିଥିଲା। ଏହି ପଦଯାତ୍ରାରେ ଜିଲ୍ଲାପାଳଙ୍କ ସମେତ ପୌର ପାଳିକା ଅଧିକାରୀ,ପୌର ପାଳିକାର ସମସ୍ତ ସ୍ଵଚ୍ଛତା ବ୍ରାଣ୍ଡ୍ ଆମ୍ବାସାଡର, ବୁଦ୍ଧିଜୀବୀ, ସ୍ଵେଚ୍ଛାସେବୀ ଓ ଅନ୍ୟାନ୍ୟ କର୍ମକର୍ତ୍ତା ଗଣ ଅଂଶଗ୍ରହଣ କରିଥିଲେ। (ରିପୋର୍ଟ୍, ଅମର ରଞ୍ଜନ ଦାସ)