ପିପିଲି ମଇଦାନ ପାଇଁ ତିନି ଦଳର ପ୍ରାର୍ଥୀ ପ୍ରସ୍ତୁତ : ଅଜିତ୍‌ଙ୍କୁ ନେଇ କଂଗ୍ରେସରେ ଅସନ୍ତୋଷ

ଓଡ଼ିଶା ତାଜା ନ୍ୟୁଜ୍ (୨୯ ମାର୍ଚ୍ଚ ସୋମବାର ) ଭୁବନେଶ୍ଵର,ଅଭିମନ୍ୟୁ/ପିପିଲି :- ପିପିଲି ମଇଦାନ ପାଇଁ ତିନି ଦଳର ପ୍ରାର୍ଥୀ ପ୍ରସ୍ତୁତ। ବିଜେପି ଓ ବିଜେଡି ପ୍ରାର୍ଥୀ ଘୋଷଣା ପରେ କଂଗ୍ରେସ ଅଜିତ ମଙ୍ଗରାଜଙ୍କୁ ପ୍ରାର୍ଥୀ ଘୋଷଣା କରିଛି। ଅଜିତ ପ୍ରାର୍ଥୀ ହେବାକୁ ନେଇ କଂଗ୍ରେସରେ ଅସନ୍ତୋଷ ଦେଖା ଦେଇଛି। ଟିକେଟ ଆଶାୟୀ ଥିବା ପୂର୍ଣ୍ଣଚନ୍ଦ୍ର ସ୍ଵାଇଁ ନିଜର ଅସନ୍ତୋଷ ପ୍ରକାଶ ପରେ ତାଙ୍କୁ ବୁଝାଇବାକୁ ଉଦ୍ୟମ କରୁଛି ଦଳ। ସେପଟେ କାଲି ମାନାଙ୍କନ ଦାଖଲର ଶେଷ ଦିନ ହୋଇଥିବାରୁ କଂଗ୍ରେସରୁ ଅଜିତ ମଙ୍ଗରାଜ ଓ ବିଜେଡି ପ୍ରାର୍ଥୀ ରୁଦ୍ର ପ୍ରସାଦ ମହାରଥୀ ନିଜ ନିଜ ନାମାଙ୍କନ ଦାଖଲ କରିବେ । ଆଗରୁ ନାମାଙ୍କନ ଦାଖଲ କରିଥିବା ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ ଏବେ କର୍ମୀଙ୍କୁ ନେଇ ଲୋକଙ୍କ ପାଖରେ ପହଁଚିବାକୁ ଚେଷ୍ଟା କରିଛନ୍ତି ।

କଂଗ୍ରେସ ପ୍ରାର୍ଥୀ ଘୋଷଣାକୁ ନେଇ ଅସନ୍ତୋଷ ଜାହିର କରିଛନ୍ତି ପୂର୍ଣ୍ଣଚନ୍ଦ୍ର ସ୍ବାଇଁ। ଗତ ସାଧାରଣ ନିର୍ବାଚନରେ ପିପିଲିରୁ ଲଢିଥିବା ଅଜିତ ମଙ୍ଗରାଜ ଏବେ ପୁରୀ ଜିଲ୍ଲା କଂଗ୍ରେସର ସଭାପତି ଅଛନ୍ତି । ସେ କାଲି ତାଙ୍କ ନାମାଙ୍କନ ପତ୍ର ଦାଖଲ କରିବେ । ତେବେ ଟିକେଟ ଆଶାୟୀ ଥିବା ପିପିଲି ପୂର୍ବତନ ବ୍ଲକ ଅଧ୍ୟକ୍ଷ ପୂଣ୍ଣଚନ୍ଦ୍ର ସ୍ବାଇଁ ଖୋଲା ଖୋଲି ଭାବେ ନିଜର ଅସନ୍ତୋଷ ଜାହିର କରିଛନ୍ତି । ପୂର୍ଣ୍ଣ କହିଛନ୍ତି ଟିକେଟ ପାଇବାକୁ ଆଶାୟୀ ଥିଲି, ନମିଳିବାରୁ ମନରେ ଅସନ୍ତୋଷ ଅଛି, ହେଲେ କଂଗ୍ରେସ ଛାଡ଼ିବି ନାହିଁ ବୋଲି ସେ କହିଛନ୍ତି। ସେପଟେ ପୂର୍ଣ୍ଣଙ୍କୁ ବୁଝାଇବାକୁ ଚେଷ୍ଟା କରିଛନ୍ତି ଅଜିତ। ପିପିସି ସଭାପତି ପ୍ରତିକ୍ରିୟା ରଖି କହିଛନ୍ତି ପୂର୍ଣ୍ଣବାବୁ ଦଳ ବିରୋଧୀ କାମ କରିବେ ନାହିଁ ।

ବିଜେଡି ଦିବଙ୍ଗତ ବିଧାୟକ ପ୍ରଦୀପ ମହାରଥୀଙ୍କ ପୁଅ ରୁଦ୍ର ପ୍ରସାଦ ମହାରଥୀଙ୍କୁ ଟିକେଟ ଦେବା ପରେ ଦଳୀୟ କର୍ମୀଙ୍କ ଭିତରେ ଉତ୍ସାହ ଦେଖା ଦେଇଛି । ପିପିଲି ଓ ଡେଲାଙ୍ଗ ଦୁଇ ବ୍ଲକରେ ପ୍ରତି ପଞ୍ଚାୟତରେ ସ୍ବତନ୍ତ୍ର ଟିମ ଗଢି ପ୍ରଚାରକୁ ଆଗକୁ ନେବାକୁ ରଣନୀତି କରିଛି ବିଜେଡି । ଦଳୀୟ ନେତା ଓ କର୍ମୀଙ୍କ ନେଇ ପିପିଲିରୁ ଶୋଭାଯାତ୍ରାରୁ ବାହାରି ରୁଦ୍ର କାଲି ନାମାଙ୍କନ ପତ୍ର ଦାଖଲ କରିବେ। ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ ପ୍ରାର୍ଥୀ ପତ୍ର ଦାଖଲ କରିସାରିଥିବା ବେଳେ କର୍ମୀଙ୍କ ମହଲରେ କ୍ୟାମ୍ପେନ ଜାରି ରଖିଛନ୍ତି । ଏପ୍ରିଲ ୧୭ରେ ପିପିଲି ଭୋଟ ହେବ । କାଲି ନାମାଙ୍କନ ଦାଖଲ ଶେଷ ଦିନ । ଏପ୍ରିଲ ତିନିରେ ପ୍ରାର୍ଥୀ ପତ୍ର ପ୍ରତ୍ୟାହାର ଶେଷ ପରେ ଚୁଡାନ୍ତ ତାଲିକା ପ୍ରକାଶ ପାଇବ ଆଉ ତା ପରେ ପ୍ରଚାର ଆହୁରି ଜମିବ। (ରିପୋର୍ଟ /ଭଞ୍ଜ ବିହାରୀ ମହାନ୍ତି )