ଠିପି ଖୋଲା ବିଦେଶୀ ମଦ ଦୋକାନୀ ମାଲିକଙ୍କୁ ଆକ୍ରମଣ : ଦୋକାନ ଭଙ୍ଗାରୁଜା ଓ ଟଙ୍କା ନେବା ଉଦ୍ୟମ ଅଭିଯୋଗରେ ୪ କୋର୍ଟ ଚାଲାଣ

ଓଡିଶା ତାଜା ନ୍ୟୁଜ୍ ( ୨୩ ମାର୍ଚ୍ଚ,ମଙ୍ଗଳବାର ) ହିଞ୍ଜିଳିକାଟୁ  :- ହିଞ୍ଜିଳିକାଟୁ ସହର ଉପକଣ୍ଠ ତଥା ୫୯ ନଂ ଜାତୀୟ ରାଜପଥ ପ୍ବାର୍ଶରେ ଥିବା ଠିପି ଖୋଲା ବିଦେଶୀ ମଦ ଦୋକାନରେ ଶନିବାର ରାତିରେ ଅପ୍ରିତୀକର ପରିସ୍ଥିତି ସୃଷ୍ଟି ହୋଇଥିଲା । ହିଞ୍ଜିଳିକାଟୁ ଅଞ୍ଚଳର ୪ଜଣ ଯୁବକ ସଂପୃକ୍ତ ବିଦେଶୀ ମଦ ଦୋକାନରେ ମଦ ପିଇ ମାତାଲ ହୋଇ ଉନ୍ମତ୍ତ କାଣ୍ଡ ଘଟାଇଛନ୍ତି । ସାମାନ୍ୟ କଥାକୁ କେନ୍ଦ୍ର କରି ଦୋକାନ ଭଙ୍ଗାରୁଜା କରିଥିଲେ । ଏ ନେଇ ଦୋକାନ ମାଲିକ ବାରଣ କରିବାରୁ ମାତାଲ ୪ ଯୁବକ ଉତକ୍ଷିପ୍ତ ହୋଇ ଦୋକାନୀ ମାଲିକ ଅନିଲ କୁମାର ମହାଙ୍କୁଡ ଓ ତାଙ୍କ ଭାଇ ଅଶ୍ବିନୀ କୁମାର ମହାଙ୍କୁଡଙ୍କୁ ମାଡ ମାରିବା ସହ କ୍ୟାସ କାଉଣ୍ଟରରୁ ଜୋର ଜବରଦସ୍ତ ଟଙ୍କା ନେବାକୁ ଉଦ୍ୟମ କରିଥିଲେ ।

ଖବର ପାଇ ହିଞ୍ଜିଳି ପୁଲିସ ଘଟଣାସ୍ଥଳରେ ପହଞ୍ଚି ୪ ମାତାଲ ଯୁବକଙ୍କୁ କାବୁ କରି ଥାନାକୁ ଆଣି ଘଟଣାର ତଦନ୍ତ ଚଳାଇଥିଲା । ଦୋକାନୀ ମାଲିକଙ୍କ ଅଭିଯୋଗ ଭିତ୍ତିରେ ହିଞ୍ଜିଳି ଥାନା କେଶ ନଂ ୧୨୨/୨୧ ରେ ଏକ ମାମଲା ରୁଜୁ କରି ୪ ଗିରଫ ଯୁବକଙ୍କୁ ଗିରଫ କରିଛି । ଗିରଫ ମାନେ ହେଲେ ହିଞ୍ଜିଳି ଥାନା ଖରିଡା ଗ୍ରାମର ଶେଖର ସ୍ବାଇଁ, ପ୍ରଶାନ୍ତ ଗଉଡ, ସିକିରି ଗ୍ରାମର ବିଶାଳ ସାମଲ, ଲିଙ୍କୁନ ମୁନି । ସୋମବାର ୪ ଗିରଫ ଯୁବକଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଭାରପ୍ରାପ୍ତ ଅଧିକାରୀ ଅଭିମନ୍ୟୁ ଦାସଙ୍କ ସୁତ୍ରରୁ ପ୍ରକାଶ । (ହିଞ୍ଜିଳିକାଟୁ ରିପୋର୍ଟ/ଶୁସାନ୍ତ ପ୍ରଧାନ)