ଜିଲ୍ଲାସ୍ତରୀୟ କ୍ଷୁଦ୍ର, ମଧ୍ୟମ ଓ ବୃହତ୍ ଶିଳ୍ପ ଉଦ୍ୟୋଗ କର୍ମଶାଳା ଉଦଘାଟିତ – ଢେଙ୍କାନାଳ

ଓଡ଼ିଶା ତାଜା ନ୍ୟୁଜ୍ (୧୦ ଫେବୃଆରୀ ବୁଧବାର) ଢେଙ୍କାନାଳ :- ଆଜି ଜିଲ୍ଲା ପରିଷଦ ସମ୍ମିଳନୀ କକ୍ଷରେ ଏକ ଜିଲ୍ଲାସ୍ତରୀୟ କ୍ଷୁଦ୍ର, ମଧ୍ୟମ ଓ ବୃହତ୍ ଶିଳ୍ପ ଉଦ୍ୟୋଗ କର୍ମଶାଳା ଜିଲ୍ଲା ଦକ୍ଷତା ବିକାଶ କମିଟି, ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ଓ ଜିଲ୍ଲା ପ୍ରଶାସନର ଆନୁକୁଲ୍ୟରେ ଆୟୋଜନ କରାଯାଇଅଛି। ଏହି କାର୍ଯ୍ୟକ୍ରମକୁ ଜିଲ୍ଲାପାଳ ଶ୍ରୀ ଭୁମେଶ ଚନ୍ଦ୍ର ବେହେରା ଉଦଘାଟନ କରି ଜିଲ୍ଲାରୁ ଯୋଗ ଦେଇଥିବା ସମସ୍ତ ବୃହତ୍ ଶିଳ୍ପାନୁଷ୍ଠାନ ଓ ଅନ୍ୟାନ୍ୟ ଉଦ୍ୟୋଗୀ ଗୁଡ଼ିକରେ କିପରି ଦକ୍ଷତା ବିକାଶ କରାଯାଇଥିବା ବେକାରୀ ଯୁବକ ଯୁବତୀଙ୍କୁ କର୍ମ ନିଯୁକ୍ତି ମିଳିବ ଏବଂ ଜିଲ୍ଲାର ଆର୍ଥିକ ଓ ସାମାଜିକ ଉନ୍ନତି ଘଟିବ ତା’ ଉପରେ ଦୃଷ୍ଟି ଦେବାକୁ ଗୁରୁତ୍ଵ ଦେଇଥିଲେ ।

ଏହି କାର୍ଯ୍ୟକ୍ରମରେ ଜିଲ୍ଲା ପ୍ରକଳ୍ପ ନିର୍ଦ୍ଦେଶକ ନରୋତ୍ତମ ବେହେରା, ଯୋଜନା ଓ ପରିସଂଖ୍ୟାନ ବିଭାଗର ଉପନିର୍ଦ୍ଦେଶକ ସରୋଜ କୁମାର ସେଠୀ, ଜିଲ୍ଲା ଶ୍ରମ ଅଧିକାରୀ ସତ୍ୟ ନାରାୟଣ ଆଚାର୍ଯ୍ୟ,ଏମ୍ଏସ୍ଏମ୍ଇ ବିଭାଗର ସହନିର୍ଦ୍ଦେଶକ ଡି ସି ମିଶ୍ର,ଏନ୍ ସି ଏସ୍ ସିଡିଏର ସହନିର୍ଦ୍ଦେଶକ ରାମ କିଶୋର ଶର୍ମା,ସଂକଳ୍ପ ପ୍ରକଳ୍ପର ରାଜ୍ୟ ସଂଯୋଜକ ମନୋଜ କୁମାର ତ୍ରିପାଠୀ, ଓଡ଼ିଶା ପ୍ରାଧିକରଣ କର୍ତ୍ତୃପକ୍ଷଙ୍କ ପକ୍ଷରୁ ଜିଲ୍ଲା ନୋଡାଲ ଅଧିକାରୀ ରାଜ କିଶୋର ପାତ୍ର, ବୈଷୟିକ ଶିକ୍ଷା ଓ ତାଲିମ ନିର୍ଦ୍ଦେଶାଳୟର ପରାମର୍ଶ ଦାତା ବିଜୟ ପ୍ରସାଦ ପ୍ରଧାନ ପ୍ରମୁଖ ଅତିଥି ଭାବେ ଯୋଗଦେଇ କର୍ମଶାଳାରେ ବିଭିନ୍ନ ବିଭାଗରେ ନିଯୁକ୍ତି ଟ୍ରେନିଂ, ଆପ୍ରେଣ୍ଟିସିପ୍ ବାବଦରେ ଆଲୋଚନା କରି ଜିଲ୍ଲାରେ କିପରି ବେକାରୀ ଯୁବକ ଯୁବତୀମାନଙ୍କ ପାଇଁ ଆତ୍ମନିଯୁକ୍ତି ଉଦ୍ୟୋଗୀତା, ଶିଳ୍ପାନୁଷ୍ଠାନ ଚାହିଦା ମୁତାବକ ପ୍ରଶିକ୍ଷଣ ଓ କର୍ମସଂସ୍ଥାନ ସୃଷ୍ଟି କରାଯାଇ ପାରିବ, ସେ ବାବଦରେ ବିଶେଷ ବିବରଣୀ ପ୍ରଦାନ କରିଥିଲେ। ଏହି କର୍ମଶାଳାରେ ବିଭିନ୍ନ ବିଭାଗ ଓ ଜିଲ୍ଲାର ବୃହତ୍ ଶିଳ୍ପାନୁଷ୍ଠାନର ୮ ଜଣ ସମ୍ବଳ ବିଶେଷଜ୍ଞ ନିଯୁକ୍ତି ପ୍ରଶିକ୍ଷଣ ସମ୍ବନ୍ଧୀୟ ବିଷୟବସ୍ତୁ ଉପସ୍ଥାପନା କରିଥିଲେ ।

ଏହି କର୍ମଶାଳାରେ ଟାଟା ବିଏସ୍ଏଲର ମାନବ ସମ୍ବଳ ବିଭାଗର ଡିଜିଏମ୍ ଅଞ୍ଜନ କୁମାର ଦାସ, ଜିଏମ୍ଆର୍ କମଳାଙ୍ଗର ମାନବ ସମ୍ବଳ ବିଭାଗର ମୁଖ୍ୟ କେ ରେଡ୍ଡୀ, ଏମ୍ ଜି ଏମ୍ ମିନେରାଲସ୍ ମାନବ ସମ୍ବଳ ବିଭାଗର ମୁଖ୍ୟ ପ୍ରଶାନ୍ତ କୁମାର ରଥ, ନବଭାରତ ଭେନ୍ଞ୍ଚରର ସିଏମ୍ଆର୍ ମୁଖ୍ୟ ସୁକାନ୍ତ ଉପାଧ୍ୟାୟ, ରୁଙ୍ଗଟା ମାଇନ୍ସର ମାନବ ସମ୍ବଳ ମୁଖ୍ୟ ଅକ୍ଷୟ କୁମାର ଦାସ ଓ ତତ୍ ସହିତ ନରଭେରାମ୍,ଶକ୍ତିଶୁଗାରସ୍, କଳିଙ୍ଗ ଜ୍ୟୁଟ୍, ଖେମକା ସପିଙ୍ଗ୍ ମଲ୍,କଳିଙ୍ଗ ଆଇ ହସ୍ପିଟାଲ୍ ଓ ଅନ୍ୟାନ୍ୟ ପ୍ରାୟ ୫୪ ସଂସ୍ଥାର ପ୍ରତିନିଧି ମାନେ ଯୋଗ ଦେଇଥିଲେ ।

ଏଠାରେ ଟାଟା ବିଏସ୍ଏଲ୍, ନବଭାରତ ଭେନ୍ଞ୍ଚର୍ସ ଓ ଏମ୍ ଜି ଏମ୍ ମିନେରାଲସର ପ୍ରତିନିଧି ମାନେ ଜିଲ୍ଲାରେ କିପରି ଭବିଷ୍ୟତରେ କର୍ମସଂସ୍ଥାନର ସୁଯୋଗ ସୃଷ୍ଟି କରାଯାଇ ପାରିବ ସେ ବାବଦରେ ଆଲୋଚନା କରିଥିଲେ। ଏହି କାର୍ଯ୍ୟକ୍ରମକୁ ଜିଲ୍ଲା ନିୟୋଜକ ଅଧିକାରୀ ଆଶିଷ କୁମାର ବସନ୍ତିଆ ପରିଚାଳନା କରିଥିଲେ। ଟାଟା ଷ୍ଟିଲର ସମ୍ୱିତ କୁମାର ଦାସ କାର୍ଯ୍ୟକ୍ରମକୁ ସଂଯୋଜନା କରିଥିଲେ ଓ ସରକାରୀ ଆଇଟିଆଇର ପ୍ରଶିକ୍ଷଣ ଅଧିକାରୀ ଅରୁଣ କୁମାର ମହାରଣା ପରିଶେଷରେ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।( ରିପୋର୍ଟ୍, ଅମର ରଞ୍ଜନ ଦାସ)