ନବୀନଙ୍କୁ ଧନ୍ୟବାଦ ଦେଲେ – ନିରଞ୍ଜନ

ଓଡ଼ିଶା ତାଜା ନ୍ୟୁଜ (୧୭ ଜାନୁଆରୀ ରବିବାର ) ଭୁବନେଶ୍ୱର :- ରାଜ୍ୟର ୧୬୨ଟି ଟିକାକରଣ କେନ୍ଦ୍ରରେ ଗତକାଲିଠାରୁ ପ୍ରଥମ ପର୍ଯ୍ୟାୟ ଟିକାକରଣ ଆରମ୍ଭ ହୋଇଛି । ଏହି ପର୍ଯ୍ୟାୟରେ ସ୍ୱାସ୍ଥ୍ୟକର୍ମୀ ଓ ଆଗ ଧାଡ଼ିର ଯୋଦ୍ଧାମାନଙ୍କୁ ଟିକାକରଣ କରାଯାଉଛି। ଦ୍ଵିତୀୟ ପର୍ଯ୍ୟାୟ ଟିକାକରଣ ସମୟରେ ୫୦ ବର୍ଷ ବୟସରୁ ଅଧିକ ଓ ଗମ୍ଭୀର ରୋଗରେ ପୀଡିତ ୫୦ ବର୍ଷରୁ କମ ବୟସର ବ୍ୟକ୍ତିଙ୍କୁ ଟିକାକରଣ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଥିବା ବେଳେ ଆଜି ପ୍ରଦେଶ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ରାଜ୍ୟରେ ଥିବା ବିପିଏଲ ବର୍ଗ ଓ ବରିଷ୍ଠ ନାଗରିମାନଙ୍କୁ କରୋନା ଟୀକା ବିନାମୂଲ୍ୟରେ ଦେବାପାଇଁ ଅନୁରୋଧ କରିଛନ୍ତି ।

ଏକ ଭିଡିଓ ବାର୍ତ୍ତାରେ ଶ୍ରୀ ପଟ୍ଟନାୟକ କହିଛନ୍ତି, ଗତକାଲି ରାଜ୍ୟରେ ଆରମ୍ଭ ହୋଇଥିବା ଟିକାକରଣ କାର୍ଯ୍ୟକ୍ରମ ସଫଳ ହୋଇଛି। ସେଥିପାଇଁ ସେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି। ଟିକାକରଣ କାର୍ଯ୍ୟକ୍ରମରେ ସଂଶ୍ଲିଷ୍ଟ ସମସ୍ତ କର୍ମଚାରୀଙ୍କୁ ମଧ୍ୟ ସେ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି ଯେ ରାଜ୍ୟରେ ଏବେ ସାଧାରଣ ଲୋକଙ୍କ ଯାହା ସ୍ଥିତି ରହିଛି ସେ ଦୃଷ୍ଟିରୁ ବିପିଏଲ ଏବଂ ବରିଷ୍ଠ ନାଗରିକମାନଙ୍କୁ କରୋନା ଟୀକା ବିନା ମୂଲ୍ୟରେ ଦେବା ପାଇଁ ରାଜ୍ୟ ସରକାର ବିଚାର କରନ୍ତୁ ।